Hatutan.com, (01 Agostu  2025), Díli- Prezidente  Repúblika hamutuk Ministériu Juventude Desportu Arte no Kultura (MJDAK), Sesta (01/08/2025), ofisiálmente halo  lansamentu bá Díli Internasionál Marathon 2025 “Run For Palestine”  ho tema halai bá pás, solidariedade bá direitu povu Palestina nian no unidade iha ASEAN.

Lee Mós: Dili Marathon Internasionál 2025 Dedika Ba Palestina

Prezidente Repúblika hamutuk MJDAK ofisiálemente lansa Marathon 2025 “Run For Palestine”, Sesta (01/08/2025). Foto/Zita Menezes

Ministru Juventude Desportu Arte no Kultura (MJDAK) Nelio Isaac Sarmento iha konferénsia imprensa, hateten  Prezidente Repúblika ho Governu liuhosi  MJDAK hakarak uza oportunidade ne’e fó hatete bá públiku katak ohin ofisiálmente  lansamentu Díli Internasionál Maratona 2025 “Run For Palestine” ne’ebé sei realiza  iha fulan-Outubru.

Díli internasionál Marathon ne’e inisiativa ida husi Prezidente Repúblika, José Ramos-Horta  servisu hamutuk ho Governu liuhosi MJDAK ne’ebé mai ho hanoin rua; primeiru tanba Timor-Leste iha hela prosesu atu integra bá ASEAN. Nune’e uza Díli  Internasionál Marathon, hanesan mós espasu ida atu bá iha ne’ebá.

Segundu, oras ne’e mundu triste tanba konflitu iha rai barak-barak, maka  Díli  Internasionál Marathon   ne’e  bolu dehan korrida ka halai bá Palestina, Ne’e hanesan meiu solidariedade povu Timor-Leste bá sofrimentu ne’ebé povu Palestina enfrenta oras ne’e daudaun.

“Ida-ne’e ita hakarak hato’o ita-nian mensajen bá povu no mundu katak nafatin promove diálogu nune’e bele hakiak nafatin pás no dame iha mundu,” Ministru Nelio Isac Sarmento afirma.

Liuhosi konferénsia imprensa ne’e, Nelio Isaac Sarmento adianta katak ofisiálmente loke ona rejistu  bá partisipante sira ne’ebé hakarak  partisipa iha eventu marathon  refere. 

“Konvidadu atleta sira ne’ebé atu partisipa iha eventu ne’e maka atleta sira país membru ASEAN nian maka sei hetan oportunidade atu mai Timor-Leste hodi partisipa iha Díli Internasionál Maratona,  nune’e mós loke nivél internasionál bá komunidade estranjeiru ne’ebé hela iha Timor-Leste iha Díli sira hakarak partisipa bele partisipa,” Nelio Isaac Sarmento hateten.

Data bá kompetisaun Díli Internasionál Marathon 2025 “Run For Palestine” hahú iha loron 11 fulan-Outubru 2025, no halai taru sei hahú iha tuku 06:00 dadeer husi Palásiu Prezidente sei  remata (finish) mós iha Palásiu Prezidente.

Kompetisaun Marathon  ne’e fahe bá parte  haat, ida marathon nivél internasionál, rua iha  marathon  21 kilómetru, tolu marathon  kilómetru 10 bá ema ho defisiénsia, marathon  jerál animasaun ho labarik sira  kilómetru 3.

Xefe Kaza Sivíl Prezidénsia Repúblika, Jesuína Maria Ferreira Gomes, informa mós katak Dili Internasionál Marathon ne’e eventu anuál Prezidente Repúblika tanba ne’e Prezidente Repúblika prevee orsamentu  hamutuk $100,000.00.

Jornalista: Zita Menezes