Hatutan.com, (28 Maiu 2025), Díli–Família rasik husi fujitivu Organizasaun Internasionál Polísia Kriminál  (INTERPOL, sigla ingles), Arnolfo Teves Jr husu apoiu imediata bá entidade hotu-hotu iha mundu ne’e, liuliu Komisaun Internasionál ba Direitu Umanu atu tulun sira-nia aman Arnolfo Teves Jr ne’ebé konsidera kapturasaun no detensaun ne’ebé autoridade polísia Timor-Leste halo ne’e la iha baze legal ka konsidera ilegál.

Lee Mós: Fujitivu Arnolfo Teves Jr Konsidera Kapturasaun no Detensaun Bá Nia Ilegál

Axl Teves, oan mane husi fujitivu Arnolfo Teves Jr. Foto/Repro

“Kumprimentus ba hotu-hotu. Ha’u halo video ne’e atu informa ba ema hotu katak ha’u nia aman Arnolfo Teves Jr hetan ona sekuestru ohin maizumenus tuku 8:00 kalan Oras Timor-Leste nian no antes ne’e maizumenus iha tuku 7:00 kalan, nia iha ona informasaun kona-bá aviaun privadu ne’ebé maka ajenda atu semo ba Timor-Leste no depois iha tuku 8:00 kalan, Ofisiál Servisu Migrasaun Timor-Leste to’o iha nia rezidénsia no foti nia,” Axl Teves, oan mane husi fujitivu Arnolfo Teves Jr hateten ida-ne’e iha video ne’ebé sira-nia parte publika iha rede sosiál Facebook, Kuarta ne’e.

Axl Teves  haktuir pesoál Migrasaun sira ne’e foti de’it nia aman Arnolfo Teves Jr la ho dokumentu komprovativu sira husi Tribunál, katak  la ho mandadu ka dokumentu legál ruma husi Tribunál.

“Autoridade Timor-Leste nian tama ho forsa, sira hasai nia  (Arnolfo Teves Jr, red) ba kompletamente no to’o agora daudaun nia sei iha edifísiu Servisu Migrasaun Timor-Leste nian no hetan detensaun ilegál husi ofisiál Migrasaun sira, serku mós hosi polísia Timor-Leste.

Nia husu oan ha’u atu informa ba ema hotu kona-ba situasaun ida-ne’e. Ami família inklui ha’u nia aman husu ba ita-boot no komisaun direitus umanus no ba Departamentu hotu-hotu iha mundu tomak, favor ida ajuda ami,” Axl Teves   hateten.

Nia friza katak  nia  aman manan tiha ona kazu kontra estradisaun no depois sira hatama mosaun ba rekonsiderasaun ba desizaun anteriór ne’ebé Tribunál Timor-Leste halo no depois fali, Tribunál Timor-Leste deside afavór ba  nia aman Arnolfo Teves Jr, nune’e tuir loloos, nia hateten, ida-ne’e hatudu katak nia tenke hela ho dame no seguru iha ne’e.

“Ami hakfodak atu haree ida-ne’e, Tersa kalan, nia hetan sekuestru ilegalmente no agora detein ilegalmente hamutuk ho nia Advogadu sira.  Ami fiar katak sira halo buat ne’ebé hanesan ho saida maka sira halo ba Eis-prezidente Filipina nian iha ne’ebé sira sei detein de’it ema ne’e ilegalmente no tula nia sai ba fatin ne’ebé de’it sira hakarak no depois rezolve de’it buat hotu tuir sira-nia parte. Ami la aprova ida-ne’e, no ami lakohi ha’u nia aman atu sira lori sai ho aviaun husi Timor-Leste tanba ami-nia manán tiha ona iha tribunál katak nia bele hela iha Timor-Leste no nia labele hetan estradisaun,”.

“Favor ida dala ida tan ba departamentu ruma iha mundu tomak. Favor ida fó apoiu lalais tamba ami haree katak sira sei tula ami nia aman  sai husi Timor-Leste. Advogadu sira fó hanoin ona ba sira, katak ida-ne’e maka detensaun ilegál no téknika sira seluk, maibé dala ida tan, sira insiste hodi kontinua detensaun ne’e. Ha’u husu ba ita-boot sira, se de’it maka bele ajuda ami iha ne’e, favór ida ajuda ami, favór ida haruka apoiu mai. Ha’u nia aman agora iha edifísiu Migrasaun nian laran iha Timor-Leste, ne’ebé hale’u hosi Migrasaun no polísia Timor-Leste lubuk ida. Ikus liu. Antes ha’u remata video ida ne’e. Ha’u hakarak informa de’it ba ema hotu katak membru família no mídia lokál sira lubuk ida iha hela edifísiu Migrasaun laran hodi akompaña.  Ha’u bolu mós atensaun ba Governu Timor-Leste nian, favor, mak ita halo saida mak loos, ami manán ona kazu ne’e. Ami presiza tebes ita-boot sira nia tulun atu halo buat neʼebé loos. Favor ida halo favor ida mai ami no halo buat ne’ebé loos no ajuda ami iha situasaun ida-ne’e. Ha’u husu ba imi hotu,” Axl Teves hateten.

Jornalista: Zita Menezes