Hatutan.com, (28 Jullu 2025), Díli—Sekretáriu Estadu Komunikasaun Sosiál (SEKOMS), Expedito Dias Ximenes, hateten nia la hatene buat ida kona-bá PT Aulia Multi Sarana ne’ebé deskonfia la partisipa iha konkursu públiku bá projetu konstrusaun edifísiu foun Rádiu Televizaun Timor-Leste, Empreza Públiku (RTTL,E.P).

Lee Mós: CAC Sei Halo Averiguasaun Bá Projetu Konstrusaun Edifísiu RTTL,E.P Ne’ebé Deskonfia iha Abuzu Podér no Korrupsaun

Projetu konstrusaun Edifisiu Sentral foun RTTL,E.P ne’ebé la’o atraza. Foto/Supply

Informasaun ne’ebé Hatutan.com rekolla husi fontes oioin haktuir katak iha konkursu internasionál ba projetu konstrusaun edifísiu sentrál foun RTTL,E.P ne’e empreza PT Aulia Multi Sarana la partisipa, maibé teki-teki de’it mosu mai PT Aulia Multi Sarana maka hetan kontratu husi Programa Nasoins Unidas ba Dezenvolvimentu (UNDP) nu’udár implementadór hodi ezekuta  obra ho nia kustu US$3,760,405.00.

Informasaun ne’ebé iha katak ba konkursu internasionál projetu edifísiu foun RTTL,E.P ne’ebé konsentra iha UNDP ne’e empreza haat mak partisipa kompostu husi Bonavide Unipesoál, Lda, Baderlema Unipesoál, Lda, Ezma Unipesoál, Lda ho PT Relis Sapindo Utama.

Derrepente de’it, PT Aulia Multi Sarana mak manan projetu ne’e tanba deskonfia indika husi SEKOMS Expedito Dias Ximenes. Mézmu nune’e, SEKOMS Expedito Dias Ximenes, dezmente hodi dehan nia la hatene buat ida kona-bá konkursu públiku ba projetu konstrusaun edifísiu sentrál RTTL,E.P tanba Governu ho RTTL,E.P hanesan  benefisiáriu la’ós owner ka la’ós na’in ba projetu ne’e.

“Ne’e bá husu bá UNDP.  Sira (UNDP-red) maka halo ne’e, la’ós Governu maka halo,  tanba ne’e osan husi Governu Japaun atu fó bá UNDP atu halo aprovizionamentu , Governu  liu-husi Primeiru Ministu ne’e bá halo de’it lansamentu,” SEKOMS  Expedito Dias Ximenes hateten hodi responde Hatutan.com iha resintu Ministériu Negósiu Estrajeniru no Kooperasaun (MNEK), Segunda (28/07/2025).

Nia esplika katak Governu Timor-Leste la hatene tanba UNDP maka halo aprovizionamentu. Tanba ne’e, sé maka  manán no   konkursu ne’e mai husi kompañia internsaionál ne’ebé mós SEKOMS  la hatente.

Hatutan.com halo esforsu oioin hodi konfirma situasaun sira ne’e ba parte kompetente sira iha UNDP, maibé to’o agora UNDP nonook no nunka fó klarifikasaun mézmu mosu deskonfiansa oioin, inklui abuzu podér no lala’ok ezekusaun projetu ne’e atraza.

Kona-bá informasaun ne’ebé fó sai ona katak PT Aulia Multi Sarana sei halo fali soil test analyzes tanba ne’e mak presiza tempu fulan tolu tan atu hetan nia rezultadu ba teste rai ne’e, SEKOMS Expedito Dias Ximenes, hateten ida-ne’e mós nia lahatene tanba parte UNDP mak hatene hotu kedas.

Molok ba konkursu públiku, UNDP halo kontratu ida ho  grupu empreza NIPPON KOEI hodi halo ona soil test analyzes ho dezeñu ho kustu ne’ebé previstu US$300,000.00 no aprova husi UNDP ho  Ministériu Obras Públiku (MOP).

Informasaun seluk ne’ebé iha katak projetu konstrusaun edifísiu foun RTTL,E.P ne’e atraza tanba mós kompañia PT Aulia Multi Sarana menus kapasidade menus. Tanba realidade iha terrenu projetu nian, PT Aulia Multi Sarana halo mobilizasaun boot ba ekipamentu ne’ebé nia promete atu lori husi Indonézia mai, traballadór lokál menus, no material konstrusaun mós laiha terrenu durante fulan-tolu ona.

UNDP rasik uluk promete iha serimónia lansamentu ba projetu ne’e  katak  atu serbisu loron ho kalan hodi aselera projetu ne’e, mas realidade UNDP nonook n o la ko’alia buat ida kona-ba progresu servisu projetu ne’e nian rasik.

Iha loron 19 fulan-Dezembru tinan 2024, hala’o serimónia hatuur fatuk dahuluk  ba projetu konstrusaun edifísiu foun Rádiu no Televizaun Timor-Leste (RTTL,E.P) nian husi Primeiru-Ministru, Kay Rala Xanana Gusmão,  no tuir kontratu katak projetu ne’e tenke remata ka termina iha fulan-Marsu 2026

Jornalista: Marcelino Tomae