Hatutan (21 Janeiru 2022) Díli—Tribunál Distritál Díli (TDD) iha Sesta loron 21 fulan ne’e, liu hosi leitura sentensa ne’ebé lee sai hosi juiz Alvaro Maria Freitas, deside aplika pena prizaun tinan ida ho balun no suspende tinan rua ba arguidu na’in lima, Lúcia Correia, Jacinto da Costa Soares, António Gilbert Manuel da Silva Bras, Júlio Ranger Hornai no Lúcio Bere Taci dos Santos.

Sala Julgamentu TDD. Foto/Hatutan.com.

Alende ne’e, aplika mós pena prizaun tinan rua suspende tinan tolu ba arguidu na’in-tolu mak hanesan Mateus Wilfridos dos Santos Tallho, Rogerio Araujo Mendonça, Juvinal Sena do Rego no pena prizaun fulan tolu suspende tinan ida ba arguidu, Ildefonso da Rosa no Manuel Noronha.

Pena suspensaun ba funsionáriu na’in-10 ne’e, relasiona ho kazu falsifikasaun asinatura MoP ba funsionáriu SEPFOPE na’in 36 no inventa nota ba fornesimentu materiál eskritóriu ba Sekretária Estadu Formasaun Profisionál no Empregu (SEFOPE) Munisipiu Liquiça, Aileu no Manatuto ne’ebé fó prezuizu ba Estadu ho montante $23.654.

Razaun Tribunál aplika pena suspensaun ne’e, tanba maski provadu bazeia ba deklarasaun arguidu sira nian durante julgamentu, maibé Tribunál konsidera sirkunstánsia ne’ebé iha liu-liu arguidu sira devolve ona osan ho montante rihun $15, no arguidu sira konfesa no foin primeira vez ba hatan iha Tribunál.

Antes ne’e, tuir akuzasaun ne’ebé iha katak arguidu na’in-sanulu hanesan mós funsionáriu públiku SEFOPE, maibé iha tinan 2016 Inspesaun Jerál Estadu hala’o inspesaun iha ambitu utilizasaun fundus adiantamentu ho montante $386.117,ne’ebé kolokadu iha SEFOPE.

Durante Inspesaun detekta katak, utilizasaun despezas refere Ia tuir planu no atividade iha dirasaun 14 SEFOPE no utilizasaun fundus $28.339.97.

Diresaun 14 hato’o proposta fundus adiantamentu ba iha Dirasaun Nasionál Administrasaun no Finansas— SEFOPE-Dili, atu apoia atividade iha Munisipiu hanesan pagamentu viajen nomós gastu ba sosa sasan eskritóriu inklui alimentsaun, depois implementasaun submete relatóriu kona-bá gastu fundus refere ba iha DNAF- SEFOPE.

Arguidu sira hanesan Lucia Correia (Diresaun SEFOPE Munisipiu Liquiça) Jacinto da Costa Soares (Diresaun SEFOPE Munisipiu Aileu, Atonio Gilbert Manuel da Silva (Diresaun SEFOPE Munisipiu Manatutu) Mateus Wilfridos dos Santos Talho (DNAF), Rogerio Araujo Mendonça (DNAF), Juvinal Sena do Rego (DNAF), Julio Ranger Hornai (DNAPE), Lucio Bere Taci dos Santos (DNAPE), Ildefonso da Rosa (GIA) no Manuel Noronha (GIA) apropria tia osan refere ho meius falsifikasaun asinatura nomós valor sasan ne’ebé sosa, hanesan tuir mai:

Arguidu Lucio Bere Táci dos Santos nomós arguidu Julio Rangel Hornai, iha Diresaun Nacional da Politica do Emprego (DNPE), falsifika asinatura funsionáriu SEFOPE, na’in 14 iha dokumentus MoP nomós asinatura iha lista perdiem hosi Munisipiu Dili ba rurais, hodi bele hasai fundus adiantamentu ho montante $ 2.040.

Iha sorin seluk arguidu Rogerio Araüio Mendonsa, Mateus Wilfridos dos Santos Tallho, no Juvinal Sena do Rego, falsifika assinatura iha dokumentus MoP partense ba funsionariu SEFOPE na’in 22 dala 124 no assinatura iha lista perdiem hosi Dili ba area rurais ho funsionariu la hanesan, hodi hasai fundus adiantamentu ho montante $15.400, maibé funsionáriu sira la halo viajen no la simu osan perdiem.

Arguidu Lucia Correia hanesan Pontu Fokal SEFOPE Luiquiça inventa valor ba kada materia eskritoriu, operasional no seluk tan, inklui inventa naran loja ne’ebé maka fornese sasan ba iha SEFOPE Munisipiu Liquiça, hodi hasai osan ho montante $1.813.

Arguidu Jacinto da Costa Soarcs, nu’udár Kordenadór Munisipiu Aileu iha Diresaun Adminitrasaun no Finansas munisipiu Aileu, inventa valor ba kada materia eskritoriu, hodi haruka nia estaf Paulina hodi prienxe no inventa sasan inklui valor nomós maioria nota laiha asinatura hosi vendedór, ho intesaun hodi hasai osan Estadu ho montante $2.031.

Arguidu Antonio Gilberto Manuel da Silva Braz, nu’udár pontu fokal SEFOPE iha munisipiu Manatuto, depois de sosa material eskritoriu arguidu hosi rasik nota hodi peienxe hodi inventa sasan no valor ne’ebé asinatura hosi vendedór, ho intesaun hasai osan Estadu ho montante $ 2.250.

Arguidu Idelfino da Rosa no Manuel Noronho, falsifika relatóriu kona-bá gastu fundus adiantamentu ba MoP ba funsionáriu hanesan ne’ebé halo viajen iha loron,fulan,tinan hanesan maibé munisipiu mak la hanesan ho intensaun hodi justifika de’it iha relatóriu kona-bá utilizasaun fundus adiantamentu ho intensaun hasai osan Estadu ho montante $120.

Ho hahalok arguidu sira nian fó prezuizu ba Estadu ho montante $23.654, tanba ne’e Ministériu Publiku akuza arguidu sira ba pratika krime pekulatu ne’ebé previstu iha artigu 195 hosi kódigu penál TL.

Audiénsia julgamentu ne’e prezide hosi juiz koletivu Alvaro Maria Freitas, José Gonçalves, Argentino Nunes, MP reprezenta hosi Lidia Soares no arguidu hetan asisténsia legál hosi advogadu privadu.

Jornalista: Carmelita Isaac