Hatutan.com,( 08 Janeiru 2025), Díli—Iha semana ikus ne’e, númeru pasiente aumenta barak hodi halo overload pasiente iha Ospitál Nasionál Guido Valadares (HNGV), Díli, maske nune’e, Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, konfirma katak pasiente sira-ne’e la’ós pasiente virus foun HMPV. 

Ospitál Nasionál Guido Valadares (HNGV, sigla portugés). Foto/Dok.Tome da Silva

Diretór Servisu Apoiu Diagnóstiku no Terapeutiku iha HNGV, Vidal de Jesus Lopes, Kuarta (08/01/2025), konfirma katak iha semana ikus ne’e espasu iha sala iha emerjénsia nakonu tanba pasiente barak. Sala emerjénsia la sufisiente duni atu akomoda númeru pasienta tanba kama nakonu hotu, nune’e konsellu diretiva foti desizaun hodi transfere pasiente balun ba iha Ospitál  António Carvalho, Lahane.

“Loos duni, informasaun ne’e loos,  katak loron hirak ikus ne’e,semana ikus ne’e, HNGV enfrenta duni overload pasiente tanba espasu hotu iha HNGV la sufisiente nafatin atu akomoda númeru pasiente barak tebes,” Vidal de Jesus Lopes, informa ba jornalista sira iha HNGV.

Ospitál Nasionál Guido Valadares iha deit  kama 420 to’o 450 ne’e utiliza hotu ona no mós sala emerjénsia foun ba Pediatria mós nakonu entaun  HNGV foti alternativu seluk no mós sei kordena Servisu Saúde Munisípiu Dili atu bele apoiu tan sira.

HNGV mós halo ona karta ba Ministériu Saúde( MS) no hetan ona despaixu atu bele utiliza Ospitál António Carvalho Lahane, nune’e bainhira enfrenta pasiente barak bele transfere ba Ospitál Lahane.

Kondisaun ospitál António Carvalho, Lahane  bele akumula pasiente to’o na’in-50,  dadaun iha ona pasiente na’in-13 no ida-ne’e fazeadamente bainhira  pasiente kontinua aumenta, konsellu diretiva sei halo liña kordenasaun ho Ministériu Saúde hodi halo transferensia.

Pasiente sira ne’ebé mai la’ós ho surtu foun ka virus HMPV, hanesan ema hotu-hotu hatene katak virus foun HMPV dadauk ne’e mosu ona  iha Xina, maibe tuir informasaun katak iha nasaun Xinez la’ós iha nasaun Xina tomak, mas provínsia balu de’it.  Mezmu nune’e, Ekipa  Saúde Timor-Leste alerta nafatin.

Nia afirma ho kondisaun ne’ebé mak dadaun ne’e iha, hanesan iha ospitál António Carvalho Lahane ne’e sei prepara ho diak hodi antisipa,  karik virus HMPV  ne’e mosu, óspital Lahane sei sai hanesan fatin alternativu ba pasiente sira virus hirak ne’e  no HNGV  nafatin prontu atu suporta rekursu umanu no fasilidade sira hotu.

Jornalista: Leopoldina de Carvalho