Hatutan.com, (24 Janeiru 2025), Díli—Kustu projetu konstrusaun halte ka parajen mikrolete $96,000.00  ne’ebé harii iha fatin estratéjiku sira iha Dili laran sai preokupasaun no dívida boot iha públiku.

Konstrusaun Halte ne’ebé foin atinje 35%. Foto/Tome da Silva

Halte ka parajen mikrolete ho media entre 13×3 ka 13×4 sentímetru ne’ebé uza de’it besik kotak, baja rigan no kalén ho simente uitoan ne’e kada halte ho nia kustu $9,600.00 no halte ne’ebé tenke harii hamutuk 10 ho nia total kustu $96,000.00.

Projetu halte ne’ebé na’in ka owner  mak Ministériu Transporte no Komunikasaun (MTK) ne’e sai diskusaun no ema lubun halo trosa iha media sosiál Facebook tanba de’it nia kustu ne’ebé la nesesáriu to’o kedas $9,600.00 kada halte.

Ho kustu projetu halte nian ne’e halo hater sira iha mundu virtuál (Facebook) halo estimasaun dehan kustu ne’e demaziadu no deskonfia mosu buat ruma laloos iha projetu ne’e ka balun akuza projetu ne’e atu fahe osan ba malu de’it.

Bá preokupasaun no duvida sira-ne’e, Ministru Transporte no Komunikasaun Miguel Marques Manitelu, Sesta (24/012/2025), liuhosi konferénsia imprensa, klarifika katak  prosesu konstrusaun halte 10 iha kapitál Díli kumpre prosedimentu Lei Aprovizionamentu no hetan verifikasaun hosi Ajensia Dezenvolvimentu Nasionál (ADN).

“Prosesu konstrusaun halte ne’e naruk, naruk tanba husi MTK prepara dezeñu ho BoQ, prepara hotu lori ba Ministériu Obras Públikas (MOP) halo verifikasaun ba dezeñu ne’e, depois MOP halo verifikasaun lori ba ADN halo verifikasaun bazeia ba dezeñu no nia kustu ne’e hira,” Ministru Miguel Manitelu hateten.

Halte ne’ebé konstrui iha área Vila-Verde, Díli, foin atinje 35%.

Nia  haktuir tan dau-daun ne’e progressu konstrusaun ne’e atinji 35% signifika sei iha tan 65% tanba inklui buat barak, inklui mós modelu ba halte ne’e rasik.

“35% ne’e la’ós husi uma 10 ne’e mak 35%, maibé kondisaun uma ne’e mak foin atinji 35% tanba iha materiál barak. Ha’u lakohi ko’alia kestaun tekniku, material barak ne’ebe iha ne’e laiha,” Ministru Miguel Manitelu hateten.

Tuir dezeñu hosi kompañia ne’e  mak sei iha  fasilidade ba ema ho defisiente, sei muda trotoar sira ne’e, uma ne’e sei didin ho vidru  atu nune’e udan labele kona pasajeiru sira. Tanba ne’e, Miguel Manitelu hateten, prosesu halte ne’e verifikasaun dala-rua husi MOP ho ADN depois hafoin halo tenderizasaun ka konkursu públiku   ba montante osan bazeia ba verifikasaun ida husi AND tanba kondisaun fatin harii halte ne’e balun iha rai tetuk, balun tenke ateru rai no seluk tan.

 Jornalista: Leopoldina de Carvalho