Hatutan.com, (20 Juñu 2025), Díli–Tribunál Judisiáriu Primeira Instánsia Dili  (TJPID) hatan faktu foun ne’ebé la konsta iha akuzasaun Ministériu Públiku (MP) nian ba kazu administrasaun de Noza iha relasaun ho alokasaun orsamentu subvensaun públiku iha Ministériu Komérsiu, Indústria no Ambiente  (MCIA) ba loja do povo iha tinan 2014.

Lee Mós: Kazu Krime Partisipasaun Ekonomia iha Negosiu no Administrasaun da Noza Deskonfia Envolve António Kalohan ho Arguidu Na’in-12 Seluk Tan Eziste Hela iha Tribunál

Dokumentu ne’ebé Hatutan.com asesu. Foto/Repro

Iha audiénsia julgamentu ne’ebé hala’o iha TJPID, Sesta (20/06/2025),  juiza Jumiati Freitas ne’ebé lidera prosesu julgamentu ne’e deklara husi prova ne’ebé produz iha tempu audiénsia julgamentu, Tribunál konsidera katak iha prosesu prova mosu faktu foun ida ne’ebé la konsta iha akuzasaun, maibé iha interese evidensia  bá desizaun kona-bá kazu ne’e.

Prova foun  ne’ebé Tribunál hetan maka  hanesan, ekipa MCIA ne’ebé kompostu husi Jembribes Doutel Ferreira, Manuel G. B. Corte-Real, Cristiano Moura, Martinha Soares no Cipriano Esteves D. Ferreira, hala’o verifikasaun ba proposta ne’ebé grupu KAR LAO RAE aprezenta.

Iha loron 08 fulan-Setembru tinan 2015, Grupo KAR LAO RAE aprezenta relatóriu kona-bá ezekusaun fundus subvensaun públika ba faze primeiru, ne’ebé korresponde ba 40% hosi valór  orsamentu  ho montante US$6,800.00.

Iha loron 09 fula-Juñu tinan 2016, Grupu KAR LAO RAE aprezenta relatóriu kona-bá  ezekusaun fundus públika bá faze segundu, ne’ebé korresponde bá 60% hosi valór orsamentu  ho montante US$10,200.00.

Iha loron 8 fulan-Agostu tinan 2014, Direksaun Nasionál Administrasaun no Finansas-MCIA emite CPV númeru 0072270 ho valór orsamentu US$5,000.00, atu halo pagamentu ba grupu Loja do Povo iha Postu Administrativu ka Sub-Distritu Maucatar, Munisípiu Covalima.

Ho ida-ne’e, Tribunál komunika alterasaun la substantívu ba faktu iha akuzasaun, tuir Artigu 273.º, n.º 1 hosi Kódigu ba Prosesu Penal (CPP-sigla portugés).

Hafoin lee tiha faktu sira ne’e, Tribunál husu bá arguidu sira katak tanba Tribunál haree faktu haat ne’e, maibé Ministériu Públiku la marka prezensa, nune’e Tribunál deside  prazu loron-10  hodi halo alterasaun bá faktu ne’ebé la konsege konsta iha akuzasun Ministériu Públiku.

Tribunál husu defeza sira  atu hato’o depoimentu kona-bá faktu ne’ebé Tribunál hetan, maibé laiha advagadu no defeza mak hato’o ka aprezenta sira-nia opiniaun  ruma.

Julgamentu ba kazu ne’e, Tribunál deside adia  ka muda fali bá loron 30 fula- Juñu ne’e ho nune’e, Tribunál husu bá Arguidu sira hodi marka fali prezensa iha loron ne’ebé determina ona hale’u  tuku 14:00 OTL.

Jornalista: Marcelino Tomae