Hatutan.com, (14 Dezembru 2021), Díli—Ajénsia Metereolojia, Klimatolojia, no Jeofízika Repúblika Indonézia (RI) nian, alerta ona ba populasaun atu matan-moris neon-na’in ho sinál no predisaun ne’ebé hatudu katak, posibilidade boot bele akontese Tasi-sae (Tsunami) iha área Provínsia Sulawesi parte Súl, Sudeste Sulawesi, Provínsia Nusa Tenggara Timur (NTT), Nusa Tenggara Barat (NTB) ho Maluku.

Alerta sedu ne’e, fó-sai hafoin rai-nakdoko makás ho magnitude 7,5 iha Tersa (14/12/20) tuku 10:20 Oras Indonézia Oeste (maizumenus tuku 14:00 Otl) ho nia pozisaun hatuur an iha 7.59º iha latitude súl 122.26º longitude leste ho nia profundidade kilómetru 12.

Tuir observasaun hosi Ajénsia Metereolojia Indoneézia nian detekta tsunami akontese iha área balun Nusa Tenggara Timur (NTT) nian ho nia aas metru 0,07 ka sentimetru 7, hafoin rai-nakdoko ho magnitude 7,4 iha Tasi Flores nian.

Tuir Komunikadu hosi Ajénsia Metreolojia RI nian ne’ebé publika hosi Embaixada Indonézia nian iha Dili Timor-Leste liu hosi ninia pájina ofisiál facebook Tersa (14/12/21), tsunami identifikadu ona iha Marapokot, Distritu Nagekeo NTT iha tuku 10.36 Oras Indonézia Oeste, nune’e mós iha área Reo Distritu Manggarai iha tuku 10.39 Oras Indonézia Oeste.

Tuir peskiza no observasaun hosi Ajénsia Metereolojia RI nian katak, tsunami ninia aas iha fatin rua ne’e metru 0,07 ka sentimetru 7.

Antes ne’e, Rai-nakdoko, ho magnitude 7,4 akontese iha Tasi Flores nia ho nia kle’an kilometru 10 iha Tersa, tuku 10.20 Oras Indonézia Oeste. Fatin Rai-Nakdoko iha Larantuka, Distritu Flores Leste, NTT.

Ajénsia Metereolojia RI nian fó sai-ona alerta sedu iha área Sulawesi parte sul, Illa Ende,  Flores Leste, Sikka, Illa Lembata, Illa Adonara, Manggarai, Ngada no dan Alor Nusa Tenggara Timur.

Parte Protesaun Sivíl Indonézia nian seidauk atualiza vítima durante rai-nakdoko, no mós oras ne’e daudaun populasaun sei hela iha trauma nia laran. (**/Am).