Hatutan.com, (09 Novembru 2021), Díli—Polísia Nasional Investigasaun Kriminál (PNSIK) arrola ona kazu krime balun relasiona ho kazu deskonfia subar amante iha Federasaun Futeból Timor Leste (FFTL).

Notísia iha Relasaun : Deskonfia, Ezekutivu FFTL Balun Subar Amante

Vidru-rahun hosi karreta marka Nisan ho numeru matrikula 22.765 TLS ne’ebé família prezidente FFTL nian baku rahun iha resintu FFTL, Díli, Domingu (07/11/2021), tuku 06:00 Otl. Foto/Hatutan.com

Fontes PNSIK ne’ebé Hatutan.com konfirma no lakohi publika nia identidade informa katak, iha segunda (08/11/2021), purvolta tuku 11:00 Otl, parte sira família Prezidente Federasaun Futeból Timor-Leste,  Francisco da Costa Jeronimo mai ona aprezenta an iha PNSIK, Caicoli, Díli, maibé ninia prosesu kontinuasaun sei hein komunikasaun hosi parte rua tanba iha ona informasaun katak, família sira halo daudaun esforsu mediasaun entre família hodi rezolve família de’it.

PNSIK  agora hein de’it hosi parte rua tanba tuir informasaun família, liuliu pesoál Prezidente Federasaun Futeból Timor Leste  (FFTL) hamutuk ona ho nia família sira hosi Liquiça buka malu ona hodi rezolve tuir família nian.

Advertisement

Kona-bá evidénsia, karreta  Nisan ho númeru matrikula 22.765 TLS ne’ebé família rasik (prezidente FFTL nia alin rasik) baku rahun  nia vidru ne’e lori sai ona hosi Polísia  nia arredores  hodi ba hadi’a iha ofisina.

Xefe Operasaun PNSIK, Inspetór Mousinho Correia, ba Hatutan.com iha Komandu Jerál PNTL,  Kuarta (10/11/2021), konfirma katak, sira-nia parte seidauk bele fó sai prosesu no rezultadu investigasaun nian, ligadu ba keixa hosi vítima sira ba insidente iha resintu FFTL, Domingu liubá (07/11/2021), purvolta tuku 06:00 dadeer.

Xefe Operasaun PNSIK ne’e mós hato’o katak informasaun hotu-hotu sei bele fó de’it liuhosi Portavós PNTL. nune’e, bainhira Hatutan.com konfirma fila-fali ho Relasaun Públika PNTL nian, atu hasoru Portavós PNTL, Superintendente Xefe Arnaldo de Araújo, sira informa katak, portavós sai hela hodi tuir hela enkontru virtuál ida iha Programa Dezenvolvimentu Polísia Timor Leste (TLPDP, sigla Ingles).

Francisco Jeronimo rezigna an hosi CCF

Liuhosi konferénsia imprensa iha Commite Central FRETILIN (CCF), tersa (09/11/2021), Francisco da Costa Jeronimo, atuál Ministru Asuntu Parlamentár no Komunikasaun Sosiál  (MAPKOMS), deklara katak  nia hasoru ona Sekretáriu Jerál Partidu FRETILIN, Mari Alkatiri hodi autoriza atu kontinua hala’o knar Governu nian, maibé Francisco Jeronimo sente katak, di’ak liu husu atu suspende lai nia knar hanesan membru CCF.

Advertisement

Liuhusi publikasaun mídia nasionál sira iha edisaun tersa (09/11/2021) ne’ebé Hatutan.com sita tuir katak, Francisco Jeronimo, prezidente FFTL, membru CCF no Ministru MAPKOMS deklara mós informasaun ne’ebé lekar iha media sosiál Facebook  ne’ebé afeta ba nia privasidade no hamate nia karater hodi dehan nia subar amante ne’e laloos no konsidera boatu.

Jornalista : Rogério Cárceres

Advertisement