Hatutan.com, (04 Fevereiru 2025), Díli-Membru Bankada Parlamentár   CNRT liuhosi plenária Parlamentu Nasionál, Tersa (04/02/2025), transmite povu Viqueque ho Ainaro nia halerik ho preokupasaun kona-bá bee-moos ne’ebé sira enfrenta.

Lee Mós: KHUNTO husu Governu Servisu Hamutuk Serbí Povu ho Dignu

Labarik ida halimar hela bee-moos. Foto/Espesiál

Deputadu Bankada CNRT, Anacleto Freitas, hateten  komunidade  Viquque Villa preokupa kona-bá  bee-moos ne’ebé antes ne’e torneira no tanki Bee Timor-Leste Empreza Públika (BTL,E.P) bá  kanaliza  no monta hotu, maibé tinan-rua ona bee-moos to’o ohin loron  labá.

“Sé karik mak Governu haree bele aselera lalais para komunidade sira bele asesu bá bee-moos, karik mak la aselera entaun di’ak liu sobu tiha tornera sira ne’e depois labele amostra de’it iha ne’ebá, maibé bee-moos la bá,” Deputadu Anacleto Freitas  iha nian intervensaun iha plenária PN.

Reprezenta komunidade sira-nia aspirasaun, Deputadu Anacleto Freitas, rekomendasaun ba ministériu relevante bele haree atu nune’e komunidade sira ne’e bele hetan mós tratamentu ne’ebé hanesan mós ho komunidade sira seluk ne’ebé asesu ona bá bee-moos.

Iha biban hanesan Deputadu Bankada CNRT, Oscár de Araujo mós hato’o preokupasaun komunidade iha Ainaro Villa ne’ebé preokupa bá  tanki rezervatóriu bee-moos iha Ainaro Villa ne’ebé nia ekipamentu no filtru balu  la funsiona ona.

“Entaun kualkér foer bá hotu iha tanki distribuisaun depois distribui direitamente bá iha ita-nia komunidade ne’ebé komunidade sira iha ne’ebá preokupa tanba bee-iis tanba kontamina ho foer,” Deputadu Oscár de Araujo  hateten.

Nune’e reprezentante povu ne’e  husu BTL,E.P bele bá haree problema ida-ne’e hodi bele resolve iha tempu badak. Nune’e, reprezentante Governu ne’ebé partisipa iha plenária PN ne’e, Vise-Ministru ba asuntu Parlamentár, Adérito da Costa Hugo, promete envia preokupasaun hirak ne’e bá minstériu relevante hodi bele hetan solusaun.

Jornalista Estajiária: Zita Menezes