Hatutan.com, (31 Agostu 2021), Díli-Espetativa  no esperansa  Sarani Igreja  Saun José Aimutin, Dili, atu bele halibur-malu iha Sakramentu Liturjia domingu-domingu iha Igreja Aimutin ne’ebé ‘furak’ to’o agora hela ho orgullu de’it.

Lansamentu fatuk-inan ba Igreja Aimutin hosi Primeiru-Ministru tempu ne’ebá, Rui Maria de Araújo, ho konseitu kombinasaun kulturál no modernu, ne’ebé sei akomoda sarani besik 1,200, ohin loron, ninia konstrusaun “nunca terminou” (tak kunjung selesai) mezmu iha tinan 2019 liubá halo tiha ona pagamentu ba “mão de obra” milaun $2,5.

Konsultóriu no dezeñu ba Igreja Aimutin, nu’udar mós membru Konsellu Pastorál no Komisaun  Harii Igreja foun Saun José Aimutin, Cesar Vital Moreira, klarifika katak pagamentu ikus ba projetu annual  ne’e iha  novembru 2019 ho total milaun $2,5.

Igreja Aimutin nia laran. Foto/Hatutan.com

Hosi fali dezembru 2020, to’o mai ohin loron, laiha pagamentu, nune’e osan restu (sisa) ho montante $480,000 iha hela Governu liuhosi Gabinete Apoiu Sosiedade Sivíl (GASC, sigla portugés).

“Segunda kalan (30/08/2021), ami halo enkontru ona ho Komisaun Ezekutivu Arsebispu Arkidioseze Metropolitana Dili nian  iha salaun enkontru Universidade Katólika, Balide, Dili, no rekomenda ba  Arsebispu Arkidioseze Metropolitana Dili, Dom Virgílio do Carmo da Silva, SDB, atu husu Governu liuhosi GASC atu Igreja ne’e tenke finansia to’o hotu no osan $480,000.00 tenke selu,” Cesar Vital Moreira, informa ba Hatutan.com, tersa (31/08/2021).

Iha fulan liubá Komisaun Harii Igreja  Saun José Aimutin hasoru malu mós ho Gabinete Primeiru-Ministru ko’alia mós kona-ba osan restu ne’ebé tenke buka dalan atu finaliza Igreja ne’e.

Projetu harii Igreja Saun José Aimutin foun ne’e, ho fundu sira liuhusi Fundu Sosiedade Sivíl iha tutela direta ba Gabinete Primeiru-Ministru nian.

Iha momentu serimónia hatuur fatuk-inan ba konstrusaun Igreja Aimutin foun ne’e, iha loron 28 maiu  2015, PM Rui Maria de Araújo,  afirma katak Governu investe osan ba konstrusaun no reabilitasaun Igreja sira la’ós de’it atu haree ba aspetu ekonómiku, maibé mós hosi aspetu morál no sosiál.

Dezde pagamentu paradu no la kontinua iha dezembru 2019 mai to’o ohin loron, konstrusaun fíziku Igreja nian hela ho porsentu 82, hein deit osan restu $480,000.00 atu bele alkansa  monta asesoria sira interior nian inklui mós ho altar. Infelizmente konstrusaun ba obra ne’e paradu tanba tuir Cesar Vital Moreira, Governu labele halo transferénsia públiku ho razaun akordu multi annual ne’ebé kada tinan prolonga expire iha tinan 2020 no oras ne’e parte rua seidauk halo estensaun.

Parte GASC iha ona planu atu halo transferénsia osan restu $480,000.00 hodi halais prosesu konstrusaun ba Igreja Aimutinn bazeia ba pedidu hosi Komisaun Harii Igreja foun  ne’e, maibé infelizmente labele halo tanba parte Arkidioseze Metropolitana Dili seidauk halo rekomendasaun ruma bazeia ba akta ne’ebé GASC prodús.

Andar okos Igreja Aimutin. Foto/Hatutan.com

Cesar Vital Moreira rasik mós rekoñese ezekusaun ba obra ne’e lentu ka neineik liu tanba kauza hosi impasse polítika ne’ebé iha no Governu la’o de’it ho orsamentu duodesimu  ne’ebé obriga Governu labele finansia obra sira ho kustu boot.

Situasaun polítika iha rai-laran mós tuir Cesar Moreira, nu’udar forsa maiór seluk ne’ebé lori impaktu ba prosesu konstrusaun Igreja Aimutinn mak pandemia covid-19. Situasaun ne’e obriga Komisaun Harii Igreja foun tenke hein hodi la simu transferénsia hosi Governu to’o akordu ne’e expire iha dalan klaran no lori impaktu negativu ba imajen konstrusaun Igreja refere iha públiku.

“Ita hare molok kontratu ne’e expire komisaun la simu ona osan husi Governu, ikus mai traballadór sira abandona servisu tanba la hetan vensimentu hosi kompañia implementadór,” Cesar Vital Moreira dehan.

2020, Governu laiha kbiit atu finansia

Ba  Hatutan.com iha nia serbisu fatin, Dili, koordenadór GASC, Filipe da Costa, rekoñese katak iha tinan 2020 Governu lao de’it ho orsamentu duodesimu tanba ne’e laiha kbiit finanseiru atu finansia obra sira ne’ebé mai ho kustu orsamentu boot.

Ho situasaun ne’e halo Governu labele atu halo transferénsia tuir akordu ne’ebé iha no prejudika konstrusaun Igreja Aimutin tenke pauza durante tinan ida. Maske nune’e, Filipe da Costa  mós preokupa tanba iha situasaun sira hanesan ne’e, parte Igreja la halo pedidu estensaun ba kontratu multi annual ne’ebé GASC ho Igreja iha no ida seluk mak kompañia hamutuk ho Igreja la submete relatóriu progresu servisu bazeia ba orsamentu ne’ebé antes ne’e parte GASC halo ona pagamentu ho montante millaun $2,5.

“Ita nia kontratu mate iha 2020 laiha pedidu estensaun husi Igreja no durante ita lao ho orsamentu duodesimu parte Igreja mós la submete relatóriu mai iha gabinete, oinsá ami bele hatene progresu servisu atu ikus mai ita bele halo transferénsia,” Filipe da Costa argumenta no GASC nafatin hein pedidu estensaun husi parte Igreja atu nune’e bele halo transferénsia ikus hodi kompleta kuota orsamentu ne’ebé governu komprometidu ona atu fó ba obra Igreja Aimutin $480,000.00.

“Osan $480,000.00 to’o oras ne’e sei iha hela GASC,” Filipe da Costa informa tan.

Tuir prosedimentu legal no normal katak  bainhira kontratu ida mate (expire) no parte rua atu halo hikas renovasaun tenke iha rekomendasaun hosi autoridade kompetente no Igreja Aimutin pretense ba Arkidioseze Metropolitana Dili tan ne’e sei hein rekomendasaun hosi Bispu hodi kompleta dokumentu ne’e.

Ba prosesu ne’e GASC anúnsiu tiha ona no halo ona aproximasaun ho parte Igreja atu halo rekomendasaun bazeia ba dokumentu no faktu ne’ebé iha hodi hamoris hikas kontratu ne’ebé iha, atu nune’e, fó dalan ba GASC hodi halo transferénsia ikus nian hodi kompleta orsamentu $3,000,000.00. (bit)