Hatutan.com, (10 Dezembru 2021), Díli—Traballadór na’in-25 hosi kompañia jogu Toto Bola, “Kontente Hamutuk”, ezíje ba Governu liu-liu Ministériu Turízmu Komérsiu no Industria (MTCI), atu fó klarifikasaun loloos razaun orienta Polísia Sientífika Investigasaun Kriminál (PCIC-Sigla Portugués), hodi halo buska no hapara tiha jogu iha área Hudi-laran, Dili.

Traballadór na’in-25 hosi kompañia jogu Toto Bola, “Kontente Hamutuk”, hala’o konferénsia imprénsa, iha Hudi-laran, Suku Bairru-Pité, Kuarta (08/12/21). Foto/Hatutan.com.

Traballadór hirak-ne’e, durante ne’e moris de’it ho vensimentu hosi jogu Toto Bola ne’ebé sira serbisu bá, no fulan rua ona Governu deside hapara atividade ne’e la ho justifikasaun klaru.

Notísia iha Relasaun:Tribunál Aplika TIR no Aprezentasaun Periódika ba Amaro “Susar” da Costa

Situasaun ne’e halo traballadór na’in-25 ne’ebé durante ne’e serbisu iha kompañia ne’e, tenke simu todan, tanba fulan rua ona la hetan vensimentu.

“Ami husu ba MTCI atu fó klarifikasaun loloos mai ami nia kompañia Toto Bola Kontente Hamutuk nia sala iha ne’ebé loos. Tanba, komesa iha 26 Outubru PCIC halo buska mai kompañia, to’o agora ami la asesu ba ami nia saláriu,” Portavós traballadór sira, Merciana Borges Berek, hateten ba jornalista sira, liuhosi konferénsia imprénsa, iha Hudi-laran, Suku Bairru-Pité, Kuarta (08/12/21).

Tuir traballadór sira katak, durante ne’e kompañia kumpre hela regra legál sira mak hanesan selu taxa kada fulan, maib’e derrepente de’it Governu orienta PCIC hodi hapara atividade.

Membru PCIC halo Busca Apreeção ba Kompañia “Kontente Hamutuk” ho jogu Toto Bola no hamosu diskusaun makás entre empreza-na’in, Amaro da Costa “Susar” iha fatin jogu, área Hudi-laran, Suku Bairru-Pité, Tersa 26 Outubru 2021. Foto/Facebook.

Durante fulan ida resin traballadór sira hamutuk ho kompañia, esforsu tebes hodi buka solusaun, infelismente seidauk hetan solusaun ruma.

Ba situasaun ne’e, traballadór sira husu ba MTCI atu aselera lalais prosesu hosi kazu ne’e, no liu-liu atu bele hetan lalais solusaun ho imediata, nune’e traballadór sira bele asesu fila-fali ba sira nia serbisu, buka osan hodi sustenta nesesidade familia.

Nia mós informa katak, antes ne’e liuhosi primeiru interogatóriu, desizaun hosi Tribunál Distritál Díli (TDD) fó-sai katak, atividade jogu Toto Bola ne’ebé durante ne’e kompañia “Kontente Hamutuk” loke, laiha problema ruma, signifika atividade la’o hela iha korridór lei ne’ebé vigora.

Iha fatin hanesan, traballadór Faustino Martins Lopes husu ba MTCI atu aselera prosesu, karik iha problema ruma, nune’e bele reativa atividade jogu ne’e hodi responde mós ba traballadór sira nia nesesidade.

“Ami husu ba Governu atu loke fila-fali ami nia kompañia ne’e, atu ami bele serbisu hanesan babain, nune’e kompañia bele selu ami. Tanba loron boot mós besik ona. Imposível ami atu ba tane liman ba Estadu pelu-menus loke serbisu atu ami sira ne’e bele serbisu,” Faustino Martins Lopes, husu.

Ministru Turizmu Komérsiu no Indústria (MTCI), José Lucas do Carmo da Silva. Foto/MTCI.

Hatán bá preokupasaun ne’e, Ministru Turizmu Komérsiu no Indústria (MTCI), José Lucas do Carmo da Silva, esplika, atividade hotu-hotu liga ba jogu nian, sempre iha koordenasaun ho ministériu no Komandu Polísia Nasionál Timor-Leste (PNTL).

Nia esplika, normalmente Ministériu hasai regulamentu, maibé sempre atua hosi komandu PNTL.

Maibé, ligadu ba kazu hapara atividade jogu Toto bola hosi kompañia Kontente Hamutuk nian iha Hudi-laran, nia parte seidauk simu relatóriu ruma hosi Diresaun Inspesaun Jerál ba Jogu nian.

“Ne’e duni, iha buat ruma, ministériu sempre hetan relatóriu ruma hosi komandu PNTL. To’o agora ministru seidauk hetan, tanba ida ne’e sei iha Inspesaun Jerál dos Jogus, kuandu hato’o mai, ministru bele intende, bele fó hatene ba públiku, kona-bá saida mak akontese. Maibé, kazu ida-ne’e kala sei iha koordenasaun entre Inspesaun Jerál dos Jogus, ho komandu PNTL,” José Lucas do Carmo da Silva, hateten ba Hatutan.com iha Parlamentu Nasionál, Kinta (09/12/2021).

José Lucas afirma, iha MTCI nia mahon, eziste Inspesaun Jerál dos Jogus. Tanba ne’e, bainhira iha asuntu ruma iha terrenu, Inspesaun Jerál dos Jogus mak hatene.

“Kuandu iha asuntu ruma ho polítika, sira hato’o mai ministru. Ne’ebé, asuntu tékniku ruma sei agora iha ne’ebá, ita boot sira bele ba konfirma direta, klarifika ho inspetór jerál dos jogus,” José Lucas dos Carmo, rekomenda.

Kona-bá ne’e, Hatutan.com konfirma duni ho Inspetór Jerál dos Jogus, Domingos Guterres  iha edifísiu MTCI, maibé nia parte seidauk bele fó komentáriu ruma, tanba buat hotu iha ona Tribunál.

“Ha’u labele fó komentáriu tama nia parte rasik mós seidauk simu desizaun ruma hosi Tribunál kona-bá kazu hapara jogu ne’e,” Domingos Guterres, hateten.

Iha tersa, 26 Outubru 2021, liuhosi atividade buska ne’ebé membru PCIC sira halo ba Kompañia “Kontente Hamutuk” ho jogu Toto Bola ne’e, mosu mós diskusaun makás entre empreza-na’in, Amaro da Costa “Susar” ho membru PCIC sira iha fatin jogu, área Hudi-laran, Suku Bairru-Pité.

Informasaun Ne’ebé Hatutan.com asesu hosi fontes oioin iha Tribunál ho autoridade Polísia Sientífika Investigasaun Kriminál (PCIC sígla Portugé) iha Sesta (10/12/2021) katak, atuasaun PCIC ba kompañia Kontente Hamutuk ihaTersa 26 Outubru 2021, bazeia ba mandadu busca no apreenção hosi Tribunál Distritál Díli (TDD).

Jornalista: Rogério Cárceres