Hatutan.com, (19 Juñu 2026), Kazan–Prezidente Rusia, Vladimir Putin, espresa Rusia nia prontidaun atu estabelese  kooperasaun bilaterál ho Timor-Leste (TL) iha área oioin.

PM Xanana halo enkontru ho Prezidente Rusia, Vladimir Putin iha ámbitu Simeira Komemorativa ASEAN–Rúsia bá dala-35 iha Kazan, Rusia. Foto/Média GPM

Putin espresa prontidaun ne’e durante enkontru ho Primeiru-Ministru (PM), Kay Rala Xanana Gusmão iha Kazan, Rusia iha ámbitu Simeira Komemorativa ASEAN–Rúsia bá dala-35.

Vladimir Putin hato’o parabéns bá Timor-Leste (TL) tanba sai membru plenu ASEAN no afirma katak adezaun ne’e sei kontribui bá fortalesimentu pozisaun internasionál Timor-Leste nian.

“Rúsia haree Timor-Leste hanesan parseiru promisor ida iha rejiaun Ázia-Pasífiku no prontu atu habo’ot kooperasaun iha área oioin, inklui enerjia, mina, turizmu, edukasaun no dezenvolvimentu rekursus umanus,” Putin hateten hanesna sita husi komunikadu imprensa.

Prezidente Rúsia mós lembra katak tinan 2027 sei marka aniversáriu tinan 25 relasaun diplomátika entre nasaun rua, no destaka kontribuisaun Rúsia bá programa asisténsia internasionál iha Timor-Leste liu-hosi Programa Alimentár Mundiál no partisipasaun iha misaun Nasoins Unidas nian.

Iha momentu hanesan Primeiru-Ministru, Kay Rala Xanana Gusmão hato’o vontade Timor-Leste nian atu fortalese kooperasaun bilaterál ho Rúsia.

Durante intervensaun, Primeiru-Ministru Xanana Gusmão agradese bá hospitalidade Governu Rúsia nian no konsidera partisipasaun Timor-Leste iha Simeira ASEAN–Rúsia hanesan membru plenu ASEAN bá dahuluk nu’udár momentu istó¬riku bá nasaun.

“Timor-Leste valoriza relasaun ho Rúsia no hakarak haree kooperasaun bilaterál sai forte liu-tán iha futuru,” Xanana Gusmão hateten.

Primeiru-Ministru mós hato’o katak Timor-Leste sei kontinua esforsu atu dezenvolve ekonomia nasionál, fortalese instituisaun sira no kria oportunidade bá povu.

Tanba ne’e, Governu Timor-Leste simu ho di’ak investimentu hosi Rúsia, liu-liu iha área sira ne’ebé bele kontribui bá kriasaun empregu no dezenvolvimentu rekursus umanus.

Xanana Gusmão revela katak Timor-Leste espera atu loke embaixada iha Moscovo iha futuru no mós simu ho laran lua bainhira Rúsia konsidera atu estabelese embaixada ida iha Dili.

Ministériu negósius estranjeirus hosi nasaun rua hahú ona diskusaun preliminár kona-bá akordu bilaterál balun ne’ebé bele aprofunda relasaun no kooperasaun entre parte rua.

Primeiru-Ministru reafirma mós kompromisu Timor-Leste nian hanesan membru foun ASEAN atu kontribui bá unidade ASEAN nian, estabilidade rejionál, diálogu konstrutivu no respeitu bá lei internasionál.

Simeira Komemorativa ASEAN–Rúsia iha Kazan halibur lider sira hosi ASEAN no Rúsia atu diskute kooperasaun estratéjika, komérsiu, investimentu, seguransa, enerjia, sientia no asuntu importante sira ne’ebé afeta rejiaun no mundu.

Jornalista: Juvinal Cabral dos Santos