Connect with us
Pakote Ahi

Desportu

Árbitu “Kakeu”, AD SLB Laulara-Karketu Díli  Fahe Pontu iha Jornada Datoluk

Published

on

Hatutan.com, (27 Novembru 2021), Dili—Ekipa AD SLB Laulara FC no Karketu Díli FC, obrigadu tenke fahe pontus hanesan iha jornada datoluk Liga Futeból Timor Leste (LFTL) hafóin impata 1:1 iha jogu kontinuasaun Sábadu (27/11/2021) iha estádium munisipál Díli, tanba árbitu la fiar an iha desizaun.

Jogu entre ekipa AD SLB Laulara ho Karketu Díli, Sábadu (27/11/21). Foto/LFTL.

Karketu Dili FC antes ne’e lansa atake ba adversáriu AD SLB Laulara FC no lidera iha primeira parte ikus mai tenke rekoñese adversáriu nia fórsa hodi fahe pontus.

Notísia iha Relasaun: Lalenok United Fila ho Liman Mamuk Hafoin AS Ponta Leste Rekolla 1:0

AD SLB Laulara FC ho de’it jogadór kuaze juniór maibé konsege halo balansu ba ekipa Karketu Dili FC nia jogu no ikus mai rekolla pontu ida hodi nafatin tur metin iha pozisaun segundu tabela klasifikasaun provizóriu.

Advertisement

Enkuantu, Karketu Dili FC nafatin ukun ho pontus 7 hosi jogu tolu ne’ebé ekipa matak malirin enfrenta manan rua no impata ida.

Iha jogu ekipa rua ida-idak matenek ho nia desizaun tuir tátika ne’ebé iha, maibé árbitu nia desizaun balun ne’ebé lori insatisfasaun ba iha ekipa sira liuliu ekipa Karketu Dili FC no konsidera desizaun árbitu nian fó afeita ba ekipa rua nia jogu iha kampu laran.

Observasaun Hatutan.com iha kampu nota, selebrasaun jogadór hosi ekipa AD SLB Laulara FC ne’ebé viola regra FAIR PLAY, maibé árbitu la preokupa maske asesór arbitrazen komunika hosi leten liu hosi radio komunikasaun husu atu árbitu fó kartaun ba jogadór AD SLB Laulara FC, tanba sira nia selebrasaun la respeita ba fair play iha jogu ne’e, maibé asistente árbitu no match comisioner la preoka no husik situasaun ne’e kontinua to’o jogu remata.

Vise Prezidente Karketu Dili FC Luis Obrai ba jornalista sira iha estádiu munisipál Dili hateten bainhira hakarak futeból iha timor ba oin, árbitu sira tenke hola medida sériu relasiona ho aktu jogadór sira nian iha kampu laran.

“Ezemplu ohin Kuandu AD SLB Laulara FC hatama golu, Filipe Oliveira halai mai tarata iha ami nia bens, árbitu tenke fó kartaun ba nia mais árbitu kala matan delek oituan mais la buat ida jogu mak hanesan ne’e,” Luis Obrai, hateten.

Advertisement

Vise Prezidente ne’e hatutan, fiar katak ho rezultadu impata ne’e ikus mai Karketu Dili FC sei sai kampiaun nafatin.

Jogu entre ekipa AD SLB Laulara ho Karketu Díli, Sábadu (27/11/21). Foto/LFTL.

Iha situasaun hanesan asistente treinadór Karketu Dili FC hateten Karketu Dili FC halo esfórsu máximu atu mantein vitória iha primeira parte, maibé tanba adversáriu mós joga di’ak, nune’e ikus mai jogu ne’e impata no  ekipa rua nia jogu di’ak maibé árbitu mak estraga tia jogu ne’e.

“Árbitu ne’ebé lidera jogu ne’e laiha konfiansa ba nia an rasik. Nune’e nia dirije ne’e atu halo tim rua ne’e atu provoka malu fali. AD SLB Laulara FC nian falta nia hosik de’it mais Karketu Dili FC nian oituan de’it nia hu tia,” António Timoteo hateten.

Treinadór AD SLB Laulara FC, Efren Jeronimo hateten ekipa ne’e nia jogadór kolen tanba jogu tutuir malu de’it tanba oráriu ida badak loos, nune’e sei esfórsu hodi halo substituisaun ba jogadór iha segunda parte ikus-mai hetan ritmu jogu no halo impata ba jogu loraik ne’e.

“Tuir mai oin ami sei halo di’ak liután,” Efren Jeronimo promete atu hadi’a jogu.

Ekipa AD SLB Laulara FC no Karketu Dili FC iha animu no ambisaun makas atu konkista vitória iha jogu ne’e hodi nafatin asegura pozisaun iha tabela klasifikasaun.

Advertisement

AD SLB Laulara FC halo kedan atake ba Karketu Dili FC liu hosi bola as ne’ebé direitamente hatama hosi liña defeza liu hosi jogadór Filipe Oliveira (24).

Ekipa nia jogu sei iha balansu, nune’e kada ekipa sei fasil atu kontrola jogu. AD SLB Laulara FC iha liu tendénsia atu halo atake liu hosi jogadór sira iha liña klaran, ne’ebé hola inisiativa halo pasajen direta ba iha avansadu.

Karketu Dili FC sei mantein disiplina no kontrola ritmu adversáriu nian hodi buka oportunidade atu oinsa bele hatama golu no asegura ekipa hosi presaun adversáriu nian.

Karketu Dili FC hahu halo tranzisaun ba nia taktika hodi domina jogu liu hosi pasajen hosi ain ba ain. Liña koordenasaun entre avansadu, médiu no defeza ne’ebé iha disiplina diak ikus mai Karketu Dili FC lansa uluk golu ida ba nia adversáriu. Golu dahuluk Karketu Dili FC hatama hosi  avansadu estranjeiru Mickhel Eugene (88) iha minutu  20.

AD SLB Laulara FC nafatin iha korajen no animu atu halo impata ba jogu ne’e hodi buka oportunidade atu bele konkista vitória.

Advertisement

Jogadór AD SLB Laulara FC Filipe Oliveira (24) lansa ameasa ida liu hosi suta bola dook maibé bola semo liu de’it hosi baliza nia leten.

Ekipa rua kontinua lansa kontra atake ba malu liu hosi oportunidade ne’ebé iha. Jogadór AD SLB Laulara FC Fernando de Carvalho simu kartaun kinur hafóin hodi liman basa jogadór Adversáriu Boateng Appiah (7) iha oin laran. Ekipa rua mantein jogu hodi defende ida-idak nia ekipa too primeira parte remata.

Tama ba segunda parte ekipa rua sei nafatin mantein ho plantel sira iha primeira parte. AD SLB Laulara FC nafatin halo esforsu liu hosi koordenasaun jogadór sira iha avansadu ne’ebé komanda direta hosi kapitaun Nidio Alves (93).

AD SLB Laulara FC nafatin hakas an maibé bola vantazen laiha tanba ekipa adversáriu disiplina iha kada liña hodi halo antesipasaun ho kontra atake lais ne’ebé halo AD SLB Laulara FC hela iha presaun nia laran.

Jogadór Karketu Dili FC Mickhel Eugene (88) halo ameasa ida liu hosi bola mesak ho baliza maibé sei falla tanba baliza AD SLB Laulara FC Andrew Mensah (20) sei antesipa ho di’ak.

Advertisement

Atu hadia liña avansadu AD SLB Laulara FC halo substituisaun ba nia jogadór hodi hasai Alexandro Ima Kefi (21) no  Aldo Amara (27) no hatama Jorge Moniz (5) no Luis da Silva (17) iha minutu 62.

Kapitaun AD SLB Laulara FC Nidio Alves (93) sofre aleiza no obriga ekipa tékniku tenke halo substituisaun hodi hatama Job Mark Freitas (15) iha minutu 66.

Ho substituisaun hirak ne’e AD SLB Laulara FC komesa hetan nia ritmu no halo presaun makas ba Karketu Dili FC hodi hasa’e tensi jogu.

AD SLB Laulara FC kontinua domina jogu iha minutu 70 ba leten no Karketu Dili FC lakon ritmu no la iha ona balansu ba jogu nune’e AD SLB Laulara FC koko domina bola no lansa ameasa liu hosi jogadór Konelis Portela (11) ne’ebé ikus mai marka dunik golu ba nia ekipa iha minutu 74 hodi halo impata 1:1.

Jogadór Karketu Dili FC Boateng Appiah (7) simu kartaun kinur dahuluk hafóin halo falta hasoru jogadór AD SLB Laulara FC.

Advertisement

Hafóin golu ne’e Karketu Dili FC halo kedan substituisaun ba nia kapitaun ekipa Domingos Ramos (5) ne’ebé sofre aleiza hodi hatama António Martins (2) iha minutu 85.

AD SLB Laulara FC kontinua halo presaun ba Karketu Dili FC no ikus mai Boateng Appiah (7) jogadór Karketu Dili FC tenke simu kartaun kinur daruak no obrigadu tenke hosik kampu tanba simu mós kartaun mean iha minutu 90+6.

To’o jogu remata ekipa rua fahe pontu hodi mantein pozisaun iha tabela klasifikasaun provizóriu  nune’e Karketu Dili FC nafatin ukun ho pontus 7 no AD SLB Laulara FC nafatin okupa  segunda klasifikasaun provizóriu.

Jornalista: Vito Salvadór

Advertisement
Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Desportu

AD SLB Laulara Okupa III Lugar iha Timor Cup 2023, Kay Olok Mellór Markadór

Published

on

Hatutan.com, (15 Janeiru 2024), DíliKlube Futeból Timor-Leste AD SLB Laulara sai hanesan man’an na’in terseiru (III) lugar iha finál taxa Timor Cup 2023 no Jogadór estrela Kay Olok Gusmão sai hanesan mellór markadór ho golu neen.

(more…)

Kontinua Le'e

Desportu

Timor Cup 2023, AD SLB Laulara Derrota Hasoru Northern Crocs

Published

on

Hatutan.com, (11 Janeiru 2024), Díli—Klube Futeból Timor-Leste AD SLB Laulara derrota 2-0 hasoru klube Northern Crocs iha jogu kontinuasaun Taxa Timor Cup 2023 ne’ebé hala’o iha kampu futeból Melbourne Austrália.

(more…)

Kontinua Le'e

Desportu

Kongresu FFTL Falla, Komité Eleitorál La Prudente no Inkapasidade

Published

on

Hatutan.com, (10 Janeiru 2024), Díli- Kongresu Estraordináriu Federasaun Futeból Timor-Leste (FFTL) bá da-IX, Kuarta (10/01/2024), ne’ebé hala’o iha Otél Timor, Díli, falla tanba parte sira kongresista  konsidera Komité Eleitorál inkapasidade no la prudente iha foti  desizaun.

(more…)

Kontinua Le'e
Advertisement

Trending