Hatutan.com, (02 Marsu 2026), Díli–Governu Timor-Leste liu husi Ministériu Negósiu Estranjeiru no Kooperasaun (MNEK) kontinua akompaña  no komunika ho Timoroan na’in-94 ne’ebé dadaun ne’e iha Izraél.

Ministru Negósiu Estranjeiru no Kooperasaun, Bendito Freitas. Foto/Marcelino Tomae

Timoroan na’in-94 ne’e, kompostu husi mane na’in-52 no feto na’in-42. Ministru Negósiu Estranjeiru no Kooperasaun, Bendito Freitas  bá Jornalista sira iha palásiu Prezidensiál, Díli, Segunda (02/03/2026), hateten, Governu Timor-Leste dadaun ne’e kontinua akompaña ho atensaun boot situasaun internasionál ne’ebé afeta sidadaun sira iha rai-li’ur, liu-liu iha Izraél ne’ebé enfrenta  funu ho Iraun.

“Ita haree nuklear  semo bá mai hanesan ne’e,   nasaun hotu preokupa atu proteje sira nia sidadaun sira. Agora úniku ne’e, sira tenke mantein iha sira nia fatin sira, la bele sai atu haree situasaun. Notísia ofisiál sira sei fó sai de’it husi Ministériu Negósiu Estranjeiru,” Ministru Bendito Freitas informa.

Ministru Bendito Freitas mós haktuir Governu liu husi embaixada no reprezentasaun diplomátika kontinua halo kontaktu ho sidadaun sira iha área seluk hanesan Abu Dhabi, ne’ebé mós atinjidu liu-liu iha aeroportu no iha otél balun.

“To’o agora, ha’u hanoin sira iha situasaun di’ak hela. Ita akompaña nafatin, tanba nasaun sira seluk mós preokupa ho sira nia sidadaun,” nia hateten.

Ministru Bendito Freitas afirma,  Prezidente Repúblika, José Ramos-Horta, nu’udar Xefe Estadu, iha planu atu fó deklarasaun ofisiál kona-bá pozisaun Timor-Leste nian hasoru situasaun ne’e dentru oras 24 oin mai.

“Ha’u hanoin katak Ita nia Xefe Estadu  dentru oras 24, sei fó deklarasaun ofisiál kona-bá Timor-Leste nia pozisaun bá situasaun ne’e,” nia dehan.

Jornalista: Marcelino Tomae