Hatutan.com, (02 Agostu 2022), Díli—Ministru Justisa (MJ), Tiago Amaral Sarmento husu ba Comissão Anti Corrupção (CAC) atu involve iha prosesu kontrolu ba arrendamentu rai Estadu.

Ministru Justisa Tiago Amaral Sarmento simu audiénsia ho Komissáriu CAC, Sérgio Hornai akompaña hosi Komissáriu Adjuntu Prevensaun no Sensibilizasaun, Luis de Oliveira Sampaio no Xefe Unidade Inspeksaun no Monitorizasaun Antonino Alves iha edifísiu Ministériu Justisa Colmera Díli, Segunda (01/08/2022). Foto/CAC.

Ministru Justisa Husu ne’e durante simu audiénsia ho Komissáriu CAC, Sérgio Hornai akompaña hosi Komissáriu Adjuntu Prevensaun no Sensibilizasaun, Luis de Oliveira Sampaio no Xefe Unidade Inspeksaun no Monitorizasaun Antonino Alves iha edifísiu Ministériu Justisa Colmera Díli, Segunda (01/08/2022).

Lee Mós: Empreza Nasionál no Internasionál 20-resin Fa’an no Arrenda Tutan Rai Estadu  

“Ministru Tiago iha ninia interevensaun husu ba Komissáriu Sérgio ho ekipa atu iha nia mandatu tempu badak ne’e hakarak involve mós CAC iha prosesu halo kontrolu, inspeksaun no monitorizasaun ba arrendamentu rai Estadu nian ne’ebé durante ne’e Estadu fó arrenda ba kompaña sira iha territóriu Timor laran, nune’e buka hatene di’ak liu-tán rísku no poténsia sira ba prezuizu Estadu no oinsá halo medida preventive,” Hatutan.com sita komunikadu.

Advertisement

Rezultadu hosi sorumutu ne’e, parte rua konkorda hamutuk sei estabelese Memorandum of Understanding (MoU) entre CAC no MJ hodi hala’o servisu hamutuk iha área intervensaun konjunta iha terrenu balun ne’ebé nesesáriu tuir lei nú. 7/2020-MPCC.

Alende ne’e oinsá Ministériu Justisa bele fasilita treinamentu jurídiku ba Espesialista Anti-Korrupsaun (EAK) foun sira ne’ebé CAC halo hela rekrutamentu.

Durante enkontru ne’e mós Komisáriu Sérgio ho ekipa fó koñesimentu ba Ministru Justisa kona-bá servisu Komisaun nian liu-liu implementasaun Lei Nú.7/2020-MPCC, politika Estratéjia Nasionál Anti-Korrupsaun (ENAK) no implementasaun Rejime Deklarasaun Rendimentu, Bens no Interese (DRBI) ba servidor povu sira.

Komissáriu Sérgio husu apóiu Ministru Tiago nian atu oinsá bele halo armonizasaun ba interpretasaun lei MPCC nune’e, evita hamosu komplikasaun iha nia implementasaun hosi autoridade sira.

Komissáriu Sérgio ko’alia mós ho Ministru Tiago atu halo sensibilizasaun di’ak liu-tán Lei Nú.7/2020-MPCC ba kargu diretór, xefia no funsionáriu sira iha MJ atu bele loke servidór povu sira ninia pensamentu no hasa’e liu-tán koñesimentu hodi sensível ho sistema foun.

Advertisement

Jornalista: Carmelita Isaac