Hatutan.com, (07 Fevereiru 2025), Díli—Iha tinan sira liubá, governu ho setór privadu sira, liuliu hirak ne’ebé hala’o knar iha konstrusaun sivíl diskute ona oinsá atu organiza setór privadu nasionál sira tuir sira-nia klasifikasaun.

Dokumentu ne’ebé Governu liuhosi Ministériu Obras Públiku (MOP) prepara daudaun naran “Guia de Apoio” tau klasifikasaun haat (4) bá emprezáriu konstrusaun sivíl sira mak, hanesan;

1. Klasifikasaun A
2. Klasifikasaun B1
3. Klasifikasaun B2
4. Klasifikasaun C

MOP enkontru ho CCI-TL hodi ko’alia kona-bá pra-kualifikasaun. Foto/Leopoldina de Carvalho

Padraun provizóriu ne’ebé sei lori ba diskute ho CCI-TL mak oinsá klarifikasaun ka kategorizasaun  sira tuir ida-idak nia kapasidade finanseira, kapasidade tékniku, ekipamentu pezadu ho esperiénsia.

Bá Ministru Obras Públiku (MOP), Samuel Marçal, Sesta (07/02/2025), hahú koordena fali ho Kamara Komérsiu no Indústria  Timor-Leste (CCI- TL) hodi tuur hamutuk ho setór privadu nasionál hotu iha Timor-Leste hodi buka entende malu kona-bá nesesidade no padraun sira pra-kualifikasaun nian.

“Ha’u mai atu organiza fila fali setór privadu sira liuhosi CCI-TL. Nune’e, semana rua ba oin, atu enkontru mós ho emprezáriu sira hotu,  oinsá ita buka took parte Governu nian, saida mak atu suporta sira hodi dudu ita-nia setor privadu sira bele  lao ba oin iha idaidak nia klasifikasaun,” Ministru Samuel Marçal, informa, Sesta (07/02/2025), iha Edifísiu  CCI-TL, Díli.

Governu halo planu tau osan porvolta millaun $10 ba empreza  konstrusaun sivíl sira, tanba ne’e, Governu hamutuk  CCI-TL  organiza atividade oinsa fó klasifikasaun ba setór privadu sira hahú  pra-kualifikasaun hodi haree  sira nia kapasidade, esperensia,  kapitál ne’ebé mak iha. Ho nune’e, iha kompetisaun tenderizasaun ruma karik, klase ida ne’e mak tuir la bele ba hotu.

“Atividade ne’e  tuir lolos tinan kotuk hahú, maibé  iha situasaun politika, enatun ohin mak ita hahú  hodi nune’e sira bele prepara sira nia  kapital,” nia hateten.

Iha fatin hanesan, Vise Prezidente CCI-TL, Agostinho Gomes, hateten enkontru  ida ne’e ho objetivu atu identifika setór privadu nasionál  ne’ebé mak  halao negosiu iha kontrusaun sivíl no obras publiku nian.

“Objetivu mak  atu emite sertifikadu  atu identifika kapasidade empresariu sira  husi kiik to’o boot,” Agostinho gomes hateten.

CCI-TL rejista empreza konstrusaun sivíl   iha Timor Leste besik rihun 30, nune’e CCI-TL ezije Governu loke lalais   pre-kualifikasaun  nune’e empreza hotu hotu tenke iha  sertifikasaun  no ema ne’ebé mak servisu  tenke iha kualifikadu  no  klasifikadu .

Jornalista: Leopoldina de Carvalho