Hatutan.com, (23 Agostu 2025), Díli—Uma Kreda Timor hamutuk ho nia sarani sira, Sábadu (23/08/2025), simu Krús Joven Internasionál  akompaña husi imajen Maria Salus Populi ne’ebé ho aviaun Aero Dili to’o iha Aeroportu Internasionál Prezidente Nicolau Lobato, Dili, iha tuku 13:00 Otl.

Prezensa Krús Joven Internasionál iha Timor-Leste akompaña hosi Padre Misionáriu Koreanu nain-ida (1), jornalista ida (1) no delegadu na’in-rua (2).

Kreda Timor simu Krús Joven Internasionál ho imajen Maria Salus Populi iha Aeroportu Internasionál Prezidente Nicolau Lobato, Sábadu (23/08/2025). Foto/Zita Menezes

Arse Bispu Metropolitania Dioseze Dili, Dom Virgílio Kardeál do Carmo da Silva, SDB, akompaña husi presidente Ezekutivu KomisaunNnasionál Juventude Katólika Timor-Leste (CNJTL) Pe. Francisco Indra do Nascimento Tey-Seran, inklui mós ho protokolu sira ne’ebé kompostu husi igreija no estadu nian simu Krús Joven Internasionál iha sala VIP Aeroportu Preizdente Nicolau Lobato kontínua ho tara tais no aprezentasaun dansa kulturál no dadolin  husi Sarani Vigararia Viqueque, Dioseze Baucau.

Remata serimonia iha Aeroportu Nicolau Lobato, sarani Katólika Timor-oan sira halo prosesaun lori  Krús Joven Internasionál ho Maria Salus Populi, mai iha Igreja Katedral Parókia Imaculada Conceição. 

To’o iha Katedrál Díli, Krús Joven Internasionál ne’ebé inisia husi Papa João Paulo II, nu’udár sinál dame no esperansa nian ne’e kontinua kedas dansa kulturál.

Tuir orariu ne’ebé maka iha, kontinua ho venerasaun ba  Krús no Domingu  aban  sei iha selebrasaun missa iha tuku 07:00 dadeer  iha Igreja Katedrál Dili.

Iha loron 25 fulan-Agostu 2025, Krús Joven Internasionál  kontinua bá vizita sarani  sira iha Munisipíu Bobonaro no iha loron 30 fulan-Agostu ne’e sei kontinua vizita bá  Tailándia.

Krús Joven Internasionál vizita Kreda Timor ne’e ba da-ruak, iha ne’ebé, vizita dahuluk  iha tinan 2008 husi Austrália.

 Jornalista : Zita Menezes