Hatutan.com, (07 Jullu 2025), Díli– Polísia Sientífiku Investigasaun Kriminal  (PCIC-sigla Portugés) remete tiha ona bá Ministériu Públiku (MP) kona-bá prosesu investigasaun ba kazu fujitivu Kalumban Mali  dezde tinan 2023 liubá. 

Lee Mós: Ministru Justisa Sergio Hornai Análize Hela Pedidu PGR Kona-bá Fujitivu Kalumban Mali

Fujitivu Kalumban Mali ne’ebé deskunfia falsifika dokumentu hodi hetan nasionálidade Timor ho naran Leonardo Benigno Tilman. Foto/Repro husi Konta Facebook Stockist Dili

Diretór  Nasionál PCIC, Vicente Fernandes e Brito hateten dezde tinan 2023 PCIC remete tiha ona prosesu hotu-hotu kona-bá  fujitivu Kalunban Mali  nian bá  Ministériu Públiku ba kazu falsifikasaun dokumentu hodi hetan nasionalidade Timor ho naran Leonardo Benigno Tilman.

Bá Hatutan.com hafoin lansamentu sítiu ofisiál  Terras  no Propriedade nian iha Edifisiu Ministériu Justisa,  Segunda (07/07/2025), Diretór  Nasionál PCIC, Vicente Fernandes e Brito, konfirma katak  prosesu  kona-bá fujitivu Kalunban Mali ne’e la’o hela  iha Ministériu Públiku  ho krime rua, hanesan krime  falsifikasaun dokumentu no krime administrativu.

Fó hanoin fali katak  Prokuradór Jerál Repúblika (PGR, sigla portugés), Nelson de Carvalho, hateten ona katak nia parte  sidauk iha kõnesimentu kona-bá prosesu kazu falsifikasaun dokumentu sidadania ne’ebé deskonfia envolve husi fujitivu Kalumban Mali.

“Ha’u sidauk hatene, no laiha koñesimentu bá ida-ne’e. Ha’u foin fulan   hira  de’it,  simu kna’ar hanesan  prokuradór, ne’ebé ha’u laiha koñesimentu kona-bá ida-ne’e” Prokuradór Jerál Repúblika  Nelson  de Carvalho, hateten, Segunda (30/06/2025), iha Tribunál Judisiál  Primeira Instánsia Díli (TJID).

Kona-bá pedidu hosi  Prokuradór Jerál  hato’o bá ona  Ministériu  Jusitisa, tuir nia katak ida-ne’e  mós nia la hatene, no lakohi halo komentáriu bá ida-ne’e, tanba prosesu  fujitivu Kalumban Mali ne’ebé  falsifika dokumentu ho naran Timor nian, Leonardo Benigno Tilman,  seidauk iha koñesimentu. Mézmu nune’e,  PGR Nelson Carvalho hateten prosesu bá oin maka haree took.

Fujitivu Kalumban Mali orijen husi Lamaknen, Postu Administrativu Atambua, Provínsia Kupang, Timor Osidentál ka NTT (Nusa Tengara Timur).  Nia nu’udár fujitivu  husi Prokuradoria Timor Osidentál nian ka Nusa Tenggara Timur (NTT)-Indonézia, halai husi justisa hodi mai haksumik tinan barak ona  iha Timor-Leste no dezde tinan 2023 hetan ona nasionalidade Timorense. 

Kalumban Mali, nu’udár fujitivu kazu korrupsaun bá projetu fornesimentu adubu (pupuk) iha Departamentu  Agrikultura no Plantasaun Provínsia NTT-Indonézia halai husi desizaun Tribunál iha tinan 2016.

Fó hanoin fila fali katak Kalumban Mali,  hetan sentensa husi Painél Juis Tribunál Krime Korrupsaun ka  Pengadilan Tindak Pidana Korupsi (Tipikor) Kupang  tinan-15 prizaun efetivu iha tinan 2016. Maibé, proses julgamentu bá kazu ne’e ho karater  in-absénsia ho ajenda akuzasaun final,  Kalumban Mali halai lakon to’o ohin loron.

Kalumban Mali, sai hanesan fujitivu ka DPO (Daftar Pencarian Orang) Prokuradoria NTT ho Prokuradoria Jerál Repúblika Indonézia nian dezde kedas tinan 2026.

Kalumban Mali, envolve kazu fornesimentu adubu ka pupuk ho kuantidade tonelada  575 ho valor orsamentu millaun Rp 976. Kalumban Mali nu’udár Diretór CV Eka Cipta Persada ne’ebé hetan detensaun dezde loron 28 fulan-Fevereiru 2014. Molok ne’e, iha Jullu 2013, Kalumban Mali sia hanesan kandidatu membru lejislativu husi  Partidu Amat Nasonal (PAN) bá DPRD-NTT.

Jornalista: Marcelino Tomae