Reportajen: Felix Fernandes

 Hatutan.com, (24 Setembru 2026), Díli– Fiskalizasaun husi Komisaun E  Parlamentu Nasionál ba projetu espansaun Aeroportu Internasionál Prezidente Nicolau Lobato husi PT Waskita Karya atraza.

Progresu servisu iha terrenu Aeroportu Internasionál Prezidente Nicolau Lobato, Kinta (24/09/2026). Foto/ANATL,I.P

Komisaun E ne’ebé trata asuntu Infraestrutura nia prezidente, Deputadu Marcos Xavier, informa iha fulan hirak liubá sira-nia parte husi komisaun E halo fiskalizasaun ba projetu ne’e hodi  haree katak kompaña estatál Indonézia nian  (Wakita Karya) ne’ebé kaer projetu ne’e prosesu la’o atraza ka lentu.

“Projetu ne’e la’o lentu duni, maibé razaun husi kompaña kaer obra ne’e katak  tanba ita iha iha Aeroportu Internasionál ida de’it, entaun aviaun loro-loron tuun-sa’e entaun sira haree espasu ne’ebé iha sira labele halo servisu ho di’ak,” Preizdente Komisaun E PN, Marcos Xavier hateten hodi responde jornalista sira iha PN, Kinta (24/09/2026).

Deputadu Marcos Xavier konfirma mós katak Komisaun E sei ba halo fali tán fiskalizasaun ba projetu Aeroportu Internasionál Prezidente  Nicolau Lobato hodi haré nia progresu no nia persentajen.

 “Sé ba fiskalizasaun mak nafatin kontinua hanesan ne’e, ami sei bolu Ministru Transporte no Komunikasaun atu bele relata.  Sé PT Waskita Karya laiha kbiit atu halo ona bele kansela nia kontratu, ita presiza Aeroportu ne’ebé mak di’ak para aviaun mai tuun iha ita nia rai,” Deputadu Marcos Xavier afirma.

Deputadu ne’e adianta Komisaun E sei rekomenda ba MTK no Pt WAskita Karya atu aumenta tán traballadór sira hodi bele aselera servisu nune’e bele finaliza tuir tempu kontratu iha Marsu 2028.

Projetu espansaun aeroportu internasionál Prezidente Nicolau Lobato ne’ebé pertense ba PT Waskita Karya ho nia kustu valor kontratu millaun US$72.5.

Projetu konstrusaun Aeroportu Internasionál Prezidente Nicolau Lobato, hanesan projetu estratéjiku nasionál ne’ebé envolve parseiru internasionál prinsipál tolu mak hanesan JICA kontribui ho subsídiu ida millaun Yen37,5 ba konstrusaun edifísiu terminál pasajeiru modernu ida ne’ebé amigavel.

Projetu ho investimentu previstu millaun US$239  parseria ho Banku Aziátiku Dezenvolvimentu (ADB), Ajénsia Kooperasaun Internasionál Japaun (JICA), no Governu Austrália liuhosi Australian Infrastructure Financing Facility for the Pacific (AIFFP).

Projetu modernizasaun Aeroportu Internasionál Prezidente Nicolau Lobato ne’e  maka pista no taxiways foun, área estasionamentu ba aviaun, torre  kontrolu no estasionamentu pasajeiru.

Ministeriu Transporte no Komunikasaun  (MTK) halo ona avaliasaun ba konstrusaun Aeroportu Internasional Prezidente Nicolau Lobato ne’ebé pertense ba PT Waskita Karya  foin atinje 10%. Ho nune ‘e, governu sei hola medida nesesariu atu garante obra ne’e remata tuir tempu ne ‘ebe determina ona. (*)