Hatutan.com, (05 Maiu 2026), Díli-Koordenador Infrastrutura Munisípiu Ainaro, Adriano Amado Tilman, informa  kompañia Balada Unipessoal.Lda  ne’ebé kaer projetu estrada iha Aldeia Rita, Suku Maulau, Poxtu Administrativu Maubisse, Munisípiu Ainaro, simu ona osan Estadu nian pruvolve 38%  husi  kustu  tal US$333,759.84.

Lee Mós: Balada Unip.Lda Abandona Projetu Estrada ho Kustu US$333,759.84 iha Aldeia Rita-Maubisse

Projetu estrada ne’ebé la kontinua ka abandona husi kompañia Balada. Foto/Juvinal Cabral dos Santos

“Iha loron 04 Maiu 2026, ami bolu  hotu kompañia ne’ebé kaer projetu iha munisípiu Ainaro, liu-liu ba projetu sira ne’ebé iha liña ministeriais no fundu infrastrutura ne’e, inklui mós kompañia Balada Unipessoal.Lda hodi ko’alia kona-ba servisu ne’ebé paradu atualmente projetu ne’e foin atinje 40%,” Adriano Amado Tilman informa ba Hatutan.com via telefone, Segunda (04/05/2026).

Nia informa, iha sorumutu ne’e  sira mós rona husi Diretór kompañia Balada Unip.Lda   tuir preokupasaun ne’ebé Diretór kompañia hato’o katak durante ne’e nia servisu paradu iha tinan kotuk tanba dalan parte pouzada nia kotu hela, entaun susar para nia atu transporta nia matérial ba iha terenu.

Parte segundu, kompañia Balada mós preokuopa kondisaun klima mak afeita liu nia servisu. Terseiru, nia ko’alia mós kona-bá nia kontratu ne’e mate nia halo hela karta pedidu estensaun tempu ba iha ministériu relevante, maibé karta estensaun ne’e seidauk halo, ho nune’e mak nia servisu ne’e sei paradu.

“Hanesan Koordenador Munisípiu Ainaro ho tékniku sira iha ne’e, ami bolu sira mai para rona sira nia preokupasaun sira ne’e. No liuhusi preokupasaun ne’ebé mak sira hato’o, Segunda ha’u sei relata fali relatóriu husi enkontru ba iha Nasionál para atu bele foti medida ruma oinsá mak sira nia servisu ne’e ita bele extende ba oin para bele konklui projetu ne’e ba 100%  ka husi superior sira foti medida ruma para atu apara servisu ne’e,” Koordenador Infrastrutura Munisípiu Ainaro esplika.

Nia hatutan, tanba entermu tékniku ne’e progresu servisu kompañia Balada ninian ne’e estadu seidauk selu to’o 100% estadu foin selu de’it kuaze 38%, selu ona ba nia tuir servisu ne’ebé nia halo iha terenu.

“Entaun husi orsamentu sira ne’e estadu seidauk selu barak, ita selu bazeia bá item servisu ne’ebé nia halo, buat ida ne’ebé mak nia seidauk halo ne’e estadu seidauk selu. Entaun, husi ami nia haree katak balansu orsamentu ba servisu ne’e sei barak ne’e mak ita bolu fali sira mai para atu rona preokupasaun husi kompañia sira nian, depois ita hato’o tutan ba ita-nia superior sira liuhusi superior sira mak bele foti medida ruma bazeia ba rezultadu husi ita nia enkontru sira ne’e “, Adriano Amado Tilman informa.

Nia afirma, husi sira nia suprevizaun ne’e sira nota hela iha terenu katak servisu ne’e paradu. Ho ida ne’e mak bolu Diretór kompañia Balada hodi hato’o justifikasaun katak nia prontu para atu hala’o fali nia servisu ne’e to’o remata,  maibé depende ba desizaun ikus husi superior sira atu halo estensaun ba nia servisu ka oinsá.

Nia esplika, ko’alia kona-ba tékniku nian iha Obras Publika ne’e entidade lubuk ida mak halo auto kontrolu ba ninia kualidade entaun iha munisípiu no nasionál ninia finalidade ne’e to’o iha aldeia.

“Item servisu ne’ebé ita nia tékniku sira haree katak la kualidade ida ne’e ita fiar katak estadu sei la selu, ho nune’e mak servisu iha terenu ne’e kompañia Balada Unip.Lda nia kuaze halo 40% resin ona, maibé estadu foin selu de’it 38% ne’e bazeia ba rezultadu katak iha buat balun seidauk selu la merese selu, iha buat balun ne’ebé bele selu mak foin selu,” Adriano Amado Tilman Informa .

Jornalista: Juvinal Cabral dos Santos