Hatutan.com, (26 Novembru 2021), Dili—As Ponta Leste FC rekolla vitória daruak iha jogu kontinuasaun Liga Futeból Timor Leste (LFTL), hafoin manan adversáriu Lalenok United FC ho skore 1:0.

Ekipa AS Ponta Leste FC. Foto/LFTL.

Ho derrota ne’e obriga Lalenok United FC tenke fila ho liman mamuk hodi halo preparasaun ba terseiru jogu hasoru Karketu Dili FC, no As Ponta Leste FC provizoriamente kudeta tabela klasifikasaun hodi okupa pozisaun daruak ho pontus 6.

Notísia iha Relasaun:AD SLB Laulara FC Rekolla Vitória Dahuluk Iha Jornada Daruak LFTL

Ekipa AS Ponta Leste FC ho nia adversáriu Lalenok United FC mai ho ambisaun atu kudeta tabela klasifikasaun provizóriu iha jornada daruak nian.

As Ponta Leste FC hahú halo kedan presaun ba nia adversáriu iha minutu dahuluk jogu hahú. Lalenok United FC mantein ho nia jogu hodi hamate bola iha liña klaran no halo kontra atake liu hosi avansadu Daniel Adade (11) no Italo Pimental (28) maibé As Ponta Leste FC mantein disiplina iha liña kotuk hodi asegura nia baliza hosi ameasa.

Foin tama ba minutu 5 Jogadór Lalenok United FC Abrão Mendonça (31) simu kartaun kinur iha minutu hafoin halo falta hasoru jogadór adversáriu.

Ekipa AS Ponta Leste FC kontra ekipa Lelenok United. Foto/LFTL.

As Ponta Leste FC kontinua domina jogu hodi hamate bola liu hosi liña médiu ne’ebé komanda hosi Mumin Mohamed (8) ne’ebé sempre hetan suporta hosi Isaac dos Santos (19) no Rivelino Martins (99).

As Ponta Leste FC nafatin mantein disiplina iha kada liña hodi buka oportunidade atu hatama golu. Maske nune’e Rivelino Martins (99) tenke simu kartaun kinur hafoin halo falta.

Lalenok United FC buka oportunidade atu halo balansu ba ekipa adversáriu nia jogu liu hamate bola klaran no koko halo tranzisaun ba taktika hodi bele manan jogu ne’e.

Lalenok United FC tenke halo substituisaun ba nia Jogadór Santiago da Costa (9) iha minutu 28 tanba sofre aleiza hodi hatama fali Francisco Savio (24).

Tama ba minutu 30, Jogadór As Ponta Leste FC Momin Muhammed (8) simu kartaun kinur hafoin komete erru hasoru Jogadór arversariu.

As Ponta Leste FC mantein nia ritmu no halo substituisaun iha liña avansadu hodi hatama Silveiro Garcia (27) no hasai Hermenio de Sousa (15).

Ho substituisaun ne’e lori duni rezultadu no  tama ba minutu 35 Ejivanio da Costa (7) marka golu ba nia ekipa hodi muda skore ba 1:0.

Ho golu ne’e As Ponta Leste FC lidera provizóriu no Lalenok United FC hela iha presaun nia laran. Tama ba minutu 37 Zacarias Cabral (22) Jogadór Lalenok United FC simu kartaun kinur.

As Ponta Leste FC nafatin iha koordenasaun diak liu hosi komuikasaun entre Jogadór sira hodi  mantein ritmu jogu nune’e bele asegura vitória ne’ebé iha.

Ejivanio da Costa (7) tenke simu kartaun kinur hafoin satan bola ho liman iha minutu 45. Iha tempu adisionál minutu 2 ekipa rua la halo mudansa ba skore iha tabela, nune’e As Ponta Leste FC ukun provizóriu iha tabela skore.

Tama ba segunda parte Lalenok United FC lansa kedan atake ba As Ponta Leste FC liu hosi avansadu Danilson Araujo (26) maibé seidauk produz holu ruma.

Lalenok United FC kontinua halo atake no fo ameasa barak ba nia ekipa adversáriu liu hosi bola falta ne’bé Italo Pimental (28) suta maibé seidauk bele produz golu ba nia ekipa.

As ponta Leste FC buka meius atu sai hosi ameasa nia laran nune’e halo substituisaun ba iha liña avansadu hodi hasai Ejivanio da Costa (7) no hatama mediu Amancio Araujo (18) iha minutu 58 atu bele halo balansu no hamate Lalenok United nia jogu.  

Lalenok United FC nafatin halo esforsu liu hosi avansadu estranjeiru Daniel Adade (11) maibé sei nafatin falla.

Jogadór As Ponta Leste FC Ricardo Bianco sofre aleiza iha parte ain nune’e obriga treinadór tenke halo substituisaun hodi hatama Nelson Antonio (3) iha minutu 69.

Ho substituisaun ne’e ekipa rua iha balansu ba jogu no kada ekipa produs oportunidade liu hosi bola falta no krossing sira ne’ebé iha.

Baliza As Ponta Leste FC Francisco Gusmão (1) sorfre aleiza hafoin xoke-malu ho Jogadór adversáriu iha área grandeal bainhira hakarak salva bola nune’e origadu tenke halo substituisaun hodi hatama baliza suplente Albino Ximenes (22) iha minutu 76.

Hafoin substituisaun ne’e As Ponta Leste FC lansa ameasa barak ba nia adversáriu liu hosi avansadu Silverio Garcia (27) maibé falla iha ezekusaun.

Tama ba minutu 80 Lalenok United FC halo substituisaun hodi hasai médiu Osório Gusmão (6) no hatama avansadu Delcio Pereira (17) ho intensaun bele halo mudansa ba jogu hodi duni atrazu ne’ebé iha.

Tama ba minutu 86 Lalenok United FC kontinua halo substituisaun hodi hatama Nidio Neto (23) no hasai Zacarias Cabral (22).

Ho substituisaun ne’e la muda skore iha tabela. Estrela Lalenok United FC Italo Pimental (28) nafatin tenta no buka oportunidade maibé As Ponta Leste FC la husik nia livre atu bele halo sutu. To’o tempu termina vitória ba As Ponta Leste FC.

Hafoin jogu termina treinador Lalenok United FC Gaspar Amaral hateten nia ekipa falla iha liña klaran nune’e adversáriu sira aproveita hodi hodi hata golu.

Maske iha segunda parte halo esforsu makas maibé la konsege halo impata tanba adversáriu iha kombinasaun ida di’ak hodi defende vitória ne’e.

Iha sorin seluk Treinador As Ponta Leste FC Francisco Araujo hateten, vitória ne’e mai hosi rezultadu servisu ne’ebé iha tanba antes ne’e halo ona estudu no analize ba jogu adversáriu nian, nune’e fásil atu bele halo balansu ne’ebé ikus mai rekolla pontu tolu ho vitória 1:0.

Jornalista: Vito Salvadór