Hatutan.com, (05 Setembru 2022), Díli– Autoridade Munisípiu Díli no Servisu Saneamentu Munisípiu Díli, presiza tebes atu melloramentu dezempeñu hodi tau matan bá ai-funan sira iha vazu-laran Estrada Delta (Supermerkadu Leader nia oin) sa’e mai  Elemloi to’o borus bá ponte Comoro III no liubá Hudi-Laran, Bairru Pité.

ai-funan sira iha vazu estrada Delta nian komesa namlaek no mate. Foto/Hatutan.com

Daudaun ne’e, ai-funan sira ne’ebé mak uluk empreza Delta Flores kuda iha vazu sira estrada laran komesa namlaek no balun mate ona.

Tuir observasaun Hatutan.com nian iha semana ida ne’e nia laran, nota katak iha dadeer no loraik, tempu balun, servisu saneamentu Munisípiu Díli ho karreta bombeiru sempre rega ai-funan sira-ne’e, maibé tanba ai-funan balun komesa namlaek no mate tenke troka no kuda fali ai-funan foun.

Ai-funan sira iha vazu laran iha estrada klaran, Delta nian tesik bá to’o Ponte Comoro III nia rohan ninin mai no liubá to’o estrada Hudi-laran nian, namlaek no mate barak ona. Maibé la iha esforsu atu troka ai-funan sira mate ona.

António de Sousa, nu’udár abitante ida iha área Fomento, Díli, fó hanoin katak dezde kedas 2021, ai-funan barak mak mate iha vazu ho medida ki’ik no medida boot nia laran. Maibé, autoridade sira husik de’it nune’e no la troka ho ai-funan oan seluk.

“Ami mos dala ruma observa iha abitante balun ne’ebé mai fokit sai ai-funan oan sira iha vazu laran lori ba sira-nia uma. Maibé, laiha ema ida mak mai tau matan bá ai-funan sira ne’e,” António hateten bá Haututan.com.

Nia fó hanoin mos katak iha tempu bai-loron ne’e,  di’ak liu maka ekipa Saneamentu Munisípiu Díli, ne’ebé responsavel bá rega ai-funan sira iha estrada ka jardín sira iha Sidade Díli tenke ativu (dadeer no loraik) no karik iha ai-funan balun mak namlaek no mate ona, di’ak liu mak fokit sai tiha no kuda fali ai-funan oan foun.

Iha fatin hanesan, Teresa Ximenes nu’udár abitante ida iha Delta nian fó hanoin bá Autoridade Munisípiu Díli atu bele tau atensaun ka halo manutesaun hodi preteze ai-funan sira iha vazu laran. Tanba vazu ho ai-funan sira ne’e, Estadu lakon osan mak harii no kuda.

“Ita Timor nia problema boot maka kona-bá pemeliharaan ka manutensaun bá sasan sira ne’ebé Estadu investe hodi osan povu nian. Ita nunka koidadu no la halo melloramentu bá buat sira ne’ebé Estadu halo ba ita no halo iha ita-nia rain,” Teresa Ximenes hateten.

 Istória badak kona-bá Projetu Vazu Ai-funan iha Delta

Servisu Saneamentu Munisípiu Díli rega hela ai-funan sira iha área Hudi-laran, maibé ai-funan barak mós mak namlaek no mate daudaun. Foto/Hatutan.com

Projetu vazu ai-funan iha área Delta to’o área Estada  Hudi-Laran responsabiliza hosi kompañia Delta Flores.

Projetu ne’e pakote ida ho projetu Estrada ne’ebé konstrui hosi Kompañia Tinolina ho  nia parseiru (joint venture) King Konstruction.

Bainhira projetu Estrada ho vazu ai-funan ne’e  hahú iha tinan 2015 to’o mai 2016 mosu pro-kontra iha públiku tanba projetu vazu ai-funan ne’e konsidera ilegal.

Tempu ne’ebá Adjuntu Diretór Ajénsia Dezenvolvimentu Nasionál (ADN), Rui Lourenço da Costa mós hateten bá jornalista sira katak ADN haruka karta bá kompañia hirak ne’ebé responsabiliza bá projetu vazu ai-funan iha Delta hodi hapara tiha sira nia servisu tanba projetu ne’e konsidera ilegál.

Rui esplika katak tuir loloos projetu vazu ai-funan ne’e foin maka ideia de’it maibé kompañia ne’ebé responsabiliza bá projetu ne’e kriativu liu. Kompañia Delta Flores  ne’e mós la’ós  kompañia  ne’ebé asina kontratu ho Governu maibé kompañia subkontratu.

Kona-bá pro-kontra projetu vazu ai-funan ne’e,  diretór kompañia Delta Flores, Luis Lobato hateten, projetu monta vazu medianline iha área Delta inisiativa hosi nia rasik, hafoin halo dezeñu nia parte ko’alia  ho Diretór Tinolina Agustinho Gomes no ikus hetan aprova hosi Ministru Obras Públiku Gastão de Sousa (tmepu ne’ebá) hodi bele implementa.

“Ministru Gastão konkorda  hodi aseita ami implementa projetu  medianline hodi monta vazu iha Estrada Delta nian,” informa Luis Lobato informa bá Jornalista sira tempu ne’ebá.

Projetu vazu  ai-funan ne’e kompañia Delta Flores hahú halo servisu  iha  Abril 2015 ho nia valor orsamentu millaun ida resin.

Organizasaun La’ós Govenu nian (ONG), Luta Hamutuk konsidera projetu vauz ai-fiunan ne’e sala hosi ADN no Ministériu Obras Públika no Transportes no Komunikasaun (MOPTK).

Tempu ne’ebá Diretór ONG Luta Hamutuk, Mericio dos Reis “Akara” hateten, projetu vazu ai-funan ne’ebé kompañia sira halo iha parte Delta maka Ajénsia Dezenvolvimentu Nasionál (ADN) deteta katak projetu ne’e ilegál, responsabilidade iha ona Governu.

Luta Hamutuk konsidera ADN ho MOPTK laiha onestu bá malu, tanba ne’e, tempu ne’ebá Luta Hamutuk propoin atu  Komisaun Anti Korrupsaun (CAC) halo investigasaun bá projetu ne’e atu hatene tuir los sé maka sala no sé maka loos iha problema ne’e.

Kona-bá kestaun ne’e, Ministru Gastão Sousa rasik  hateten, projetu refere sei iha kestaun téknika ne’ebé maka sei rezolve ho ADN.

Jornalista : Luciana Verdial