Hatutan.com, (03 Novembru 2025), Viqueque– Programa Nasionál Dezenvolvimentu Suku (PNDS), Suku Afaloikai, harii sentru saúde foun iha Aldeia Uatuita ho montante orsamentu $28.745.03. 

Lee Mós: Governu Tau Ona Prioridade Bá Estrada Afaloikai no Implementa iha 2026

Progresu konstrusaun Sentru Saúde Suku Afaliokai, Postu Administrativu Uatulari, Munisípiu Viqueque. Foto/Zita Menezes

Jestaun Suku PNDS no  Prezidente Planu Koordenasaun Planeamentu Suku Afaloikai, Salvador Pereira Ximenes, informa projetu PNDS Suku Afaloikai ne’ebe implementa ona mak moru protesaun bá eskola, implementa  estrada iha aldeia balu no ida maka daudaun ne’e halo konstrusaun bá Sentru Saúde Suku Afaloikai.

“Progresu bá konstrusaun Sentru Saúde foun iha Suku Afaloikai tuir ami ekipa PNDS nian observasaun foin atinje  50% orsamentu ne’ebé PNDS Suku Afaloikai aloká bá konstrusaun ne’e hamutuk $28.745.03,”  Salvador Perreira Ximenes bá Hatutan.com iha Uatulari Antigu,  Sesta (31/10/2025).

Nia afirma konsellu suku kontinua fahe koutasaun bá kompañia lokál sira ne’ebé mak iha areá suku ida-ne’e no daudaun ne’e kompañia Rekanu mak oferese material bá konstrusaun foun Sentru Saúde Suku Afaloikai  nian.

Prezidente Planu Koordenasaun Planeamentu Suku no Jestsun Suku Afaloikai Salvador Perreira Ximenes hateten dezafiu ne’ebe ekipa PNDS Suku Afaloikai hasoru mak menus transporte bá ekipa hodi halo monotirizasaun bá atividade PNDS suku nian no mós laiha transporte hodi fasilita ekipa PNDS halo servisu.

Nia afirma programa preoridade  PNDS iha Suku Afaloikai iha  tinan oin maka sei foku bá estrada sira iha Aldeia sira iha Suku Afaloikai nia laran.

Xefe Suku Afaloikai Cesario Nascimento Pires  hateten, servisu PNDS Suku Afaloikai la’o  di’ak, maibé problema barak mak ekipa PNDS sira hasoru hanesan menus transporte hodi halo monitorizasaun bá iha atividade PNDS nian no mós insetivu bá ekipa PNDS ne’ebe la sufisiente bá sira nian nesesidade.

Iha sorin seluk reprezentante veteranu Suku Afaloicai, Manuel Alves hateten kona-bá programa PNDS nian iha suku ne’e la’o, maibé husu para orsamentu PNDS nian la’o kontinua para halo dezemvolvimentu iha Suku Afaloikai.

Jornalista: Zita Menezes