Hatutan.com (08 Novembru 2021), Díli—Tribunál Distritál Dili (TDD) hala’o julgamentu ba krime Denunsia Kalonioza, ne’ebé involve lezadu eis Prezidente Comissão Nasional Eleição (CNE), Alcino de Araújo Barrís no arguidu LS.

Tuir akuzasaun husi Ministériu Públiku (MP) katak, arguidu LS hanesan funsionáriu públiku no lezadu Alcino de Araújo Barrís iha momentu ne’eba hanesan Prezidente CNE, maibé iha fulan Marsu 2020, tuku 10:00 lezadu loke média sosiál facebook haree hetan arguidu tau komentáriu iha nia pájina facebook katak, lezadu nu’udár Prezidente CNE halo komentáriu iha kanál TVTL la iha imparsialidade, tanba fo influensia ba Prezidente Repúblika (PR) atu konvense partidu CNRT hodi forma koligasaun.

Alende ne’e, arguidu dun lezadu mak indika kompañia hodi sosa billete aviaun viajen no halo manutensaun ba karreta ne’ebé la liu husi prosedimentu legal, maibé iha indikasaun familiarizmu.

Advertisement

Ho hahalok arguidu, MP akuza arguidu ba pratika krime Denunsia Kalonioza ne’ebé previstu iha artigu 285 husi Kódigu Penál TL.

Hatán ba akuzasaun ne’e, arguidu rekoñese nia maka hakerek komentáriu ba lezadu tanba la aseita lezadu nia komentáriu antes ne’ebé dehan arguidu mestradu ka doutoramentu.

Lezadu Alcino de Araújo Barrís esplika, ho arguidu nia komentáriu ne’ebé hateten katak, lezadu fahe bandeira antes de eleisaun, fasilita familia sosa billete manutensaun karreta no fasilita PR halo koligasaun prezudika lezadu nia servisu iha momentu ne’ebá hanesan Prezidente CNE, maske to’o agora seidauk iha ekipa ne’ebé halo investigasaun ba nia kona-bá arguidu nia publikasaun ne’e.

Lezadu Alcino de Araújo Barrís deklara laiha relasaun familia ho arguidu hanesan kolega no dalaruma konversa ho arguidu tanba arguidu hola parte iha Partidu Politiku.

Hafoin rona deklarasaun husi arguidu no lezadu, Tribunál deside MP atu halo alegasaun kontra arguidu.

Advertisement

Nune’e, iha alegasaun MP husu ba Tribunál atu aplika pena multa ba arguidu, maske defeza husi arguidu husu Tribunál fó pena ne’ebé justu no adekuadu.

Hafoin alegasaun, Tribunál adi’a julgamentu ba loron 23 fulan Novembru tuku 11:00, hodi rona desizaun.

Audiénsia julgamentu iha Segunda ohin, prezide husi juiz singulár Ivan Suritai, MP reprezenta husi Prokuradora Bemvinda do Rosário no arguidu hetan asisténsia legál husi Defensór Públiku João de Carvalho.

Jornalista: Carmelita Isaac

Advertisement