Hatutan.com, (04 Agostu 2022), Díli—Tribunál Distritál Díli (TDD) liu hosi julgamentu kolektivu ne’ebé prezide hosi juiza Maria Solana, Ana Paula Fonseca, Zulmira Auxiliadora hala’o primeiru julgamentu ba krime furtu agravadu ne’ebé deskonfia involve arguidu ho inisiál MJS, tanba na’ok lezada AS nia motór.

Foto ilustrasaun google, kona-bá na’ok motór.

Iha audiénsia, arguidu rekoñese na’ok lezada nia motór, tanba momentu ne’ebá nesesidade mak obriga, maibé molok mai Tribunál arguidu entrega ona osan $1.320 ba lezada.

Lee Mós: Motór Lakon iha Vila Verde, SIP Konsege Hetan iha Baucau

“Ha’u mak na’ok duni tanba nesesidade uma laran mak obrigada. Maibé, prosesu ne’e tama iha Tribunál ha’u mós entrega ona osan $1.320,” Arguidu konfesa.

Hafoin rona arguido, Tribunál adi’a hikas julgamentu ba loron seluk hodi kontinua rona lezada no alegasaun.

Antes ne’e, tuir akuzasaun hosi Ministériu Públiku (MP) ne’ebé reprezenta hosi Prokuradór Jacinto Babo katak, iha loron 23 fulan Jullu 2019 iha tuku 6:00 lorokraik lezada AS entrega motór ida ho marka Mio Beat xapa matrikula 4937 ba RA, tanba lezada sei ba halo servisu iha Maliana.

Maibé, iha loron 26 fulan Jullu 2019, lezada simu informasaun hosi RA katak motór lakon ona, bainhira para hela iha RA nia uma no ikus mai lezada identifika katak, arguidu mak na’ok motór ne’e.

Tanba ne’e, MP akuza arguidu ba prátika krime furtu agravdu ne’ebé previstu iha artigu 252 hosi kódigu penál TL.

Jornalista: Carmelita Isaac