Hatutan.com, (04 Marsu 2026), Díli-Ministra Saúde (MS), Élia A.A.dos Reis Amaral, konsidera kazu mortalidade (mate)  moras dengue ho porsentajen 0,6 (%) sei tama iha kategoria ki’ik. Maske nune’e,  pesoál saúde sira nafatin halo tratamentu tuir padraun ho maneira oioin hodi halo prevensaun ba moras dengue ne’e.

Lee Mós: Prezidente Ramos-Horta Dehan Imposivél Evita Kazu Moras Dengue iha Timor-Leste

Ministra Saúde (MS), Élia A.A. dos Reis Amaral. Foto/Juvinal Cabral dos Santos

“Ita nia prinsipál mak kazu mortalidade (mate)  ne’e ita iha 0,6% de’it, signifika orsida sei relata fila-fali kada munisípiu ba iha moras dengue ne’e rasik, sé vale ba ema mate ne’e ami sei informa kada munisípiu, ami sei hato’o,” Ministra Saúde (MS), Élia A.A.dos Reis Amaral, ba jornalista sira iha Ministériu Finansas (MF), Kuarta (04/03/2026).

Ministra Élia Amaral hateten, mortalidade ba kazu moras dengue ne’e ki’ik tebe-tebes, pesoál saúde sira  halo esforsu oioin no medida oioin  tuir padraun tratamentu ne’ebé mak eziste.

Ministra Saúde informa, prevensaun husi parte Ministériu Saúde no mós autoridade lokál no komunidade tomak, nafatin hamoos ambiente liu-liu esgotu sira ne’ebé mak fó risku no sai fatin ba susuk aede aegypti

“Ami mós fahe ona abate ne’e iha teritóriu tomak totál  29.000-resin, depois ami halo tan fumigasaun ba totál uma kain-60 iha teritóriu Timor laran tomak. Ne’ebé ami husu nafatin ba informasaun kona-bá prevensaun moras dengue totál husi tinan kotuk até agora ita halo ona maioria uma kain-300 resin populasaun ne’ebé mak hetan ona informasaun prevensaun bá moras dengue, ha’u hanoin ita halo nafatin,” Ministra Saúde Élia Amaral afirma.

Nia dehan, númeru agora dadaun ba kazu moras dengue redus, maibé fumigasaun husi Ministeriu Saúde hala’o nafatin. Atu informa mós katak fumigasaun ne’e la iha implikasaun ba susuk wolbachia.

Ministra Saúde Elia hatutan, fumigasaun ne’e mós ba eskola kuaze 100 resin ona, atividade fumigasaun ne’e bai-bain hala’o iha loron fim de semana Sesta, Sábadu no Domingu.

Iha sorin seluk Diretór Servisu Saúde Munisípiu Díli, Mateus Pinto hateten, tuir  dadus ne’ebé mak iha kona-bá kazu dengue iha Munisípiu Díli la iha  sinál manus, maibé kontínua aumenta tanba iha  fulan-rua, hahú Janeiru to’o Fevereiru ne’e,   labarik inklui ema ho idade adultu na’in 1.976 mak afeta ba moras dengue no na’in 12 mak lakon vida.

“Bain-bain ita halo prevensaun ne’e antes, maibé la fasil atu ai-moruk  prevensaun hanesan abate no fumigasaun ne’e mai de’it, lori prosesu lubuk ida mak ai-moruk foin to’o iha ne’e,  entaun ita foin too iha prevensaun mais kazu ne’e iha tiha ona,” Diretór Servisu Saúde Munisípiu Díli, Mateus Pinto ba Jornalista sira iha nia kna’ar fatin, Formoza, Segunda (02/03/2026).

Diretór  Servisu Saúde Munisípiu Díli haktuir, iha tinan 2025 kazu dengue ne’e sa’e  rihun 1,029 no mate na’in-tolu de’it, maibé iha tinan ida foin hahú de’it Janeiru kazu dengue sa’e makaas los.

Jornalista: Juvinal Cabral dos Santos