Hatutan.com, (10 Janeiru 2022), Díli—Partidu Democrático (PD), sei hili entre atuál Prezidente PD Mariano Assanami Sabino ho Prezidente Conselho Politico Nacional (CPN), Adriano do Nascimento, liu hosi Konvensaun nasionál iha 15 Janeiru atu  reprezenta Partidu ne’e nu’udár kandidatu iha eleisaun Prezidensiál 2022.

Kuadru Superiór PD realiza konferénsia imprensa iha Sede nasionál Colmera, Segunda (10/01/2022). Foto/Hatutan.com.

Sektretáriu Jerál PD, António da Conceição “Kalohan” hateten, atu haburas no hametin demokrasia iha Timor-Leste (TL) maka PD hakarak ofisialmente anunsia partisipasaun ho nia kandidatu ne’ebé  preparadu atu konkorre iha Eleisaun Prezidensiál.

Notisia iha Relasaun:Parpol Sira Propoin Lú Olo Kumpre De’it Konstituisaun, FRETILIN Husu Tetu ho Saúde Públika

“Entre líder PD na’in-rua ne’e, ida mak militante no simpatizante sira hili, ami hotu hanesan kuadru superuiór submete ba desizaun, tanba ida-ne’e mak prinsípiu loloos hosi demokrasia,” Kalohan hateten iha sede sentrál Colmera, Segunda (10/01/2022).

Kandidatu rua ne’e sei hala’o debate iha 15 Janeiru, hodi aprezenta vizaun nu’udár Prezidente Repúblika ba partisipante konvensaun nasionál ne’e, hodi hili demokratikamente na’in-ida nu’udár Kandidatu Nasionál ne’ebé sei kompete ho kandidatu seluk iha eleisaun Prezidensiál 2022-2027.

Ho aprezentasaun kandidatu rua ne’ebé sei kompete iha  konvensaun nasionál ne’e, la signifika PD nakfera ou fahe ba rua, maibé tanba natureza demokrasia mak hanorin atu iha kompetisaun ida saudável, hodi hanorin mós povu kona-bá lala’ok prosesu demokratizasaun.

“Ami sempre diferensa iha ideias maibé unidade iha rezultadu. Tanba ne’e, kandidatu sira ne’ebé PD iha nu’udár demostrasaun demokrátika ne’ebé eziste desde PD iha,” Kalohan subliña.

Nune’e mós Prezidente PD Mariano Assanami Sabino, hateten PD iha devér no prontu ba Estadu iha kualkér situasaun tanba ne’e PD nia kandidatura nu’udár povu nia kandidatura atu sai Prezidente ba povu.

“PD oferese nia ema sai kandidatura povu nia atu sai Prezidente ba povu no kumpri kompromisu ho povu,” Assanami hateten.

Alende ne’e, Adriano do Nascimento, hateten PD iha kandidatu rua atu dinamiza demokrasia iha partidu laran ho prinsipiu prontu atu servi.

“La iha dalan ka hanoin ida katak ida manan ka ida lakon, lakon ou manan ne’e lider partidu demokrátiku,” Adriano hateten.

PD iha mekanizmu rasik atu hetan kandidatura liu hosi konvensaun nasionál ne’ebé konsellu superior halo.

Iha loron 06 to’o 07 fulan ne’e, Prezidente Repúblik, Francisco Guterres Lú Olo, hala’o ona reuniaun ho partidu polítiku sira ne’ebé hetan asentu iha Parlamentu Nasionál (PN), hodi rona sira nia hanoin molok dekreta kalendáriu eleisaun Prezidensiál 2022-2027.

Jornalista: Vito Salvador