Hatutan.com, (04 Dezembru 2021), Dili—Karketu Díli FC kontinua hatudu nia superioridade iha Liga Futeból Timor-Leste (LFTL) jornada dahaat, hafoin halakon DIT FC ho skore 1:0.

Kontra Atake Entre Ekipa Karketu Dili ho DIT FC. Foto/LFTL.

Vitória ne’e lori ekipa matak malirin nafatin tuur iha zona seguru no provizoriamente tuur iha primeira klasifikasan ho pontus 10.

Notísia iha Relasaun:Inkonsisténsia Desizaun Árbitu, Aitana-Lalenok United “Hurlele-malu”

Pontu 10 ne’e rezultadu hosi manan tolu no impata, enkuantu DIT FC nafatin okupa zona mean hafoin sofre derrota dala haat tutuir-malu.

Jogu hahú Karketu Dili FC iha kedan ambisaun atu manan nia adversáriu hodi asegura sira nia pozisaun iha tabela klasifikasaun.

Maske nune’e, sira la hatudu sira nia ofensidade iha jogu no husik adversáriu sira aproveita oportunidade hodi lansa ameasa ne’ebé lori perigu ba baliza.

Karketu Dili FC domina iha jogu, maibé falla iha komunikasaun entre jogadór sira iha liña kotuk no klaran, nune’e avansadu sira susar atu hetan bola no falla atu halo ameasa ba adversáriu DIT FC.

Parte DIT FC maske falla iha liña klaran maibé konsege lansa ameasa ba Karketu Dili FC liu hosi avansadu José Santos (7) no Sewor Mahuse (9).

Jogadór DIT FC Edivaldo Castro (24) halo falta hasoru jogadór Karketu Dili FC Nataniel Reis (8) iha minutu 5.

Ekipa rua nafatin halo esforsu atu bele hetan Vitória iha jogu ne’e maibé laiha ida mak marka uluk golu.

Jogadór hosi klube rua nafatin halo esforsu no Karketu Dili FC lansa ameasa ba DIT FC liu hosi bola falta iha área grandeal oin, maibé sei nafatin falla.

Angiso Barbosa (16) jogadór Karketu Dili FC simu kartaun kinur hafoin halo falta hasoru Sewor Mahuse (9) iha minutu 36.

Tama ba minutu 40 ikus DIT FC kuaze hetan oportunidade atu marka golu aproveita faillansu defeza adversáriu nian, maibé José Santos (7) falla ezekuta bola oportunidade ne’e ba golu no bola semo liu de’it hosi baliza leten. Ekipa rua obrigadu tenke fahe pontus iha primeira parte.

Kontra Atake Entre Ekipa Karketu Dili ho DIT FC. Foto/LFTL.

Tama ba segunda parte, DIT FC hasa’e kedan tensi jogu hodi lansa ameasa ba adversáriu Karketu Dili FC.

Ekipa rua halo kontra atake ba malu hodi hadau malu oportunidade atu hatama golu, maibé laiha ida mak hatama uluk golu hodi lidera.

Atu hadi’a liña avansadu Karketu Dili FC halo kedan substituisaun ba nia jogadór iha liña oin hodi hasai Mickael Eugene (88) no hatama Gelvanio Alberto 10 iha minutu 50.

Substituisaun ne’e lori mudansa tátika ba Karketu Dili FC hodi hahú halo atake ba adversáriu no iha minutu Karketu Dili FC kontinua halo tan substituisaun hodi hasai avansadu Patrick da Silva (99) no hatama Silvestre Gama (21) iha minutu 53.

Ho substituisaun ne’e lori motivasaun foun ba ekipa Karketu Dili FC hodi hahú halo atake ba nia adversáriu DIT FC.

Ekipa rua mantein nia ritmu jogu, maibé Karketu Dili FC hahú halo tranzisaun táktika, nune’e domina jogu liu hosi kombinasaun di’ak entre jogadór sira iha liña klaran no avansadu.

DIT FC hahú ho substituisaun iha minutu 61 hodi hasai Edivaldo Castro (24) no hatama Lopordo Guterres (18).

Atu halo balansu ba Karketu Dili FC nia jogu, DIT FC kontinua halo substituisaun hodi hasai Edincio da Costa (8) no hatama Venceslau Fatima (22).

Substituisaun ne’e la lori mudansa no Karketu Dili FC kontinua domina jogu.  Tama ba minutu 69 Karketu Dili FC fura rede DIT FC nian liu hosi jogadór Gaudêncio Monteiro (14) ne’e aproveita bola barullu iha area grandeal laran hafoin Nataniel Reis (8) sutu kantu hosi liman karun.

Golu ne’e halo ekipa adversáriu hela iha presaun nia laran no esforsu makás atu halo impata maibé sei nafatin falla.

DIT FC kontinua halo substituisaun hodi hasai Sewor Mahuse (9) no hatama Serafin Brito (17) iha minutu 72.

Ho substituisaun ne’e DIT FC konsege halo atake di’ak ba iha ekipa adversáriu maibé nafatin falla. DIT FC kontinua halo substituisaun hodi hatama Inacio Magno (66) no hasai Ruben Borges (10) ne’ebé sofre aleiza.

Karketu Dili FC nafatin halo atake no ameasa ba ekipa DIT FC liu hosi avansadu Gelvanio Alberto (10) no Silvestre Gama (21), maibé seidauk bele aumenta golu ba ekipa matak malirin.

Jogadór Karketu Dili FC Norberto Gonçalves (13) simu kartaun kinur hafoin halo falta ba jogadór adversáriu. Ekipa rua mantein sira nia jogu to’o tempu remata Vitória ba Karketu Dili FC.

Treinadór Karketu Dili FC rekoñese domina jogu, maibé falla iha liña klaran tanba jogadór estranjeiru ne’ebé joga iha liña klaran auzente no orgullu nafatin tanba bele rekolla Vitória iha jogu dahaat nian.

Treinadór DIT FC Francisco Gama konfesa katak, iha duni ambisaun makás atu rekolla Vitória iha jogu ne’e, maibé falla tanba presaun psikolójiku ne’ebé derrota ona iha jogu tolu antes.

Jornalista: Vito Salvadór