Hatutan.com, (26 Juñu 2026) Díli-Porta-vóz Polísia Nasionál Timor-Leste (PNTL), Superintendente-Xefe Polísia, João Belo dos Reis, informa, Polísia subemete  ona suspeitu Indianu na’in-haat ba Ministeriu Públiku (MP) ne’ebé alegamente envolve iha krime trafiku umanu iha Timor-Leste.

Lee Mós: Índianu Na’in-33 Suspeita Ba Vitíma Tráfiku Umanu iha Timor-Leste

Índianu na’in-33 ne’ebé suspeita ba vitíma tráfiku umanu. Foto/Juvinal Cabral dos Santos

Iha Kuarta 17 Juñu 2026, PNTL asegura Indianu na’in-33 tanba empreza Simrn Kour Vijay Enterprise, Lda bosok sira atu mai servisu iha Timor-Leste.

Hafoin PNTL asegura Indianu na’in-33 no halo kedas identifikasaun, katak Indianu na’in-haat ne’ebé mak suspeitadu envolve iha krime tráfiku umanu. Nune’e PNTL aprezenta tiha ona ba Ministériu Públiku (MP) atu kontinua prosesu legal tuir lei mak vigora.

“Kazu kona-ba Indianu na’in-33, antes ne’e ita asegura na’in-haat,  ita identifika ona hanesan suspeitu ba tráfiku umanu ne’ebé ita aprezenta ona ba Ministériu Públiku hodi prosesu tuir lei,” Portavós PNTL, Superintendente-Xefe Polísia João Belo dos Reis, informa,  Kinta (25/06/2026).

Tuir Porta-vóz Komandu Jerál PNTL katak parte polísia mós detein kompañia nain na’in-rua  no identifika envolvimentu husi Timoroan balun ne’ebé suspeita partisipa iha prosesu transportasaun, akomodasaun, promesa servisu no propaganda atu lori sidadaun sira mai Timor-Leste.

“Ne’ebé ema hotu ne’ebé suspeita iha ligasaun ho atividade refere sei submete ba Ministériu Públiku hodi halo investigasaun kle’an liu,” nia dehan.

Autoridade sira identifika fatin ajénsia nia rua ne’ebé suspeita utiliza ba negósiu refere, maibé investigasaun sei kontinua atu determina atividade ne’e ilegál ka lae.

Sidadaun Indianu sira ne’ebé konsidera sai vítima ba krime trafiku umanu ne’e kontaktu ona ho sira-nia família no embaixada Índia ba Timor-Leste, no hela temporariamente iha área Becora hodi hein rezultadu investigasaun.

Jornalista : Juvinal Cabral dos Santos