Hatutan.com (17 Juñu 2022), Díli—Diresaun Nasionál Terras no Propriedade (DNTP) rejista rai 370.000 parsela, iha disputa nia laran 42.000 no laiha disputa 328.000 iha Timor Leste.

Rai Estadu balun iha área Bebonuk, Díli, ne’ebé Estadu estabelese kontratu arrendamentu ho empreza balun maibé to’o agora abandonadu. Foto/Hatutan.com

Dadus ne’e iha ona DNTP bazeia ba levantamentu hosi projetu Servisu Nasionál Cadastro (SNC) iha Munisípiu 13 inklui Rejiaun Administrativa Espesiál Oecusse Ambeno (RAEOA), iha tinan 2003.

Lee Mós: Empreza 3,726 halo kontratu arrendamentu rai Estadu, barak abandonadu

“Totál rai bazeia ba dokumentus Portugés no Indonézia inklui hirak ne’ebé voluntariamente fa’an no sosa. DNTP laiha númeru definitive, tanba ema seidauk lori mai rejistu. Maibé liu hosi projetu SNC ne’ebé halo levantamentu dadus ba rai iha tinan 2003, rejistu rai mais ou menus 370.000 parsela no iha disputa nia laran hamutuk 42.000 no laiha disputa 328.000,” Diretór Jerál Terras no Propriedade, Rodrigo de Mendonça hateten ba Hatutan.com iha knar fatin Mandarin, Sesta (17/06/2022).

Hosi númeru ne’e, rai ne’ebé rejistu no laiha disputa mak sei iha direitu atu hetan sertifikadu rejistu hosi DNTP bainhira Dekretu Lei Informasaun Kadastral Prediál hetan promulgasaun hosi Prezidente Repúblika (PR), tanba antes ne’e hetan ona aprovasaun iha Konsellu Ministru (KM).

DNTP sujere atu konsidera direitu primária no diretu sekundáriu sidadaun nian hodi bele fó konsiderasaun ba dokumentu rai iha tempu Portugés no Indonézia, nune’e fásil hodi atribui sertifikadu títulu rai ho kategoria direitu primária no sekundáriu, tanba tenki iha artigu ida hosi dekretu lei ne’ebé ko’alia kona-bá dokumentu rai nian ne’ebé prienxe rekezitus hodi atribui sertifikadu titulu rai.

Maibé bainhira dekretu lei ne’e ko’alia jerál de’it no laiha artigu balun ne’ebé define kona-bá rekezitu hetan sertifikadu titulu rai, maka DNTP sei atribui uluk sertifikadu rejistu de’it hodi hein lei komplementár.

Bainhira dekretu lei ne’e fó dalan, maka bele atribui sertifikadu titulu rai hodi fó konsiderasaun ba dokumentu iha tempu Portugés no Indonézia.

Iha sorin seluk, Ministru Justisa Tiago Amaral Sarmento hateten liu hosi Dekretu lei Informasaun Kadastral prediál ne’e sei hamosu regras no diploma ministeriál hodi atribui sertifikadu na’in ba rai.

“Ukun a’an tinan 20 ona sidadaun hotu-hotu seidauk goza direitu ba rai. Maibé diploma legál ne’e sei rezolve problema refere no sei fahe uluk sertifikadu ba sidadaun ne’ebé sira nia rai laiha disputa bazeia ba dadus ne’ebé rejista ona iha SNC,” Tiago Amaral Sarmento hateten.

Ho sertifikadu na’in ba rai ne’e bele fasilita sidadaun asesu ba kréditu iha Banku no Governu sei fasilita kréditu suável, ne’ebé ho funan ki’ik no ema hotu-hotu bele asesu.

Jornalista: Carmelita Isaac