Hatutan.com, (03 Fevereiru 2025), Díli–Prezidente Konsellu Kombatente no Libertasaun Nasionál (CCLN, sigla portugés), Vidal de Jesus “Riak Leman”, la kontente no kondena maka’as aktu ka hahalok pesoál balun iha servisu CCLN Munisípiu Covalima ne’ebé deskonfia halo esplorasaun no korrupsaun hasori veteranu sira seluk ne’ebé rejista iha tinan 2009.

Lee Mós: Veteranu no Kombatente Covalima Divulga Aktu Esplozaun no Korrupsaun iha Prosesu Verifikasaun Lista Veteranu

Prezidente Konsellu Kombatente no Libertasaun Nasionál (CCLN, sigla portugés), Vidal de Jesus “Riak Leman”. Foto/Tome da Silva

Riak Leman hateten pesoál se de’it, inklui ministru ho mós prezidente CCLN iha obrigasaun polítika ho moral atu presta servisu ida di’ak ba povu no rai ida-ne’e. tanba ne’e, aktu sira ne’ebé pesoál balun komete liga ho esplorasaun no korrupsaun ne’ebé deskonfia akontese iha CCLN Munisípiu Covalima sei kanaliza ba Polísia Sientífika Investigasaun Kriminál (PCIC) ho mós Ministériu Públiku (MP).

Liuhosi konferénsia imprensa, Sábadu (01/02/2025), iha Munisípiu Covalima, veteranu sira hamutuk ema na’in-13, divulga aktu esplorasaun no korrupsaun ne’ebé deskonfia komete hosi pesoál ida ho inisiál FDS nu’udár elementu prinsipál iha Konsellu Kombatente Libertasaun Nasionál (CCLN, sigla portugés) Munisípiu Covalima.

Agustinha do Carmo “  Bui  Ki’ak Tekite” nuu’dár portavós ba hirak ne’ebé konsidera hanesan vitima ba aktu esplorasaun no korrupsaun hosi FDS ne’e deklara,  bainhira sira hakat ba komisaun verifikasaun dadus hodi tuir prosesu verifikasaun ba veteranu ne’ebé Estadu prepara iha munisípiu ida-idak. Maibé, iha prosesu verifikasaun dadus, FDS  halo esplorasaun hasoru sira durante prosesu verifikasaun iha Munisípiu Covalima.

Iha prosesu verifikasaun dadus, FDS  halo promesa oioin ba sira, no mós husu sira kontribui osan (hosi $5.00 to’o $1000.00), materiál sira (fós, semente, korrente-mean, tais) no animál sira (karau, bibi, fahi, manu) inklui halo servisu  obrigatóriu ba konstroi FDS nia uma.

Prezidente CCLN, Riak Leman Riak e membru komisáriu sira hosi CCLN  ne’ebé eleitu hosi kongresu mai mak halo kobransa ilegál tenke hola medida ba nia hodi ba hatán iha tribunál tanba ida ne’e korrupsaun no tenke tenke reklama nia responsabilidade tuir lei haruka.

 “Agora ne’e ita atu halo buat ne’ebé loos, se buat ruma la loloos entaun se mak halo ida ne’e nia mak responsabiliza tanba veteranu sira ne’e tenke hatudu buat ne’ebe di’ak ba ita-nia povu no ba ita-nia maluk veteranu sira seluk. Se se mak halo kobransa ilegál atu simu osan katak o nian ne’e aban bairua mai atu fó grau 8-14 ka 15-19 atu bele simu osan kada fulan ne’e laloos tanba verifikasaun dadus ida ne’e liu hosi prosesu naruk ida,” Vidal de Jesus “Riak Leman” hateten hodi responde Hatutan.com iha nia servisu fatin, Comoro, Díli, Segunda (3/2/2025).

Se bá oin mak nafatin hanesan ne’e, hanesan Riak Leman, la konsiente ho hahalok sira hanesan ne’e agora dalan iha mak tribunal hola medida tuir dalan loos.

Riak Leman husu ba veteranu sira hotu iha Timor-Leste atu haree ema falsu sira ne’ebé mak ba kobra ilegál osan veteranu sira nian no promete buat oioin atu hato’o kedas  keixa iha konsellu nasionál.

Riak leman apelu ba veteranu hotu liuliu ba sira ne’ebe mak tur iha estrutura konsellu munisipál sira kuandu halo verifikasaun dadus veteranu sira tenke ho loos, labele bosok ema tun-sa’e hodi ema fó osan, fó animal ka fó materiál ruma.

Jornalista Estajiáriu : Lazaro Pereira Quefi