Hatutan.com, (02 Janeiru 2026), Díli-Durante selebrasaun simu tinan foun iha  kapitál Díli, kalan 31 fulan-Dezembru 2025 no loron 01 fulan-Janeiru 2026, Polísia Nasionál Timor-Leste (PNTL) Munisípiu Díli, detein ema na’in-18, kompostu husi na’in-neen kumpri detensaun  oras 72 hodi kontinua ba Ministériu Públiku (MP)  no na’in-12 seluk   halo identifikasaun tanba ho kondisaun lanu.

Lee Mós: PNTL Detein Suspeitu ida Tenta Kesi Ema Nia Kakorok

Motór sira ne’ebé Polísia Unidade Tranzitu Rodoviariu halo apreensaun tanba uza kanu resin no laiha dokumentu, 01 Janeiru 2026. Foto/Juvinal Cabral dos Santos

Polísia Unidade Tranzitu no Rodoviáriu  halo mós apreensaun ba motór 31, kompostu husi motór uza kanu-resin 26 no motór marka Yamaha Rx-King  lima (5).

Komadante Polísia Munisípiu Díli, Superintendente Xefe Polísia Orlando Gomes, Sesta (02/01/2026), atualiza seguransa hahú husi kalan 31 fulan-Dezembru tinan 2025 mai to’o tinan foun, loron 01 fulan-Janeiru tinan 2026, katak akontese konfrontu entre joven sira iha área Caicoli, inklui mós joven balun hamu lanu iha área Postu Administrativu Dom Aleixo hodi detein  sira hamutuk na’in-12 iha Eskuadra Polísia Dom Aleixo.

Iha Kinta, 01 fulan-Janeiru tinan 2026, sidadaun sira ba hariis tasi, nune’e autoridade seguransa koloka nia membru polísia sira inklui Polísia Unidade Tranzitu Rodoviáriu ba iha parte Kristu-Rei no mós ba área Liquiça hodi kontrola movimentu transporte sira.

“Ita halo seguransa ba iha tasi ibun sira, depois ita nia patrollamentu mós kontinua halo patrolla hodi asegura ita-nia sidadaun sira ne’ebé mak halo paseiu ba iha parte leste  ninian, hanesan Kristu-Rei to’o Akanunu Hera, no mós parte Oeste nian husi Díli ba to’o iha Liquiça. Depois sira hariis hotu fila fali mai ita nafatin asegura hodi  kontrola sidadaun sira fila husi paseiu ho di’ak,” Superintendente Xefe Polísia Orlando Gomes informa.

Durante halo auto estop iha parte leste no oeste Kapitál Díli nian, konsege halo apreensaun ba sidadaun balun uza motór kanu resin hamutuk 26 no motór Yamaha Rx-King lima (5) ne’ebé barullu.

“Motór kanu resin sira ne’e ita prende asegura iha Komandu Polísia Munisípiu Díli,  ita hein a motór na’in sira tenke aprezenta dokumentu ba iha Komandu para bele hatene motór sira ne’e legal ka illegal,”  Orlando Gomes hateten.

Iha asidente tráfegu haat, maibé asidente tolu motór soke malu no motór ho karreta, maibé kondisaun normal, asidente ida fatal ema mate  ne’e iha área Manleuana.

Nia hatutan, grau krimi iha Munisípiu Díli aas uituan mak Postu Administrativu Dom Aleixo, mais halai liubá iha tipu kazu ofensa integridade fiziku simples, asaltu ne’e mak sempre aas, tuir fali mai mak kazu violénsia domestika.

Komandu  PNTL  Munisípiu Díli, rejista kazu krime neen, kazu ida tentativa omésidiu.

Durante operasaun seguransa iha Kapitál Díli hetan apoiu husi FALINTIL-Forsa Defeza Timor-Leste (F-FDTL), Polísia Militár (PM), Forsa Espesiál,  Unidade Espesiál Polísia (UEP), Batallaun Orden Públiku (BOP), Unidade Operasaun Espesiál (COE), Korpu Seguransa Pesoál (CSP) no mós hetan apoiu husi Unidade Polísia Maritima (UPM) hamutuk ho forsa informasaun sekreta husi nasionál no munisípiu no mós Sevisu Nasionál Intelejensia (SNI).

Jornalista: Juvinal Cabral dos Santos