Hatutan.com, (20 Dezembru 2021), Díli—Governu Timor-Leste (TL) ho Banku Dezenvolvimentu Aziátiku (ADB, sigla Inglés), asina ona akordu Empréstimu Konsesionál millaun $35 ba Projetu melloramentu distribuisaun enerjia eletrisidade iha Munisípiu 12.

Ministru Rui Gomes akompaña hosi Ministra Negósiu Estranjeirus no Kooperasaun, Adaljiza Magno, Ministru Obras Públika, Salvadór Soares dos Reis Pires no Vise-Ministra Finansa, Sara Lobo Brites, iha serimónia Asinatura Akordu ho ADB ba empréstimu millaun $35. Foto/Média MF.

Osan ne’e mós sei utiliza ba fortalesimentu kapasidade Empreza Estatál Eletricidade de Timor-Leste (EDTL), hodi jere rede elétrika ho objetivu atu moderniza setór enerjia.

Notísia iha Relasaun:PN Aprova iha Finál Globál OJE 2022 Billiaun $1,95

Governu Timor-Leste mós aloka millaun $15 liuhosi Fundu Infrastrutura, hodi finansia reabilitasaun distribuisaun rede elétrika no konstrusaun edifísiu rejionál 12.

Projetu melloramentu distribuisaun enerjia eletrisidade ne’e, sei instala 140,000 smart meters no distribui kartaun pré-pagu, atu ajuda uma-ka’in sira hodi jere sira nia uzu eletrisidade.

Projetu ne’e sei instala sistema automatizasaun distribuisaun liña enerjia ida, hodi mellora rede elétrika no instala mós transformadores distribuisaun hamutuk 30, hodi redús karga ne’ebé todan.

Ministru Rui Gomes hateten, polítika VIII Governu Konstitusionál mak kontinua halo aproximasaun ba Instituisaun finanseira Internasionál sira atu hetan empréstimu konsensionál ho objetivu atu finansia investimentu infraestrutura ne’ebé fó impaktu ba kresimentu ekonómiku iha rai-laran no garantia sustentabilidade fundu mina-rai

“Empréstimu ho montante millaun $35 ne’e hanesan empréstimu baratu ho funan ki’ik ho ninia períudu maturidade tinan 15 no períudu karénsia tinan lima. Retornu investimentu Fundu Minarai iha Setembru 2021 atinji 4,87% kada tinan, kompara ho kustu empréstimu konsensionál, 2% kada tinan,” Rui Gomes hateten liuhosi komunikadu.

Akordu Empréstimu ida-ne’e mak Dahuluk ba Eletricidade de Timor-Leste, hetan apoiu kontribuisaun finanseira hosi Parseiru Dezenvolvimentu hanesan BDA, hafoin estabelese nu’udár Empreza Públiku.

Akordu ida-ne’e mós hanesan apoiu BDA ba Dahuluk iha setór enerjia iha Timor-Leste. Ida-ne’e hatudu sinál konfiansa ba malu hosi parte rua ne’ebé envolve iha selebrasaun akordu ne’e.

Iha eventu Asinatura Akordu ne’e, Ministru Rui Gomes akompaña husi Ministra Negósiu Estranjeirus no Kooperasaun, Adaljiza Magno, Ministru Obras Públika, Salvadór Soares dos Reis Pires no Vise-Ministra Finansa, Sara Lobo Brites.

Iha Sorumutuk loron 15 fulan-dezembru 2021, Konsellu Ministru autoriza Ministru Finansa, Rui Gomes hodi reprezenta Estadu Timor-Leste asina Akordu Empréstimu millaun $35 ho Banku Dezenvolvimentu Aziátiku.

Jornalista: Vito Salvadór