Hatutan.com, (10 Dezembru 2025), Díli- Prezidente Parlamentu Nasionál (PPN), Maria Fernanda Lay, hateten, atu halo revizaun bá Konstituisaun Repúblika Demokrárika Timor-Leste (K-RDTL) presiza iha konsensu husi Bankada hotu ne’ebé asentu iha Parlamentu Nasionál.

Lee Mós: Parlamentu Nasionál Sei Rona Entidade Hotu Molok Halo Revizaun Bá Konstituisaun RDTL

Prezidente Parlamentu Nasionál, Maria Fernanda Lay. Foto/Zita Menezes

PPN Maria Fernanda Lay afirma, ideia semináriu ne’e mai kedan husi planu estratejikú Parlamentu Nasionál nian iha lejizlatura liubá, la’ós agora simplesmente iha lejizlatura ida-ne’e nune’e  konsegé ezekuta ka hala’o semináriu ida-ne’e.

“Seminariu ne’e buka hodi haree ema nia hanoin,  ita nian nia hanoin, liuliu intelektuál sira ne’ebé ho prezensa instituisaun estadu nian no mós ho organizaun naun Governamenál sira ne’ebé mak sai perseiru para iha hanoin hakarak halo revizaun ka lae,” PPN Maria Fernanda Lay ba jornalista sira, Kuarta (10/12/2025).

Nia esplika parte prinsipiu nian konstituisaun ne’e la’ós biblia, maibé la’ós katak buat hotu la’o la di’ak, nune’e PN sei hato’o relatóriu semináriu nian iha plenária iha ne’ebá mak bele tetu hodi haree parseiru sira ne’ebé ko’alia, no sira ne’ebé halo aprezentasaun husi intelektual sira.

“Tanba revizaun CNRT mesak labele, FRETILIN mesak labele halo, partidu seluk-seluk mós labele halo mesak, tanbasá presiza  dois tersu, hodi bainhira espliká tiha, revizaun ordináriu dentru tinan lima nian laran, ne’ebé iha interpretasaun balu ne’ebé hodi bainhira iha seminariu aserta tiha ona ne’ebé presiza dois tersu, sé bankada sira sente katak  situsaun ne’e tenke  halo duni tenke identifika didi’ak saida mak sei halo revizaun,” Maria Fernanda Lay hateten.

Jornalista: Zita Menezes