Hatutan.com, (11 Fevereiru 2026), Díli-Ministra Saúde (MS), Élia A.A. dos Reis Amaral,  dezmente informasaun husi Komisaun Juri Rekrutamentu PNTL 2025 ne’ebé dehan reajente laiha tanba ne’e adia teste médiku ba kadete PNTL na’in-400.

Lee Mós: Armazén Sentrál INFPM Rejista Total Reajente Atinje 88%

Ministra Saúde, Élia A.A. dos Reis Amaral. Foto/Juvinal Cabral dos Santos

“Reajente laiha, ha’u hanoin pois ita konfirma ho señor Ministru Interiór mak hatene prosesu ida ne’e. Atu dehan de’it katak informasaun ne’e la loos,” Ministra Saúde Élia dos Reis Amaral ba jornalista sira hafoin remata reuniaun Konsellu Ministru iha Palásiu Governu, Kuarta (11/02/2026).

“Reajente laiha ne’e ha’u hanoin la loos karik, ne’e informasaun ne’e la loos, ita-boot sira konfirma fila-fali,” Ministra Saúde afirma tan.

Molok ne’e, Tersa (10/02/2026), Hatutan.com rekolla informasaun husi parte sira iha Armazén  Intitutu Nasionál Famásia no Produtu Médiku (INFPM)  katak  totál reajente ne’ebé rejista iha armazén sentrál INFPM  atinji 88%.

Dadus ne’ebé Hatutan.com asesa husi pesoál sira iha armazén INFPM ne’ebé lokaliza iha área Kampu Alor, Díli, informa katak  husi nesesidade nasionál ekivalente ho serka 1,760 item reajente no husi totál estimadu 2,000 item ne’ebé uza bá servisu laboratoriu iha nivel nasionál.  Husi totál ne’e, aprosimadu 9% ka 180 item konsidera hanesan stock-out temporáriu tanba prosesu distribuisaun ka renovasaun kontratu.

Rekorda fali katak Portavos Komisaun Juri ba Rekrutamentu kadete PNTL 2025, Superintendente Polísia António da Luz, iha Sentru Formasaun Polísia (CFP-sigla portuges), hateten parte Departamentu Saúde PNTL halo koordenasaun ho Laboratoriu Nasionál  HNGV ba konfirma katak ekipamentu ne’ebé mak atu halo teste hanesan reajente to’o agora seidauk iha, tanba ne’e mak fó hatene fali ba kandidatu sira hein ekipamentu ne’e to’o ona maka foin bele halo teste médiku.

Iha fatin hanesan Xefe Departamentu Saúde Superintendente Assistente Polísia Analita do Rego, haktuir, oráriu atu ba prova médiku tuir loloos hahú iha loron 10  to’o loron 20  fulan-Fevereiru ne’e, maibé tuir konfirmasaun husi departamentu saúde, katak Laboratoriu Nasionál HNGV reajente ne’ebé atu halo teste ne’e seidauk to’o iha Timor-Leste, hanesan reajente Complete Blood Count (CBC), Kimia ho reajente sira seluk tan.

Portavós Komisaun Juri bá  Rekrutamentu  membru PNTL, Superintendente Polísia António da Luz, hatutan, tenke hein parte laboratoriu nian, atu reajente ne’e to’o tiha iha Timor-Leste mak bele hahú teste médiku ba kandidatu ajente PNTL na’in-400 ne’ebé atu konkore ba vaga 400 iha PNTL.

Jornalista: Juvinal Cabral dos Santos