Hatutan.com, (22 Agostu 2022), Díli– Tribunál Distritál Díli (TDD), liu hosi Primeiru Interrogatóriu ne’ebé prezide hosi juiz singulár Argentino Nunes deside aplika medida koasaun Termu Identidade Rezidénsia (TIR) no Aprezentasaun Periódika ba arguidu na’in-rua ho inisiál LC ho JC ne’ebé deskonfia involve iha kazu ilísitu bá droga no iha ligasaun ho arguidu na’in-sia.

Arguidu na’in-rua ne’ebé deskonfia involve iha kazu ilísitu bá droga submete ba Primeiru Interrogatóriu iha Tribunál Distritál Dili, Segunda (22/08/2022). Foto/Hatutan.com.

Iha desizaun ne’e, alende aplika TIR ba arguidu LC, Tribunál mós aplika TIR no aprezentasaun periódika ba arguidu JC hodi aprezenta an kada fulan iha postu Polísia ne’ebé besik.

Lee Mós:TDD Aplika TIR bá Arguidu sira Kazu Ilísitu bá Droga

Razaun Tribunál aplika medida koasaun ne’e, tanba faktus ne’ebé aprezenta la forte, tanba laiha evidénsia ne’ebé bele lori sira ba kondenasaun.

“Bainhira halo buska ba ha’u nia kliente nia hela fatin negativu. Signifika, laiha evidénsia ne’ebé forte, tanba momentu ne’ebá prende de’it mak laptop no telefone tanba buska ne’e bazeia de’it ba informasaun hosi arguidu na’in-sia ne’ebé antes ne’e lori mai ona,” Defensór Públiku, Humberto Alves hateten hafoin desizaun iha TDD, Segunda (22/08/2022).

Maibé ho desizaun ne’e, parte Ministériu Públiku (MP) ne’ebé reprezenta hosi Prokuradór Matias Soares sei haree karik iha posibilidade hodi halo rekursu iha prazu loron 15 nia laran, tanba iha alegasaun MP nian husu ba Tribunál atu aplika medida koasaun prizaun preventiva no TIR.

Iha audiénsia julgamentu ba Primeiru Interrogatóriu ne’e, Ministériu Públiku ne’ebé reprezenta hosi Prokuradór Matias Soares promove arguidu na’in-rua ho krime ilísitu bá droga ne’ebé previstu iha artigu 7 hosi kódigu penál TL no lei 2/2017 kona-bá tráfiku droga.  

Antes ne’e, ekipa konjunta kompostu hosi Servisu Nasionál Intelijénsia (SNI), Ekipa intelijénsia J2 FALINTIL-Forsa Defeza Timor Leste (F-FDTL), ho Polísia Sientífika Investigasaun Kriminál (PCIC) ezekuta mandadu Tribunál, hodi halo detensaun, aprensaun no buska ba arguidu na’in-rua nia hela fatin iha Bidau no Delta, tanba iha ligasaun ho arguidu na’in-sia ne’ebé deskonfia involve iha aktu ilísitu transaksaun droga.

Jornalista: Carmelita Isaac