Hatutan.com, (07 Janeiru 2026), Díli– Diretora Servisu Migrasaun Superintendente Asisténte Polísia, Adelaide da Rosa, hateten  liga ho kazu Prezidente Autoridade Rejiaun Administrativa Espesiál Oé-Cusse Ambeno (RAEOA), Regio da Cruz Salu halo kontrata servisu no selu saláriu ba sidadaun estranjeiru ho nasionalidade Pakistaun, Farrukh Bashir Moriani ho vistu turista halo violasaun hasori Lei Migrasaun.

Lee Mós: Prezidente Autóridade RAEOA Régio Salu Kontrata Asesór Estranjeiru ho Vistu Turista no Saláriu US$9000.00

Prezidente Autoridade REAOA, Régio da Crus Salu kontrata sidadaun estranjeiru ho nasionalidade Pakistaun, Farrukh Bashir Moriani ho saláriu US$9000.00 utiliza vistu turista. Foto/Repro. Espesiál

“Kona-ba kazu ida ne’e ha’u hetan tiha ona orientasaun husi Ministru Interiór (MI) no prosesu agora daudaun la’o hela. Sidadaun estranjeiru ne’e rasik mós ita detekta iha sistema nia la iha teritoriu nasionál no nia sai ona husi teritoriu nasionál, mais tantu prosesu inisiu ita hala’o tiha ona,” Superintendente Asisténte Polísia, Adelaide da Rosa, hateten ba jornalista sira iha nia knar fatin, Ministériu Interiór (MI), Kuarta (07/01/2026).

Diretora Servisu Migrasaun Timor-Leste ne’e afirma,  kona-bá kazu sira hanesan ne’e normalmente Servisu Migrasaun emite autorizasaun entrada espesiál, ne’e  fó ba iha asesór internasionál sira ne’ebé mak sira presiza.

“Prosesu ne’e atualmente la’o hela no ita sei kanaliza sira, oinsá sira bele hetan vistu ne’ebé mak liga ho sira-nia servisu kuandu nia utiliza vistu turista ne’e konserteza halo violasaun ne’e ita sei foti sansaun,” Diretora Servisu Migrasaun Timor-Leste ne’e afirma.

Nia esplika, kona-bá asuntu ida ne’e nia hateten ona prosesu la’o servisu Migrasaun foti informasaun husi parte hotu-hotu, ho sidadaun estranjeiru ne’e rasik husi autoridade sira akumula hotu informasaun sira ne’e mak relatóriu finál sei aprezenta ba Ministru Interiór, Francisco da Costa Guturres  mak foti desizaun.

Hanesan publika ona, katak Prezidente Autóridade  Rejiaun Administrativa Espesiál Oé-Cusse Ambenu (RAEOA), Régio da Cruz  Salu, halo rektrutamentu no estabelese kontratu traballu ba  sidadaun estrajeiru, Farrukh Bashir Moriani ho nasionalidade Pakistaun ne’ebé utiliza vistu turista no saláriu kada fulan US$9000.00 nu’udár  Konselleiru Espesiál ba Ekonomia no Polítika.

Kontratu ne’e hahú iha loron 07 fulan-Novembru 2025 no  remata iha loron 31 fulan-Dezembru 2025, ho durasaun fulan ida no loron 24. Kontratadu ka  Konselleiru Espesiál ba Ekonomia no Polítika, Farrukh Bashir Moriani ho nasionalidade Pakistaun, servisu iha Eskritóriu Sentral RAEOA iha Pante Makasar, ka iha eskritóriu RAEOA iha Díli, no bele mós hetan destakamentu iha fatin seluk iha  territóriu nasional.

Prezidente Autoridade REAOA, Régio da Crus Salu, Sesta (19/12/2025), liuhusi nia diskursu iha atividade   Programa Movimentu no Emprendedorizmu  iha salaun Konvensaun 01 de Maiu, Palaban, afirma nia kontrata peritu husi Pakistaun ne’e atu estabelese mós kooperasaun ho parseiru sira iha nivel ASEAN, maibé kontratu servisu ba asesór ne’e sai viral fali.  

“Ha’u selu ema ne’e ho montante US$9,000.00 tanba ema ne’e iha espesialidade no nia saláriu boot liu iha UNDP US$10,000.00 (uluk) no nia mai Oé-Cusse atu ajuda ita.  Ita beik ten ko’alia arbitu, ita públika iha média sosiál,” Prezidente Autóridade  RAEOA, Régio da Crus Salu hateten.

Jornalista: Juvinal Cabral dos Santos