Hatutan.com, (27 Maiu 2026), Díli– Rekrutamentu foun bá kadetes Polísia Nasionál Timor-Leste (PNTL) sei aumenta husi na’in-400 bá na’in-750.

Ministru Interiól, Francisco da Costa Guterres. Foto/Dok.Juvinal Cabral dos Santos

Ministru Interiór (MI), Francisco da Costa Guterres, hateten bá  Jornalista, Kuarta (27/05/2026), katak rekrutamentu foun bá kadetas PNTL  antes ne’e na’in-400, maibé agora  presiza kandidatu hamutuk  na’in-750.

“Ita iha orsamentu tanba aumentu númeru, la’ós 400 maibé ba ona 750 tanba ne’e mak ita iha orsamentu uituan, tau hodi bele halo rekrutamentu foun,” Ministru Interiór Francisco da  Costa Guterres konfirma.

Membru Governu hateten, Governu aloká ona Orsamentu Jerál Estadu 2026  hamutuk millaun US$1 bá iha prosesu rekrutamentu foun kadetas PNTL.

“Orsamentu ita maismenus tau millaun $1  ba sira, iha rekrutamentu foun, orsamentu  antes ne’e laiha prosesu tanba ita la lakon buat barak ona, foun ne’e mak ita presiza tan tanba ita aumenta tán farda ba sira,” nia tenik.

Nia afirma razaun aumenta númeru kadeta PNTL foun husi 400 ba iha 750, tanba unidade polísia barak mak nia membru idade 50 bá leten,  kestaun fronteira  presiza polísia joven sira tanba daudaun ne’e maioria katuas. Sira ho idade 50 kuaze ladun aguenta ho operasionál iha liña fronteira sira.

“Agora ita prezisa foin-sa’e ba iha ne’ebá, sira iha ne’ebá idade 50 hotu ona, sira labele halo patrullamentu loro-loron . Entaun ita presiza rekutamentu foun ne’e hodi ba troka fali sira katuas,” Ministru Francisco da Costa Guterres hateten.

Nia esplika kadetes foun, ne’e tenke idade entre  18, 19   no 20  fó treinu para sira mós bele  sa’e ró halo patrullamentu iha tasi laran mós sei lori ró no mós unidade espesiál ne’e presiza tebe-tebes rekursu umanu.

Ministru Interiór, Francisco da Costa Guterres, konfirma mós katak Governu sei envolve entidade oin-oin iha prosesu rekrutamentu kadetas foun PNTL hodi garante transparánsia no kredibilidade iha prosesu tomak.

Tuir Ministru Interiór, prosesu rekrutamentu daudaun la’o tiha ona no juri sira mós konstitui ona. Agora tama ona iha etapa revizaun dokumentál antes kontinua bá prosesu seluk.

“Juri mak sei halo revizaun no Komandu Jerál PNTL mak akompaña. Ami espera katak iha fulan rua ka tolu nia laran bele iha ona ajente foun sira. Agora data loos seidauk defini hotu tanba ami presiza rezolve uluk prosesu baze legal sira,” Francisco da Costa Guterres tenik.

Nia espliká katak Governu kompleta ona preparasaun baze legál no despaxu ministeriál kona-bá regulamentasaun bá prosesu rekrutamentu ne’e. Komisaun rekrutamentu mós forma ona no agora hein de’it prosesu téknika sira atu kontinua.

Ministru Interiór hateten juri ba rekrutamentu ne’e kompostu husi ofisiál dirijente rua husi PNTL, ne’ebé ida sei nomeia hanesan prezidente juri. Aleinde ne’e, juri internasionál sira mós sei envolve, inklui ema rua husi Austrália no ema rua husi Portugal.

Nia adianta,  teste sira sei uza sistema eletrónika ne’ebé bele hatudu kedas rezultadu bá kandidatu sira. Maibé, prosesu ne’e sei nafatin iha etapa revizaun no monitorizasaun hosi komisaun fiskalizasaun ne’ebé kompostu husi entidade oin-oin.

“Ita mós husu ba Provedoria dos Direitos Humanos e Justiça no entidade seluk atu akompaña besik prosesu ida-ne’e. Komisaun rekrutamentu iha  Komandu Jerál PNTL nia supervizaun, maibé sei hetan supervizaun ho rigor  husi instituisaun oin-oin. Prezidénsia, komunidade no jornalista sira mós bele tau matan,” nia tenik.

Nia akressenta tan katak membru Parlamentu Nasionál mós sei halo supervizaun no fiskalizasaun ketak ba prosesu rekrutamentu kadetas foun PNTL, hodi asegura katak prosesu ne’e la’o ho di’ak no transparente.

Jornalista: Marcelino Tomae