Hatutan.com, (12 Jullu 2022), Díli-Polísia Nasionál Timor-Leste (PNTL) Munisípiu Díli, liuhosi Eskuadra Cristo Rei, detein autór na’in-lima (5) iha sela detensaun  tanba involve iha kazu konfrontu ka tuda-malu iha área Semitériu públiku Becusse, Suku Becora, Postu Administrativu Cristo Rei, Munisípiu Díli.

Komandante PNTL Munisípiu Díli, Superintendente Xefe Henrique da Costa. Foto/Hatutan.com

Komandante PNTL Munisípiu Díli, Superintendente Xefe Henrique da Costa, informa,  konfrontu ne’e akontese iha Segunda (11/07/2022), hale’u tuku 01:00 madrugada, iha Semitériu Becusse.

PNTL Munisípiu Dili, simu informasaun hosi ekipa servisu sekreta sira, no orienta kedan ekipa patrullamentu Cristo Rei, Forsa Rezerva, Servisu Informasaun Polísia (SIP), inklui hetan mós apoiu hosi Servisu Nasionál Intelijénsia (SNI), ho servisu intelijénsia militár (J2), hodi halo kedan atuasaun.

Iha konfrontu ne’e, involve númeru ema ne’ebé barak (masa), nune’e ekipa sira ne’ebé halo patrulla, konsege lansa gás bá iha joven sira ne’ebé mak halo konfrontu hodi hafahe sira.

“Ami  kaptura autór  na’in-lima,  mesak mane hotu, iha fatin ne’ebá, no lori kedas bá iha eskuadra investigasaun Cristo Rei nian, para atu nune’e hodi prosesu. Superintendente Xefe Polisia, Henrique da Costa, informa ba jornalista sira, iha kna’ar fatin, Caicoli, Díli, Tersa (12/07/2022).

Tuir informasaun inisiál PNTL hetan hosi terrenu katak, joven sira ne’ebé involve iha kazu insidente ne’e, mai hosi membru Grupu Arte Marsiál (GAM), Persaudaraan Setia Hati Terrate (PSHT) ho Grupu Arte Rituál (GAR), Hitu-hitu (77). Maibé, oras ne’e, parte investigasaun iha Eskuadra PNTL Cristo Rei, halo hela investigasaun bá suspeitu ka autór sira.

“Laiha ema ida maka mate, ka ema ruma kanek grave iha ne’ebá, mais identifika duni katak, sira tuda malu no ataka malu,” informa komandante Henrique.

Jornalista: Rogério Pereira Cárceres