Hatutan.com, (26 Novembru 2021), Dili—Karketu Dili FC sei hasoru adversáriu AD SLB Laulara FC iha jogu kontinuasaun terseira jornada Liga Futeból Timor Leste (LFTL) primeira divizaun, Sábadu (27/11/2021) iha estádiu munisipál Dili.

Ekipa Karketu Dili FC. Foto/LFTL.

Karketu Dili FC provizoriamente okupa klasifikasaun dahuluk LFTL hafoin manan iha jogu rua antes hasoru Aitana FC no Assalam FC  no adversáriu AD SLB Laulara FC okupa provizoriamente pozisaun daruak iha tabela klasifikasaun rezultadu hosi manan 1 no impata 1.

Notísia iha Relasaun:AD SLB Laulara FC Rekolla Vitória Dahuluk Iha Jornada Daruak LFTL

Sekretáriu jerál Karketu Dili FC, Eliseu Isaac  hateten, AD SLB hanesan ekipa jigante no nia jogadór intimu no suplente sira kuaze kualidade hanesan de’it tanba ne’e ekipa ne’e iha ona preparasaun ida natón atu joga hasoru sira.

“AD SLB Laulara FC ne’e la’ós ekipa bai-bain no sira sai mós hanesan rivalidade ba ekipa matak malin. Tanba ne’e, joga hasoru sira ami tenke manan,” Eliseu Isaac hateten ba jornalista sira iha iha sede LFTL Bairro dos  Grilhos Dili, Sesta (26/11/2021).

Jerente matak malirin ne’e hatutan atu save kampiaun époka ne’e jogu hasoru AD SLB Laulara FC mós sai hanesan jogu determinante, tanba ne’e garante ekipa matak malirin sei manan AD SLB Laulara ho golu liu hosi ida tanba iha ona avaliasaun hosi ekipa tékniku, nune’e iha  ona estratejia oinsa atu prodús golu.

Nune’e mós Treinadór AD SLB Laulara FC, Efren Jeronimo hateten sei mantein ho plantel jogadór sira ne’ebé iha no sei joga ho ritmu SLB nian duni tanba ne’e  minutus 90 mak sei determina.

“Ami nia jogadór sira kuaze kolen tanba ami nia oráriu jogu ne’ebé besik malu loos maibé ami sei esforsu atu hatudu jogu no identidade AD SLB Laulara FC,”  nia hateten.

Trinadór ne’e argumenta, jogadór sira kuaze kolen maibé mantein ho ekipa ne’ebé iha tanba alternativu seluk laiha ona.

Assalam Promete Sei Manan DIT

Ekipa Assalam FC no DIT FC sei hasoru-malu iha jogu kontinuasaun Liga Futeból Timor Leste (LFTL) iha Domingu (28/11/2021), hodi hadau pontus tolu atu bele sai hosi zona degradasaun.

Ekipa rua antes ne’e derrota ona iha jogu rua ne’ebé sira enfrenta antes hasoru adversáriu. DIT FC lakon kontra adversáriu AD SLB Laulara FC no Karketu Dili FC, enkuantu Assalam FC lakon ho adversáriu Lalenok United FC inklui Karketu Dili FC.

Ho derrota ne’ebé iha, obriga ekipa rua tenke halo esforsu máximu hodi hadau pontu tolu iha jogu ne’e atu bele asegura pozisaun iha tabela klasifikasaun no sai hosi zona me’an.

Asistente treinadór DIT FC Jacinto Belo ho Kapitaun DIT FC Feliciano Gonçalves. Foto/Hatutan.com.

Asistente treinadór DIT FC Jacinto Belo ba jornalista-sira iha konferénsia imprensa hateten teknikamente DIT FC halo ona avaliasaun hodi hadi’a tátika jogu atu bele rekolla vitória hodi sai hosi zona me’an.

“Ami halo ona avaliasaun téniku no sei hadi’a komunikasaun jogadór sira nian iha kada liña, nune’e bele rekolla vitória,” Jacinto Belo, hateten.

Asisten treinadór ne’e mós hateten sei halo rotasaun ba jogadór iha liña klaran hodi fó prioridade ba jogadór seluk enkuantu jogadór estranjeiru Gilbert Richard sei hela iha suplente.

Kapitaun DIT FC Feliciano Gonçalves hateten sei hadi’a liña koordenasaun iha kada liña atu bele iha kombinasaun di’ak iha kada liña nune’e bele manan iha jogu kontra Assalam FC.

“Ha’u garante ami nia ekipa sei manan iha jogu ne’e,”  Feliciano Gonçalves, hateten.

Iha parte seluk treinadór Assalam FC Adu Marques hateten jogu kontra DIT FC sai hanesan jogu determinante atu Assalam deside nia destinu iha tabela klasifikasaun.

“Ami tenke manan hodi sai hosi zona mean ne’e ami nia tarjetu,” Treinadór Assalam FC Adu Marques, hateten.

Assalam FC sei nafatin tau konfiansa ba jogadór estranjeiru sira tuir tarjetu klubu nian tanba ne’e sei mantein halo kombinasaun ida di’ak, nune’e bele lori ekipa sai hosi zona me’an.

Jornalista: Vito Salvadór