Hatutan.com, (05 Dezembru 2021), Dili—Maski Ekipa elefante Thailándia rekolla vitória dahuluk iha jogu AFF 2020, hafóin manan Timor-Leste (TL) ho skore 2-0 iha grupu A, iha estádiu nasionál Singapore Domingu (5/12/2021) ne’e, maibé Treinadór Alexandre Polking rekoñese katak, ekipa Lafaek halo buat hotu sai difísil iha jogu ne’e.

Ekipa elefante Thailándia rekolla vitória dahuluk iha jogu AFF 2020, hafóin manan Timor-Leste (TL) ho skore 2-0 iha grupu A, iha estádiu nasionál Singapore Domingu (5/12/2021). Foto/AFF.

Alexandre Polking, hanesan treinadór ekipa nasionál Thailándia mós uza tékniku hotu hodi hakás aan atu prodús golu barak tuir planu ne’ebé sira iha, maibé la konsege tanba hetan susar atu sobu jogu defensivu ekipa TL nian ne’ebé sempre sólidu durante iha kampu laran.

Notísia iha Relasaun:TL Klasifikadu Ikus-liu iha Suzuki CUP 2020

“Ekipa Timor-Leste desde hahú to’o remata halo buat hotu sai difísil ba ami nia ekipa,” Hatutan.com sita Alexandre Polking ne’ebé fó-sai iha pájina ofisiál AFF Cup.

Ekipa nasionál Thailándi mós haree katak, ekipa selesaun nasionál TL iha prestasaun ne’ebé mak mudansa signifikante teb-tebes la hanesan ho prestasaun iha époka 2018 nian, iha ne’ebé hafóin jogu ho ekipa Thailándia derrtota ho skore 6:0.

Iha jogu apuramentu ne’e, Timor-Leste konsideradu nu’udár nasaun frázil liu iha dezenvolvimentu Futeból kompara ho nasaun Thailándia ne’ebé iha infraestrutura no dezenvolvimentu futeból adekuadu liu no avansadu liu.

Jogadór selesaun nasionál ekipa Lafaek maioria joga iha liga nasionál kompara ho Thailándia ne’ebé nia jogadór selesaun nasionál kuaze joga iha liga Japaun no Europea.

Maski nune’e, ekipa selesaun nasionál TL hatudu ba sudeste Aziátiku katak, dezenvolvimentu futeból iha TL hahú iha mudansa bainhira liga iha TL hahú ho Liga Futeból Amadora (LFA) iha 2015 no hetan transfórmasaun ba Liga Futeból Timor-Leste (LFTL) liu hosi primeiru kongresu iha tinan 2020.

Iha jogu públiku no adeptu sira bele hare oinsa Thailándia domina ball possesion ho pursentu 75,3, tuir estatístika AFF nian, maibé la rezulta ameasa ida sériu liu ba ekipa TL iha primeira parte tanba ekipa lafaek konsege halo balansu ba avansadu Thailándia nia jogu liu hosi servisu makás liña defeza nian ne’ebé komanda hosi Gilomino Junior (18) no João Panji (29).

TL kuaze la sai hosi presaun nia laran iha jogu primeira parte tanba Thailándia sempre halo atake liu hosi kolaborasaun di’ak entre jogadór sira hosi médiu no mós  avansadu estremu Terasil Dangda (10) ne’ebé mós  hanesan kapitaun ekipa nasionál Thailándia.

Thailándia hetan oportunidade osan me’an liu hosi defeza Kritsada Kaman (26) ne’ebé aproveita bola kantu no kona defeza Timor Leste Filomeno Junior (18) nia ain no ba kona mós  iha rin baliza nian.

Liu de’it minutu balun, Thailándia kontinua ho ameasa liu hosi avansadu senior Terasil Dangda liu hosi bola ulun, maibé baliza Timor Leste Junildo Pereira (12) konsege salva no baku sai.

Defeza direta TL Nelson Viegas (22) obrigadu simu kartaun kinur hafóin hamonu jogadór adversáriu iha área grandeal liur.

Rezultadu ikus, Ekipa elefante Thailándia rekolla vitória iha jogu AFF 2020, hafóin manan Timor-Leste (TL) ho skore 2-0 iha grupu A, iha estádiu nasionál Singapore Domingu (5/12/2021). Foto/AFF.

TL halo kontra atake liu hosi jogadór Paulo Gali (21) no Mouzinho de Lima (11) maibé difísil atu halo jogu tanba tarde atu hetan suporta hosi nia maluk sira bainhira halo kontra atake, nune’e sempre falla no lakon bola.

Supachok Sarachart (7) avansadu esquerda Thailándia nian mós halo ameasa ida liu hosi sutu livre ne’ebé nia halo besik área grandeal iha minutu 32, maibé liu de’it hosi baliza nia sorin karuk no la fó risku ida perigozu.

Ekipa nasionál Thailándia kuaze domina jogu no halo atake barak ba ekipa TL, maibé liña defeza ne’ebé disiplina obriga Thailándia tenke fahe pontu ho TL iha primeira parte.

Iha segunda parte, ekipa Thailándia halo mudansa ba tátika, nune’e nafatin halo esforsu iha segunda parte hodi nafatin lansa ameasa no atake ba ekipa TL, nune’e ikus mai iha minutu 51 jogadór Pathompon Charoenrattanapirom (14) ne’ebé fóin tama iha segunda parte  lansa golu ida ho ain loos hodi muda skore ba 1:0.

Molok bola tama ba rede baliza Junildo Pereira (12) konsege salva ho liman, maibé tanba bola makas nune’e bola hodi biit tama duni.

Tama ba minutu 70, jogadór estimadu AD SLB Laulara FC époka kotuk, Mouzinho de Lima (11) atu halo golu impata, maibé tanba tarde nune’e bola ne’ebé nia suta konsege salva hosi defeza adversáriu Manuel Bihr (4).

Maski domina jogu ho ball possesion ne’ebé so’e dook TL maibé ekipa Thailándia sempre falla iha parte finalizasaun, tanba laiha akurasi liuliu avansadu sira falla halo golu liu hosi oportunidade ne’ebé iha.

Atu hadi’a tékniku no asegura ekipa TL hosi derrota, treinadór Fabio Maciel halo substituisaun hodi hasai avansadu Mouzinho de Lima (11) no hatama Braz (27).

Hafóin substituisaun ne’e, TL laiha mudansa ida signifikativu iha taktíka tanba kuaze laiha kontra atake  no husik ekipa adversáriu domina jogu no ikus mai tenke sofre tán golu ida iha minutu 81.

Jogadór Thailándia Supachok Sarachard (7), aproveita bola pasájen hosi parte liman karuk nian hodi aumenta tán golu ida ba nia ekipa, hodi muda skore ba 2-0.

Thailándia iha oportunidade atu aumenta tán golu iha minutu sira ikus molok jogu termina hodi nuda skore ikus iha tabela, maibé falla nune’e jogu termina ho vitória ba Thailándia  no TL obrigadu simu derrota ne’e hodi hein jogu daruak nian kontra Myanmar iha Kuarta (08/12/2021).

Ho derrota ne’e, provizoriamente Timor-Leste okupa zona okos iha tabela klasifikasaun grupu A, ekipa selesaun nasionál Timor Leste ne’ebe lideradu hosi  treinadór Brazileiro Fabio Maciel komprometidu sei hadi’a di’ak liu tán jogu iha jogu tuir mai.

Ekipa Lafaek kompostu hosi Baliza Adérito (Assalam FC), Fernando (SLB Laulara), Natalino (Karketu Dili).

Kotuk, Candido Oliveira (Ponta Leste), Avigmas (Boavista Timor Leste), João Panji (Assalam FC), Gumario (Lalenok United), Duarte Ximenes (Lalenok United), Sabas (Karketu Dili), Gaspar Lucas (Lalenok United), Ade (Karketu Dili).

Klaran,  Gelvanio Costa (Karketu Dili), Osvaldo Belo (Lalenok United), Armindo (Lalenok United), Rufino Gama (Lalenok United), Kefi (Boavista Timor Leste), Filomeno (SLB Laulara), João Pedro (UiTM FC), Paulo Gali Freitas (Lalenok United), Elias (Lalenok United), Danilson (BoavistaTimor Leste) no Oin, Mouzinho (SLB Laulara), Edit Savio (Boavista Timor Leste).

Tuir oráriu, Ekipa Lafaek sei joga kontra ekipa Myanmar iha Kuarte 08 Dezembru 2021, tuku 18:30 Otl, estádiu nasionál Singapura.

Jornalista: Vito Salvadór