Hatutan.com, (28 Maiu 2025), Díli—Autoridade Timor Leste liuhosi Polísia Migrasaun Timor-Leste nian, Tersa kalan (27/05/2025), halo kapturasaun no detesaun hikas ba fujitivu Organizasaun Internasionál Polísia Kriminál  (INTERPOL, sigla ingles),  Arnolfo Arnie Teves Jr iha nia rezidénsia ida iha Díli.

Lee Mós: STJ Deside La Halo Estradisaun, Fujitivu INTERPOL Teves Jr Agradese Bá Governu Timor-Leste

Fujitivu Arnolfo “Arnie” Teves Jr. Foto/Dok. Espesiál

Tuir video husi fonte balun ne’ebé fahe no viral daudaun iha  Facebook hatudu, autoridade Polísia Migrasaun Timor-Leste nian foti obrigatóriu Arnolfo Teves Jr iha nia rezidénsia hodi lori mai iha edifísiu Sentral Servisu Migrasaun Timor-Leste nian.

To’o notísia ne’e publika, Hatutan.com  seidauk hetan konfirmasaun ho autoridade kompetente sira kona-bá medida kapturasaun ba Teves Jr ne’e, maske nune’e informasaun ne’ebé asesu husi fontes kredivel iha autoridade Timor-Leste nian katak to’o  Kuarta dadeer ne’e (28/05/2025), Arnolfo Teves Jr detein hela sela detensaun Polísia Migrasaun nian hodi submete ba prosesu identifikasaun no posivel boot sei halo estradisaun ba nia nasaun orijen Filipina.

Hanesan informa nanis ona, katak iha loron 20 fulan-Marsu 2025,  Supremu Tribunál Justisa  (STJ) Timor-Leste nian deside indefere pedidu estradisaun ne’ebé hato’o husi Governu Filipina ho nune’e Arnolfo Teves Jr sei la hetan estradisaun.

Fujitivu red notice hosi INTERPOL ho naran kompletu Arnolfo “Arnie” Alipit Teves Jr ka Arnolfo Teves Jr, tama iha territóriu Timor-Leste iha loron (la fiksa), fulan-Abríl 2023 ho aviaun jet privadu hamutuk ho nia feen no oan-feto.

Bainhira Arnolfo Teves Jr ne’ebé sai hanesan autór bá kazu omisídiu oioin iha provínsia Negru Oriental, Filipina, to’o iha Aeroportu Internasionál Prezidente Nicolau Lobato, Díli,  tempu ne’ebá, deskonfia simu direta hosi asesór prinsipál balun Prezidente Repúblika nian tempu ne’ebá.

Eis membru Parlamentu Filipina ne’ebé reprezenta provínsia Negru Oriental sai hanesan autór kazu asasinatu oho ema na’in-sia (9) inklui Governadór  Negru Oriental, Roel de Gamo hetan kapturasaun no detensaun  hosi autoridade Polisiál Timor-Leste bainhira halimar hela golf iha área balun iha Díli laran, Kinta loraik, 21 fulan-Marsu 2024, hale’u tuku 16:00 Otl.

 Iha loron 26 fulan-Jullu tinan 2023 iha Manila-Filipina, Konsellu Anti-Terrorizmu (ATC, sigla inglés) hasai rezolusaun númeru 43 (2023) hodi konsidera  Arnolfo A. Teves, Jr ho nia grupu armadu nu’udár grupu terrorista tanba envolve iha kazu omisídiu no abuzu seksuál iha Negros Oriental.

Eis  lejizladór Falipina nian ne’e rejista hanesan red notice Organizasaun Internasionál Polísia Kriminál (INTERPOL, sigla inglés)  iha fulan-Fevereiru 2023. Notifikasaun  red notice hosi INTERPOL ne’e nu’udár anúnsiu ne’ebé husu bá autoridade justisa sira iha mundu atu buka tuir no kaptura fujitivu ne’ebé presiza halo estradisaun, entrega aan no enfrenta ka kolabora ho justisa.

Arnolfo Teves Jr beibeik ona la simu akuzasaun no desizaun sira judisiáriu nian hasoru nia no duni nia sai hosi Parlamentu tanba nia hahalok la disiplina no dezobediénsia.

Jornalista: Lazaro Pereira Quefi