Hatutan.com, (25 Agostu 2022), Díli—Tribunál Distritál Díli (TDD) liu husi leitura sentensa ne’ebé lee husi juiz kolektivu Ivan Surytai, Ana Paula Fonseca no Maria Solana, kondena arguidu Joni da Costa Pereira ho pena prizaun tinan 14 no arguidu José Saldanha ho pena prizaun tinan 4 ba krime omesídiu simples, tanba oho ona vítima Hilário Vitalisio Soares iha Delta-Elemloi iha tinan 2021.

Foto Ilustasaun Google.

Razaun Tribunál aplika pena refere, tanba konsidera faktus provadu bazeia ba konviksaun arguidu Joni da Costa Pereira, maske arguidu José Saldanha nega katak la’ós nia mak kontribui hodi oho ona vitima Hilario Vitalisio Soares.

Maibé, arguidu sira nia hahalok prienxe elementu krime ne’ebé iha, tanba ne’e Tribunál deside aplika pena ne’ebé diferente ba arguidu na’in-rua tanba arguidu Joni da Costa Pereira konfesa katak sira na’in rua hamutuk mak oho vitima ne’ebe iha momentu ne’eba utiliza ai no fatuk hodi baku mate vitima.

Hafoin rona desizaun, guarda prizionál sira lori arguidu sira ba prizaun Becora hodi kumpri desizaun TDD.

Antes ne’e, tuir akuzasaun ne’ebé iha katak iha loron 09 fulan Jullu oras 23:00, arguidu na’in-rua haree vitima ho nia kolega ida la’o-sai hosi Bairru Has laran, nune’e arguidu sira helik an iha uma leet hodi haree vítima nia kolega la’o tama liu ba kos laran no vitima sei tur iha trotoár ninin.

Nune’e, arguidu JDCP lori fatuk bo’ot hodi ba besik vitima nia oin no tuda rabat dala ida iha vitima nia hasan karuk hodi rezulta kanek no monu ba rai no kontinua lori fatuk tuda dala ida iha parte kanuruk.

Vítima seidauk mate, arguidu JS mai hosi kotuk lori ai-dona hodi baku dala ida iha vítima nia ulun no baku dala barak iha parte kanuruk no isin lolon.

Tanba ne’e, MP akuza arguidu na’in-rua ba pratika krime omesídiu simples ne’ebé previstu iha artigu 138 hosi kódigu penál TL.

Audiénsia julgamentu prezide hosi juiz kolektivu Ivan Surytai, Ana Paula Fonseca no Maria Solana, MP reprezenta hosi Prokuradór José Elo no arguidu na’in-rua hetan asisténsia legál hosi Defensór Públiku (DP) José da Costa no advogadu privadu Sérgio.

Jornalista: Carmelita Isaac