Hatutan.com, (05 Dezembru 2021), Dili—Ekipa As Ponta Leste FC no AD SLB Laulara FC fahe pontu iha jornada da-haat jogu kontinuasaun Liga Futeból Timor Leste (LFTL), primeira divizaun époka ne’e.

Ekipa As Ponta Leste FC no AD SLB Laulara FC fahe pontu iha jornada da-haat jogu kontinuasaun Liga Futeból Timor Leste (LFTL), primeira divizaun époka ne’e, Domingu (05/12/2021). Foto/LFTL.

Ekipa rua iha esfórsu máximu atu rekolla vitória iha jogu ne’e ho intensaun bele fó presaun ba Karketu Dili FC, ne’ebé provizoriamente okupa primeira klasifikasaun, maibé falla tanba iha fórsa hanesan, nune’e la iha ida mak superiór liu iha jogu ne’e.

Notísia iha Relasaun:Karketu Díli FC Kontinua “Hanehan” DIT FC Ba Zona Okos

Treinadór Efrem Jerónimo hosi AD SLB Laulara FC espresa nia sentimentu kontente, tanba ekipa rua bele halo jogu ida di’ak no atrativu loos nune’e rezultadu ikus fahe pontu.

Sentimentu hanesan espresa mós hosi Treinadór As Ponta Leste FC, Francisco Araújo hodi dehan nia ekipa konsege rekolla pontu ida no apresia ho jogu ne’e, tanba jogadór sira hatudu sira nia talentu no halo esfórsu máximu ba ida-idak nia ekipa maske ikus mai tenke fahe pontu.

As Ponta Leste FC no AD SLB Laulara FC hatudu jogu ida ofensivu tebes. Ekipa rua hahú kedan lansa kontra atake ba malu bainhira árbitu hu apitu sinál jogu hahú.

AD SLB Laulara FC domina kedan bola hodi halo uluk ameasa ida ne’ebé obriga baliza As Ponta Leste FC Albino Ximenex (22) tenke halo esfórsu hodi salva nia rede hosi golu. Ekipa rua sei iha balansu ba jogu no kontinua halo esfórsu atu buka oportunidade hodi hatama golu.

As Ponta Leste FC maske lakon iha pasajen bola maibé sempre halo ameasa kuandu hetan oportunidade.

AD SLB Laulara FC nafatin mantein nia ritmu hodi kontinua halo jogu hosi ain ba ain liu hosi kombinasaun jogadór sira iha liña klaran no avansadu.

Defeza hosi ekipa rua nafatin mantein ida-idak nia disiplina no la halo falta arbiru hodi hamósu oportunidade no kria risku ba ekipa.

AD SLB Laulara FC kontinua hatudu sira nia jogu hodi lansa atake ba ekipa adversáriu, jogadór Alexandre Ima Kefi (21) hetan oportunidade atu marka golu maibé defeza adversáriu sei asegura ho di’ak.

Jogadór As Ponta Leste FC Revelino Martins (99) simu kartaun kinur hafóin halo falta hasoru play maker AD SLB Laulara FC Kornelis Portela (11) iha minutu 27.

Ekipa rua mantein jogu hodi buka oportunidade atu se mak lidera uluk iha jogu ne’e molok primeira parte termina.

Ekipa As Ponta Leste FC no AD SLB Laulara FC fahe pontu iha jornada da-haat jogu kontinuasaun Liga Futeból Timor Leste (LFTL), primeira divizaun époka ne’e, Domingu (05/12/2021). Foto/LFTL.

Jogadór AD SLB Laulara FC Kornelis Portela (11) hetan oportunidade liu hosi bola crosing hosi liña klaran maibé sei falla atu aproveita oportunidade ne’e.  

Jogadór As Ponta Leste FC Mumin Mohammed (8), simu kartaun kinur iha minutu 40 hafóin halo falta hasoru defeza esquerda AD SLB Laulara FC Tonito Belo (50).

Tama ba minutu 43 AD SLB Laulara FC halo substituisaun dahuluk hodi hasai Kornelis Portela (11) ne’ebé sofre aleiza no hatama Job Mark Freitas (15).

Liu hosi substituisaun ne’e ekipa AD SLB Laulara FC koko hadi’a liña klaran atu iha liutan efetividade hodi halo golu.

Ekipa rua la iha ida mak manan iha primeira parte nune’e fahe pontus ho skore 0:0.

Tama ba segunda parte, ekipa As Ponta Leste FC halo kedan substituisaun ba nia jogadór iha liña avansadu hodi hasai Expedito da Conceição (10) no hatama João Halle (17).

Udan obriga ekipa rua tenke halo jogu ho bokon no kampu laran kuaze namdoras no halo jogadór sira sempre monu tanba la iha balansu fiziku.

AD SLB Laulara FC mantein nia ritmu jogu no sempre buka oportunidade liu hosi pasajen bola hosi ain ba ain, maske nune’e As Ponta Leste FC liu hosi kombinasaun jogadór no tátika hosi Treinadór sempre halo balansu ba adversáriu nia jogu hodi hamate bola no buka oportunidade atu hatama golu.

As Ponta Leste FC kontinua halo substituisaun ba jogadór iha liña avansadu no médiu hodi hasai Ejivanio da Costa (7) no Isaac dos Santos (19), hodi hatama Marito dos Santos (9) no Amancio Araújo (18) iha minutu 63 no 64.

Ho substituisaun ne’e As Ponta Leste FC koko halo jogu hodi halo kombinasaun di’ak entre médiu no avansadu atu bele halo golu.

AD SLB Laulara FC lansa ameasa ida ba adversáriu liu hosi jogadór Aldo Amaral (27), ne’ebé lansa primeiru sutu hosi área grandeal liur maibé baliza sei antesipa ho di’ak.

AD SLB Laulara FC halo presaun ba As Ponta Leste FC no jogadór AD SLB Laulara FC Natalino da Costa (8) ne’ebé komanda liña klaran sempre halo jogu ho individu di’ak, nune’e sempre supply bola ba avansadu sira atu hatama golu maibé sei nafatin falla, tanba defeza As Ponta Leste FC sei mantein disiplina hodi asegura adversáriu nia atake.

Ekipa As Ponta Leste FC no AD SLB Laulara FC fahe pontu iha jornada da-haat jogu kontinuasaun Liga Futeból Timor Leste (LFTL), primeira divizaun époka ne’e, Domingu (05/12/2021). Foto/LFTL.

As Ponta Leste FC kontinua ho substituisaun ba nia ekipa iha liña klaran hodi hasai Revelino Martins (99) no hatama Domingos Araújo (13) iha minutu 83 no AD SLB Laulara FC obrigadu tenke halo substituisaun ba jogadór Aldo Amaral (27) ne’ebé sofre aleiza hodi hatama Luis da Silva (17) iha minutu 84.

AD SLB Laulara FC kontinua halo atake ba nia adversáriu maibé sei nafatin falla. Silverio Garcia (27) simu kartaun kinur hafóin halo falta hasoru defeza AD SLB Laulara FC Fernando de Carvalho (3) iha minutu 90+1.

To’o jogu termina ekipa rua laiha ida mak rekolla vitória no obrigadu tenke fahe pontu.

Ho rezultadu ne’e As Ponta Leste FC mantein iha segunda klasifikasaun provizóriu ho pontu 7, enkuantu nia adversáriu AD SLB Laulara FC mantein iha terseira klasifikasaun ho pontu 6.

Jornalista: Vito Salvadór