Hatutan.com (10 Janeiru 2022) Díli—Tribunál Distritál Díli (TDD), iha Segunda loron 10 fulan ne’e, hala’o primeiru julgamentu ba krime maus tratus, ne’ebé involve arguida Maria Madalena de Fátima, tanba lori tudik no alkati baku nia subriña lezada Talita Fátima Thilraj, ho idade 13.

Iha audiénsia arguida rekoñese baku lezada uza tudik ho alkati, maibé tanba lezada nauk $15 ne’ebé mai hosi faan modo.

Iha sorin seluk, lezada deklara katak nia parte la nauk arguida nia osan, maibé tanba de’it uma laran foer maka arguida baku lezada to’o lezada halai ba hela iha uma mahon.

Lezada haktuir, arguida baku uza martelu, tudik no alkati hodi habit no ta’a lezada nia isin lolon to’o kanek, tanba ne’e maski arguida husu deskulpa ba lezada maibé lezada lakohi simu.

Antes ne’e, lezada hela iha uma mahon iha Viqueque no daudaun lezada hela ho viziñu de’it hodi ba eskola.

Hafoin rona arguida no lezada, Tribunál adi’a hikas julgamentu ba loron seluk atu bele kontinua iha alegasaun.

Antes ne’e, tuir akuzasaun ne’ebé iha katak, iha tinan 2019, kuaze tuku 22:00 otl, iha arguida nia uma aldeia Au-hun, Suku Becora, arguida lori aí  hodi baku dala ida iha lezada nia liman parte loos, kontinua foti tudik no lori baku iha lezada nia liman karuk, arguida kontinua foti alkati hodi habit dala tolu iha lezada nia kelen loos rezulta kanek no ran.

Ho hahalok arguida nian, Ministériu Públiku akuza arguida ba prátika krime maus tratus ne’ebé previstu iha artigu 155 hosi kódigu penál Timor-Leste.

Audiénsia julgamentu prezide hosi juíz koletivu Alvaro Maria Freitas, José Gonçalves, Argentino Nunes, MP reprezenta hosi Prokuradór Jacinto Babo no arguida hetan asisténsia legál hosi Defensór Públiku Manuel Exposto.

Jornalista: Carmelita Isaac