Hatutan.com, (14 Jullu 2026) Díli-Provedór Direitus Humanos no Justisa (PDHJ), Virgílio da Silva Guterres “Lamukan” husu  Polísia Nasionál Timor-Leste (PNTL), Polísia Sientífika Investigasaun Kriminál (PCIC -Sigla Portugés)  ho Ministériu Públiku (MP) atu halo investigasaun  sériu, labele ‘Pilih kasih’ ba   parte sira envolve iha polémika aterra jet privadu ho tipu Cessna  Citation 700 Longitude (C700) iha Aeroportu Internasionál Prezidente Nicolau Lobato (AIPNL), Kuarta, 01 Jullu 2026.

Lee Mós: Parte Sira Fasilita Aterra Jet Privadu Cessna C700 iha AIPNL Presta Ona Deklarasaun no Hein Submete bá MP

Provedór Virgílio da Silva Guterres “Lamukan” (klaran) fó sia PDHJ nia pozisaun kona-bá polemika Jet Privadu ne’ebé aterra iha Timor-Leste, 01 Jullu 2026. Foto/Juvinal Cabral dos Santos

Provedór Virgílio da Silva Guterres “Lamukan” hateten, kona-bá aviaun Jet Privadu ne’ebé parte sira  involve ne’e kazu sériu entrega ba iha parte sira ne’ebé halo investigasaun atu averigua. Tanba agora ne’e foin informasaun, dalaruma média sira iha ona informasaun ne’ebé klaru, maibé atu ba justisa nian ne’e entidades sira ne’ebé responsavel, Polísia Nasionál Timor-Leste (PNTL) no Polísia Sientifika Investigasaun Kriminál (PCIC-sigla Portugues)  sira buka  hatene.

“Kualker involvimetu ita nia kompeténsia hanesan funsionáriu públiku atu halo buat ne’ebé la tuir ita nia tarefa, la tuir rekezitu Leí nian ne’e viola ka kontra prinsipiu sira ne’ebé establese atu guia ita ne’e. Mais ha’u seidauk bele hato’o detallu tanba ita nia entidade área justisa mak halo investigasaun, importante mak ita ejizi katak prosesu investigasaun labele ‘pilih kasih’ labele dehan ha’u nia maun ka ha’u nia primu ne’ebá,” Provedór Virgilio da Silva Guterres “Lamukan”  hateten liuhusi Konferensia Imprensa, Tersa (14/07/2026).

PDHJ informa, investigasaun tenke rigor tanba kazu ida-ne’e ho sériu, investiga sériu atu hatene loloos involvimetu funsionariu públiku balun uja ninia pozisaun envolve iha laran, ne’e investiga la’o para ema sira ne’e responsaviliza ba aktu ne’ebé nia komete.

Fó hanoin fali katak parte kompetente sira husi Ministériu Transporte no Komunikasaun (MTK), Ministériu Negosiu Estránjeiru no Kooperasaun (MNEK) ho Autoridade Aviasaun Sivíl Timor-Leste (AACTL-sigla portugés), inklui Ajénsia CEVA Logistics, presta ona deklarasaun iha  Polísia Nasionál Timor-Leste (PNTL) relativa ho polémika aterrazen jet privadu ho tipu Cesna  Citation 700 Longitude (C700) iha Aeroportu Internasionál Prezidente Nicolau Lobato (AIPNL).

Jornalista: Juvinal Cabral dos Santos