Hatutan.com, (09 Maiu 2025), Díli- Kardeál Robert Francis Prevost ne’ebé eleitu nu’udár Papa liu husi Konklave, Kinta (08/05/2025),  hili naran Papa Leão XIV iha nia misaun Apostóliku nu’udár Vigáriu Kristu nian no susesór São Pedro ho lema Apostóliku IN ILLO UNO UNUM (Iha Kristu mesak ida, ita hotu sai ida de’it).

Lee Mós: Sarani Timoroan Rihun-resin ho Domin Boot Partisipa Misa Funerál Papa Francisco iha Tasi-Tolu

Kardeál Robert Francis Prevost ne’ebé eleitu nu’udár Papa hodi hili naran Papa Leão XIV. Foto/Vaticano News

Hafoin eleitu liu husi Konklave no Vatikanu halo anúnsiu ba públiku katak “Habemus Papam” husi protodiácono, Cardinal Dominique Mamberti, Papa eleitu dirije kedas nia liafuan dahuluk hodi hasé sarani besik rihun 100,000 ne’ebé marka prezensa iha prasa São Pedro inklui sarani hotu iha mundu rai klaran ne’ebé akompaña liu husi orasaun hodi dehan  “Dame hela ho imi”.

“Ida ne’e mak saudasaun dahuluk husi Kristu Ressuscitadu, Bibi Atan Di’ak ne’ebé saran nia moris ba Maromak nia bibi sira. Ha’u mós hato’o saudasaun dame nian ida-ne’e tama iha imi-nia fuan, to’o ba imi-nia família sira, ba ema hotu, iha ne’ebé de’it sira iha, ba povu hotu, ba mundu tomak. Dame hela ho imi!” Papa Leão XIV hato’o liafuan dahuluk ne’e ho oin midar no hamnasa ba sarani sira iha prasa São Pedro inklui sarani hotu iha mundu tomak hafoin anúnsiu ba públiku kona-ba nia misaun Apostóliku nu’udár Papa.

Vigáriu Kristu nian ne’e hatutan ida-ne’e maka Kristu Moris-Hi’as nia dame, dame ida ne’ebé dezarma, haraik-an no perseverante. Ida-ne’e mai hosi Maromak, Maromak ne’ebé hadomi ita hotu inkondisionalmente.

Amu-Papa ne’ebé haraik bensan ba Roma, fó nia bensan ba mundu tomak iha dadeer Páskua ne’ebá. Husik ha’u kontinua ho bensaun hanesan: Maromak hakarak buat di’ak liu ba ita, Maromak hadomi ita hotu.

Buat aat sei la manán. Ita hotu iha Maromak nia liman. Ne’e duni, la tauk, unidu, lolo liman ba Maromak no entre ita, mai ita hakat ba oin. Ita mak Kristu nia dixípulu sira. Kristu uluk liu ita. Mundu presiza ita-boot nia naroman.

Umanidade presiza ponte sira atu nune’e sira bele hetan hosi Maromak no mundu. Tulun ami mós, hamutuk ho ema seluk, hodi harii ponte sira, liuhusi diálogu, liuhusi enkontru, halibur ita hotu atu sai povu ida de’it, nafatin, iha dame nia laran.

Ita hotu iha Maromak nia liman. Ne’e duni keta ta’uk, lolo liman ba Maromak no entre ita rasik, mai ita hakat ba oin. Ita mak Kristu nia dixípulu sira. Kristu uluk liu ita. Mundu presiza ita-boot Nia naroman. Umanidade presiza nia nu’udar ponte ida atu Maromak no nia domin bele hetan. Tulun ami mós, atu harii ponte sira, liuhusi diálogu, liuhusi enkontru, halibur ita hotu atu sai povu ida de’it, iha dame nafatin.

 Obrigadu, Papa Francisco!

Ha’u mós hakarak agradese ha’u-nia maun-alin kardeál sira hotu ne’ebé hili ha’u atu sai Pedro nia Susesór no la’o hamutuk ho imi, nu’udar Kreda ida ne’ebé unidu, buka nafatin dame, justisa, buka nafatin atu serbisu nu’udar mane no feto fiél ba Jezús Kristu, la ta’uk, hodi haklaken Evanjellu, sai misionáriu.

Labele ta’uk hodi haklaken Evanjellu, Atu sai misionáriu.

Ha’u maka Saun Agostinho nia oan-mane, Agostinho ida, ne’ebé hatete: “Convosco sois cristão, e para vós bispo”. Iha sentidu ida-ne’e, ita hotu bele la’o hamutuk ba pátria ida-ne’e, ba ne’ebé Maromak prepara ita.

Ba Kreda Roma nian, saudasaun espesiál ida. Ita tenke buka hamutuk oinsá sai Kreda misionária, Kreda ne’ebé harii ponte sira, ne’ebé diálogu, nakloke nafatin atu simu, hanesan Prasa ida-ne’e ho liman nakloke, ema hotu, ema hotu ne’ebé presiza ita-nia karidade, ita-nia prezensa, diálogu, domin.

Ba imi hotu, maun-alin sira, husi Roma, husi Itália no husi mundu tomak, ami hakarak sai Kreda sinodál, Kreda ne’ebé la’o, ne’ebé buka nafatin dame, ne’ebé buka nafatin karidade no buka nafatin atu besik, liuliu ba sira ne’ebé terus.

Loron harohan ba Na’in Feto Pompeia, ita-nia inan Maria hakarak nafatin la’o hamutuk ho ita, besik, tulun ita ho nia intersesaun no nia domin.

Agora ha’u hakarak reza hamutuk ho imi, mai ita reza hamutuk ba misaun foun ida ne’e, ba Kreda tomak, ba dame iha mundu. Mai ita husu ba Maria, ita-nia inan, ba grasa espesiál ida-ne’e.

Agradese sarani Dioseze Chiclayo, Peru

No se ita-boot permite ha’u atu hatete liafuan ida ba sira hotu, liuliu ba ha’u nia dioseze doben Chiclayo nian iha Peru, iha-ne’ebé povu fiar-na’in ida akompaña sira nia bispu, fahe sira nia fiar no fó buat barak mai ha’u atu kontinua sai Jezús Kristu nia Igreja fiar-na’in ida.

Biografia badak Papa Leo XIV

Papa Leão XIV, moris ho naran Robert Francis Prevost iha loron 14 fulan-Setembru tinan 1955, iha Chicago, Illinois, mak nu’udar ulun-boot Igreja Katólika nian no soberanu ba Estadu Sidade Vaticano. Nia eleitu nu’udar Papa ba dala 267 iha loron 8 fulan-Maiu tinan 2025, hodi troka Papa Francisco.

Robert Prevost moris iha família ida ne’ebé iha hun husi Fransa, Itália, no España. Nia remata nia estudu sekundáriu iha semináriu ki’ik husi Ordem Santo Agostinho nian. Iha tinan 1977, nia hetan grau Lisensiatura iha Siénsia kona-ba Matemátika husi Universidade Villanova.

Ho desizaun atu sai amu-lulik, Prevost tama ba Ordem Santo Agostinho nian iha fulan-Setembru tinan 1977, halo nia votu dahuluk iha tinan 1978 no votu perpétuu iha tinan 1981. Nia hetan grau Mestre iha Divinidade husi Catholic Theological Union iha Chicago iha tinan 1982 no ordenadu sai amu-lulik iha loron 19 fulan-Juñu tinan 1982. Tuirmai, nia hetan doutoramentu iha Direitu Kanóniku husi Pontifícia Universidade Santo Tomás de Aquino iha Roma.

Papa Leo XIV ko’alia lian barak, inklui inglés, españól, italianu, francés, no portugés. Nia mós bele lee latín no alemán.

Misaun iha Peru

Husi tinan 1985 to’o 1986 no mós husi tinan 1988 to’o 1998, Prevost serbí nu’udar misionáriu iha Perú. Durante tempu ne’e, nia serbí nu’udar pároku, ofisiál diosezanu, profesór semináriu, no administratur. Nia mós serbí nu’udar vigáriu judisiál no hanorin direitu kanóniku, patristika, no teolojia morál iha Arsebispadu Trujillo. Nia sai sidadaun naturalizadu Perú iha tinan 2015.

Lideransa iha Ordem Agostinho nian

Iha tinan 1999, Prevost eleitu nu’udar Prior Provinsiál ba Agustinianu sira iha Chicago. Tuirmai, nia serbí mandatu rua nu’udar Prior Jerál ba ordem Agustinianu mundiál nian husi tinan 2001 to’o 2013.

Papa Leo XIV lori ba papadu esperiénsia barak iha serbisu misionáriu, formasaun teolójika, no lideransa episkopál. Nia eleisaun marka momentu signifikativu ida ba Igreja Katólika, ho sidadaun amerikanu dahuluk asume knaar nu’udar Pontífise.

Papa Francisco nomeia Prevost nu’udar Administradór Apostóliku ba Diocese Chiclayo, Perú, iha tinan 2014, no tuirmai nu’udar Bispu iha tinan 2015. Nia lema episkopál mak “In Illo uno unum”, ne’ebé reflete nia espiritualidade Agostinho nian.

Hahu iha tinan 2023, Papa Francisco nomeia Prevost nu’udar Prefetu ba Dikastériu ba Bispu sira no Prezidente ba Komisaun Pontifícia ba Amérika Latina. Nia mós sai Kardinál iha tinan hanesan. Iha knaar ne’e, nia superviziona selesaun ba bispu foun sira iha mundu tomak.

Jornalista: Elio dos Santos