Hatutan.com, (26 Juñu 2025), Díli–  Prezidente Parlamentu Nasionál (PPN), Maria Fernanda Lay, Kinta (26/06/2025),  fó tomada pose bá membru foun Conselho Imprensa (CI)  períodu 2025-2029.

Lee Mós: Levantamentu Conselho de Imprensa: SEKOMS Expedito Dias Ximenes Halo Duni Interferénsia bá Redasaun RTTL,E.P

Membru foun Conselho de Imprensa períodu 2025-2029 simu posse husi PPN Maria Fernanda Lay iha PN, Kinta (26/06/2025). Foto/Zita Menezes

Kompozisaun membru foun Conselho de Imprensa nian mak; Cesar António  Mali (prezidente), Joaquim Coutinho (membru), Susana Cordoso (membru), Isabel Maria Fernandes de Jesus (membru)  ho Benevides Coreira Barros (membru).

“Ha’u espera, ohin ita-boot sira mós testamuña bá tomada pose bá membru Conselho de Imprensa  ne’ebé tuir lei tenke troka kada tinan haat, entretantu asuntu ne’ebé ohin ha’u temi iha ne’ebá importante atu marka katak Parlamentu Nasionál mós indika nian reprezentante iha ne’ebá para hodi tau matan bá mídia iha Timor-Leste,” Prezidente Parlamentu Nasionál Maria Fernanda Lay hateten iha nia diskursu.

PPN Maria Fernanda Lay  espera katak apartir tinan ida-ne’e bá oin, Conselho de Imprensa  mós submete sira-nia  relatóriu anuál mai Parlamentu Nasionál para bele ajenda hodi halo debate tuir lei haruka.

Importante Conselho Imprensa, atu tau matan bá imprensa iha Timor-Leste, tanbasa, lakleur Timor-Leste sai membru plenu ASEAN oinsá preparativu imprensa ka Conselho de Imprensa prepara mídia nasionál iha ne’e.

“Ha’u espera katak ita-nia jornalista sira mós tenke iha vontade atu aprende lingua, segundu informasaun oinsá maka ita hatuun notisia iha ita-boot sira nian mídia  no liga ho Intelejénsia Artifisial (AI) ne’ebé ohin loron la’ós asuntu estrañu no liga mós ho mídia dijitál ne’ebé agora makaas tebes iha mundu,”Maria Fernanda Lay hateten.

Iha fatin hanesan Prezidente  Conselho de Imprensa bá  mandatu datoluk nian períodu 2025-2029, Cesar Mali, hateten, durante ne’e hotu-hotu haree ona akompañia rasik saida maka Conselho de Imprensa halo ona kona-bá oinsá atu garante  liberdade imrensa iha Timor-Leste, inklui garante públiku atu hetan informasaun ida loos no kredivél.

Nia afirma knaar importante ne’ebé maka estrutura foun ida-ne’e atu halo, la’ós buat foun ida, ne’e hanesan kontinuasaun de’it, saida maka Conselho de Imprensa anteriór halo ona, buat di’ak barak  sira halo ona nune’e presiza dezenvolve tán.

“Ami nia mandatu ne’e sei iha buat foun balu mak ami  presiza atu tau matan, maka hanesan presiza halo revizaun bá lei komunikasaun sosiál, katak ita tama ona iha plataforma dijitál ne’ebé ita hotu-hotu goja duni dijitalizasaun ida-ne’e liuliu liga ho artefisial Intelejénsia (AI),” Cesar Mali hateten.

Prezidente CI ne’e hateten iha mandatu ida-ne’e tuir vizaun no misaun iha pontu lima ne’ebé maka importante ona hodi tau bá prioridade maka hanesan, reforma legál no advokasia,  hametin liután indepedénsia no sustentabilidade mídia sira, hasa’e jornalista sira nian kapasidade liuhosi treinamentu no formasaun,  mekanizmu protesaun bá jornalista sira no mekanizmu literásia.

Jornalista: Zita Menezes