Hatutan.com, (20 Dezembru 2024), Díli-IX Governu Konstitusionál liuhosi Ministru Prezidénsia Konsellu Ministru, Hermenegildo “Agio” Pereira, nomeia  Anita Tavares Ribeiro de Jesus, bá kargu Komisária Komisaun Funsaun Públika (CFP-silga portugés) ho baze dedikasaun eskluziva, to’o loron 22 fulan-Novembru  2028.

Termu juramentu Anita Tavares Ribeiro de Jesus nu’udár Komisária foun ba CFP. Foto/Espesiál

Iha Sesta, 20 fulan-Dezembru 2024, Ministru Agio Pereira fó ona pose bá komisáriu foun Komisaun Funsaun Públika nian iha Palásiu Governu.  Haktuir iha komunikadu ne’ebé Hatutan.com asesu fó sai katak, nomeasaun ida ne’e ho baze bá Rezolusaun Governu Nú. 61/2024, loron 21 fulan-Novembru.

Anita Tavares, okupa ona kargu Diretora Rekursu Umanu iha Ministériu Edukasaun no mós kargu Diretora iha Sekretariadu Komisaun Funsaun Públika, nune’e nia iha koñesimentu  didi’ak kona-ba difikuldade, dezafiu no kompleksidade misaun  ne’ebé nia simu nu’udár komisária CFP.

Ministru Prezidénsia Konsellu Ministru, Agio Pereira hateten  hafoin tinan 15 hosi ninia kriasaun, Komisaun Funsaun Públika, agora iha mandatu dahaat, hasoru dezafiu sira ne’ebé lansa hosi Programa IX Governu Konstitusionál, iha ne’ebé inklui hadi’a efikásia, efisiénsia no profisionalizmu Administrasaun Públika nian, bá prestasaun servisu públiku ne’ebé di’ak liu, nu’udár fatór krusiál ba implementasaun polítika no programa dezenvolvimentu ne’ebé lori ba redusaun pobreza no progresu no moris-di’ak populasaun nian.

Iha sentidu ida ne’e, Governu aprova ona planu reforma jestaun rekursu umanu iha Administrasaun Públika, ne’ebé iha Komisaun Funsaun Públika no Ministériu Finansa hanesan forsa matríz. Entre objetivu sira hosi planu reforma nian, Agio Pereira destaka estabelesimentu hosi estrutura foun ida bá funsaun públika no investimentu ida ne’ebé aumenta iha dezenvolvimentu kapitál umanu, hodi permite atrai no mantén talentu joven sira ba funsaun públika.

Ministru Prezidénsia Konsellu Ministru defende mós katak, paradigma tuan funsionáriu públiku nu’udár ema ne’ebé restritu atu kumpri regra, prosedimentu no kalendáriu presiza troka ho vizaun moderna, foka bá rezultadu, inovasaun no impaktu reál bá sosiedade.

“Mentalidade funsionáriu públiku sira ohin loron nian presiza marka ho valór sira hanesan proatividade, empatia no kompromisu ba exelénsia,” Ministru Agio fó hanoin.

Komisária Anita Tavares Ribeiro de Jesus, espresa ninia kompromisu atu hala’o ninia kna’ar ho imparsiálidade másimu, dedikasaun no responsabilidade no sempre tau iha konsiderasaun loloos interese Estadu nian, Programa Governu nian no valór sira funsaun públika nian.

“Kompromete atu serbisu iha defeza ba bem públiku no serve komunidade no povu, ho imparsialidade, onestidade, profisionalizmu no korresaun, hodi salvaguarda interese aas liu nasaun nian,” nia promete.

Serimónia tomada pose ne’e hetan partisipasaun hosi Sekretária Estadu bá Igualdade, Elvina de Sousa Carvalho, SEKOMS, Expedito Dias Ximenes, estrutura komisaun funsaun públika nian, Komisáriu CAC, Rui Pereira, Inspetór Jerál Estadu, Francisco de Carvalho, Provedór Virgílio da Silva Guterres, Xefe Estadu Maiór hosi Ministru Prezidénsia Konsellu Ministru, Vitor Maia, hosi Diretór Jerál Administrasaun Prezidénsia Konsellu Ministru, Pedro Feno, hosi Diretór Jerál Administrasaun no Finansas Ministériu Edukasaun, hosi Sebastião Pereira hosi Ministériu Administrasaun Estatál, hosi Pároku de Balide, Angelo Trindade no reprezentante sira seluk husi CFP.

Jornalista: Rogério Pereira Cárceres